Frickgau

Dr Frickgau isch im Middelalter e geograafischi und politischi Region gsi. Er het sich im Nordweste vom hütige Kanton Aargau befunde.

Gschicht

No im 8. Joorhundert, wo d Karolinger ir Herrschaftsgebiet in Gau iidäilt hai, het dr Frickgau zum Augstgau ghöört. Öbben im 10. Joorhundert isch dr Augstgau denn in dr Sisgau im Weste, dr Buchsgau im Südweste und dr Frickgau im Osten ufdäilt worde. Ane 926 isch dr Gau s erschte Mol erwäänt, mit dr Namensform Frichgowe.

D Gränze vom Frickgau im Süde und im Norde si d Flüss Aare und Rhii gsi, und im Weste isch s Gebiet vom Gau bis zum Möhlibach ggange. Zwüsche dr Aare und em Möhlibach isch die alti Gränze mit dr hütige Kantonsgränze braktisch idäntisch. Im 12. Joorhundert si d Herre vo Alt-Hombärg d Groofe vom Frickgau gsi, aber Rhiifälde im Weschte dervo het de Zähringer ghöört, wo dr Ortschaft ires Stadträcht gee häi. D Groofschaft isch im 13. Joorhundert an d Habsburger gfalle. 1386 isch au d Pfandschaft über s Schloss und d Stadt Rhiifälde in ihri Händ choo und ane 1408 au die laufeburgische Bsitz. Bis zur Middi vom 15. Joorhundert hai d Gebiet vom ehemoolige Frickgau zu de habsburgische Herrschafte Rhiifälde und Laufeburg ghöört.

Dr Begriff Frickdaal

Dr Begriff Frickdaal stammt nid vom Begriff Frickgau ab, sondern isch erst in dr Napoleonische Zit in Moode choo. Im Vorderöstriich het mä dr Begriff Frickdaal numme für s Gebiet zwüsche Hornusse und Eike brucht. Wo d Franzoose d Gebiet vom Vorderöstriich, wo südlig vom Rhii glääge si, vom Räscht abdrennt häi, häi si e Name für das ganze Gebiet welle, wo denn in drei Ämter iidäilt gsi isch. Wil s Frickdaal in dr Middi gsi isch, häi si si Naame für s ganze Gebiet afo bruuche.

Weblingg

• Dominik Sauerländer: Frickgau. In: Historisches Lexikon vo dr Schwiiz.