Augstgau

Dialäkt: Baseldütsch

Dr Augstgau isch e historischi Landschaft und e Gau im Herzogdum Schwoobe gsi. Er het d Gebiet im Winkel zwüsche dr Aare und em Rhii umfasst, d Gränze im Weste isch bi dr Birs und dr Lüssel bzw. dr Siggere gsi. Si Naame het dr Augstgau vo dr Ortschaft Augst überchoo, em römische Augusta Raurica, wo bis ins 7. Joorhundert e Bischof residiert het.

Die eltisti Urkunde, wo dr Naame Augstgau din voorchunnt, stammt us em Joor 752. Es isch umstritte, öb s dr Augstgau scho immer as äigeständige Gau gee het, oder öb er sich vom Aargau abgspaltet het. Dr Augstgau siinersits isch in dr Sisgau (öbbe 835), dr Frickgau (926) und dr Buchsgau (1080) zerfalle. Mä vermuetet, ass d Groofe vo Hombärg d Noochkomme vo de Groofe vom Augstgau gsi si. Zum letschte Mol isch dr Augstgau in ere Urkunde us em Joor 1041 beläit, wo dr König Heinrich III. d Groofschaft Augst im Augstgau und Sisgau em Basler Bischof Theodoricus gschänggt het.

Weblingg

• Rudolf Gamper: Augstgau. In: Historisches Lexikon vo dr Schwiiz.

Dä Artikel basiert uff ere fräie Übersetzig vum Artikel „Augstgau“ vu de dütsche Wikipedia. E Liste vu de Autore un Versione isch do z finde.