Axpo Power AG
D Axpo Power AG, bis 2012 Axpo AG, bis 2009 Nordoschtschwiizerischi Chraftwärch AG (NOK), isch ä Grossvertäileri für eleggtrische Strom. Si isch zueschtändig für d Kantüü Aargau, beednä Appizäll, Glaris, Sangallä, Schaffhuuse, Thurgau, Zug und Züri.
| Axpo Power AG | |
|---|---|
| |
| Unternähmensform | Akziegsellschaft |
| Gründig | 1908 (als Löntsch-Beznau-Werke) |
| Sitz | Baade, Schwiiz |
| Leitig |
Andy Heiz, Gschäftsläiter |
| Branche | Energii |
| Uffdritt im Netz | axpo.com |
| Dialäkt: Glarnertüütsch |
Aagfange hets im Nünzechähundertacht. Dr Chlüüntalersee isch en Natursee, wu dur en Bärgschturz entschtande-n-isch. Über dr Bärgschturzmasse henz e Schtaumuur buut mit ere Straass obedruff. Will di gliich Gsellschaft au s Aarechraftwärch vu Beznau under sich gchaa het, het mer sich für dr Name Löntsch-Beznau-Wärch entschide. Hüt nuch heisst s Chraftwärch, wo vum Chlüüntalersee s Wasser überchunnt, »Chraftwärch am Löntsch«, und dr Löntsch isch dr Abfluss vum Chlüüntalersee. Die Gsellschaft isch zum gröschte Energievertäiler vu dr Schwiiz aagwachse, und mer het si im Nünzechähundertviertzechä in »Nordoschtschwiizerischi Chraftwärch« NOK umgnännt.
D NOK het sich am Höchschtspannigsnetz vu 380 Kilovolt betäiliget und isch hundertprozäntigi Bsitzeri vum Chärnchraftwärch Beznau worde. Si het au Aateil a de Chärnchraftwärch vu Löibschled und Gösge. Zur Helfti gchört ihrä au s Wasserchraftwärch im Wägital. Au usserhalb vu dr Nordoschtschwiiz het si Beteiligunge. Nännenswert isch s Chraftwärch Riburg-Schwörstadt uf dütschem Schtaatsgebiet. D Eleggtrizitätsgsellschaft Laufeburg isch s gschäftsfüerende Mitgliid vu de Chraftwärch Albula-Landwasser z Filisur gsi. Die Ufgob het im Zweituusedundeis d Axpo Trading AG übernuu, wo es Tochterunternähmä vu dr Axpo Holding AG isch.
D Axpo isch au d Betriiberin vu bedüütende Hoochspannigsläitige wie zum Bischpiil dr Vorabläitig worde. Bsunders wichtigi Läitigszüüg günd vu Bonaduz i d Breiti bi Nüüreschtorf und vu Nüüreschtorf über Beznau nach Laufeburg. Det het d Eleggtrizitätsgsellschaft Laufeburg es Nutzigsrächt chänne gnüüsse. Zäme mit em EW Züri het si au di schlaagziileträchtigi und umschtritteni Läitig vu Bängge uf Mettlä ygrichtet. Die Läitige wärded sit em Jänner Zeituusedunddrizäche vu dr Swissgrid betribe.
D Axpo Vertrieb AG[1] isch im Nünzechähundertachtenünzgi as e gmeinsami Verchaufs- und Marggetinggsellschaft vo dr NOK und dr Chraftwärch vu dr Kantüü gründet worde.[2] Im Zweituusedundeis isch d Axpo Holding AG gründet worde, d NOK und d Axpo Trading AG sind zu 100 Prozänt Tochtergsellschafte vu dere Holding. Uf en erscht Oktober Zweituusedundnüü het me dr Firmename vu Nordoschtschwiizerischi Chraftwärk AG uf Axpo AG gweggsled und ali Tochterfirme vo de Axpo Holding händ de Marggename „Axpo“ in ihren Firmename iipuut.[3] Sit am 23. Augschte 2012 gheisst d Firme Axpo Power AG.[4]
Weblink ändere
Commons: Axpo – Sammlig vo MultimediadateieFuessnoote ändere
- ↑ Axpo AG Handelsregisteriitrag bim Kanton Aargau vom 30. März 2010
- ↑ Chronik NOK / Axpo 1899 - 1914 - 2014 PDF-Datei uf axpo.com abgruefe am 13. Dezember 2017
- ↑ Bald kein NOK-Strom mehr Artikel i de Aargauer Ziitig vom 24. September 2009
- ↑ Axpo Power AG Handelsregisteriitrag bim Kanton Aargau vom 23. Augschte 2012