Drey-Verlag

Dr Drey-Verlag isch e Verlag mit Sitz z Guede, wu vor allem regionali Literatur uusegit.

dr VerlagBearbeite

Grindet woren isch dr Drey-Verlag anne 1995[1] vum Wendelinus Wurth, em Markus Manfred Jung und em Franz Handschuh. Aaloss isch gsii, ass dr Waldkircher Verlag, wu dr Jung syni Biecher bishär vereffetligt ghaa het, vun em verlangt het, ass er d Druckcheschte vorschießt, wel s Buech chennt mer jo „nume maximal 200-mol verchaufe“. Dr het si dr Jung dänkt, no chaan er s au grad sälber mache un het mit em Wurth un em Handschuh dr Drey-Verlag grindet. Dr Jung un dr Wurth hän si as Sportstudänte z Fryburg chänneglehrt un au zäme bi dr ehmolige Kulturzytschrift „Deyflsgiger“ mitgmacht ghaa.

S „Drey“ im Name vum Verlag stoht fir di drei Grinder, fir s Dreyeckland un – wel s au fir s Maßwärch vun eme gotische Minschterfänschter stoht – fir s Brogramm vum Verlag: Biecher us dr Region zwische dr Minschter Basel, Konschtanz un Stroßburi. D Ufgabe daile si die drei eso: Dr Wurth isch dr Verleger, dr Jung isch zueständig fir s Lektorat un dr Handschuh isch Grafiker.

Mer lait Wärt uf e hochi Qualitet: D Biecher sin im Hardcover mit Fadebindig uf hochwärtigem Druckbabyr. D Lyrikbänd sin handgsetzt, doderfir het dr Wurth äxtra s Schriftsetze glehrt ghaa.

Gäld verdiene dien si mit däm Verlag nit, s isch e chlaine Liebhaberverlag. D Autor*ne sin, mit wenige Uusnahme wie dr José F. A. Oliver, kaini, wu mer usserhalb vu dr Region chännt, d Uflage sin zmaischt im drei-, sälte mol au im vierstellge Beraich. D Autor*ne dien in dr Regle au ne Dail vu dr Uflag zum Vorzugsbrys ibernee un derno sälber verchaufe.

Fir sy Brogramm het dr Drey-Verlag am 18. Jänner 2007 z Charlsrueh dr Landespreis für literarisch ambitionierte Kleinverlage vum Land Bade-Wirttebärg iiberchuu, wu mit 12.500 € dotiert gsii isch.

s BuechbrogrammBearbeite

S Brogramm bstoht us regionaler Literatur, Lyrik un Dieläkt vu Autor*ne us dr Region Ober- un Hochrhyy. Dr Drey-Verlag isch ain vu dr wenige Verlag z Bade-Wirttebärg, wu iberhaupt no Dieläktliteratur uusegit.

S erscht Buech, wu im Drey-Verlag uusechuu isch, isch anne 1995 „E himmlische Unterhaltig“ vum Jung gsii, wu si im Ibrige derno iber 1000 mol verchauft het. Anderi Biecher vum Jung sin „Zämme läse“ (1999), „verruckt kommod“ (2001), „am gääche rank“ (2004), „verfranslet diini flügel“ (2008), „gopaloni“ (2012), „Schluchten von Licht“ (2015), „Angekommen in Laufenburg“ (2020), „Wenn i e Rebschtock wär“ (2020) un „Vom Glück des Findens“ (2022).

Biecher vum Wurth sin syni alemannisch Ibersetzig vu „Abenteuer vom Huckleberry Finn“ vum Mark Twain (1997) un d Gedichtbänd „Erberzopfe forever“ (2004) un „Kreis kreißt kreis us kreis“ (2010).

Derzue hän au verschideni anderi alemannischi Autor*ne us dr Region Biecher im Drey-Verlag vereffetligt, unter anderem dr Hanspeter Wieland („Bappele hinterefier“ 1995, „Schineggler“ 1999, „Omma häckerlet de Gaate“ 2001), d Esther Strube („Täik it iisi. Us em Faadezainli” 1997), dr Thomas Burth („Immer der, wo fròget“ 1999), d Ulrike Ebert („Im Handchehrum“ 2006, „Warnlaute vom Tag“ 2018), dr Stefan Pflaum („Glitzerwelt un Schwangerschafte“ 2006, „Zwischenhimmel“ 2010), d Carola Horstmann („Katzegrabschtai“ 2007, „Däsche us Schnee“ 2011), d Nicole Keilbach-Schmittel „de schöfliwulken en schupf“ 2012), d Ulrike Derndinger („Weckli, Deckli, Schleckli“ 2016) un d Sandhya Hasswani („Chind un andri Ploge wo glücklich mache“ 2021).

Dr José F. A. Oliver het anne 1997 s Buech „Duende“ im Drey-Verlag vereffetligt, e Lyrikband in drei Sproche: Dytsch, Alemannisch un Spanisch-Andalusisch.

Au verschideni Antologie sin im Drey-Verlag uusechuu, unter anderem „Weleweg selleweg“ (1996) un „I mag di mog di mig di“ (2009).

WeblinkBearbeite

FueßnoteBearbeite

  1. Am 4. Augschte 1995 het dr Wendelinus Wurth s Gwärb aagmäldet.