Fäldschlössli

D Brauerei Fäldschlössli isch e grosse Härsteller vo Bier und andere Getränk in dr Schwiiz.

S Undernääme, wo hütt offiziel Feldschlösschen Getränke AG heisst, isch z Rhyfälde im Kanton Aargau dehei. Sid em Joor 2000 isch’s en Dochterfirma vom dänische Carlsberg-Konzärn.

D Fabrigg mit dr schöne Architektur, wo mit alte Elemänt vom Burgebau spilt, stoot ufem offene Fäld weschtlech vo Rhyfälde, grad näb dr Ysebaan und dr Autobaan. Si isch ane 1876 gründet worde; s Wasser für d Sudhüüser chunt us ere Kwelle bi Magde. D Firma het am Afang «Kollektivgesellschaft Wüthrich & Roniger Brauerei zum Feldschlösschen» gheisse und isch ane 1890 d Akziegselschaft Brauerei zum Fäldschlössli worde.

Sukzessyv het d Rhyfälder Brauerei vil anderi Bierbrauer i dr Schwiiz übernoo und isch do drmit sitem 20. Joorhundert im Land e füerende Produzänt vo Bier; wo i anderne Stedt d Bierfabrigge zuetoo worde sind, isch das für die Regione und für d Fründ vo däne Biermargge schwirig gsi.

Fäldschlössli het vor allem i dr Dütschschwiiz überall ganz vil Restaurant exklusiv beliferet und deils au grad übernoo. Di unzäälige belüchtete Wirtshuusdafele mit em Signet vo dr Rhyfälder Fabrigg sind eigentlech eso öpis wien es visuels Kulturguet im öfentleche Ruum vo dr Schwiiz.

S Fäldschlössli het sech au a Fabrigge, wo Mineralkwelle i dr Schwiiz vermarktet, beteiliget, öpe a däne vo Eglisau, Elm, Ifferte und Passugg.

Lueg au

Bièrguttèrè

Weblink

Commons: Feldschlössli – Sammlig vo Multimediadateie

Website vo dr Feldschlösschen Getränke AG
Andreas Steigmeier: Feldschlösschen. In: Historisches Lexikon vo dr Schwiiz.
Die «Schlossherren» von Rheinfelden: 140 Jahre Feldschlösschen Dossier uf srf.ch vom 15. Februar 2016