Bfaarer Sieber

Dr Bfaarer Sieber (* 24. Februar 1927 z Horge as Ernst Sieber; † 19. Mai 2018 z Züri), isch e Schwyzer evangelisch-reformierte Bfaarer, Laiter vu me Sozialwärch, Bolitiker un Buechautor gsii. Mer chännt en in dr ganze Schwyz dur sy Yysatz fir Obdachlosi, Drogesichtigi un Aidschranki.

dr Ernst Sieber (2007)

Lääbe

Dr Ernst Sieber isch e Suhn vum Eläktromechaniker Hans Sieber un dr Katharina Josepha Sieber-Hess gsii. Är het aafangs as Buurechnäächt gschafft un isch bis 1947 uf d Buureschuel Strickhof gange. Anne 1950 het er uf em zweete Bidligswääg d Matura gmacht. Är het Teology studiert un isch 1956 zum Bfaarer ordiniert wore. 1956 bis 1967 het er as Bfaarer z Uitikon-Waldegg amtiert. Vu 1967 bis zue syre Pänsionierig 1992 isch er Bfaarer z Züri-Altstette gsii. Vu 1988 bis 1992 isch er Dekan vu Züri gsii. 1991 bis 1995 isch er fir di Evangelisch Volksbartei im Nationalroot ghockt. Dr Sieber isch mit dr Sängeri Sonja Sieber-Vassalli ghyrote gsii un het vier aigeni, ai adoptiert un drei Bfläägchinder ghaa.

Sozial Wiirke

Im iberdurschnittli chalte Winter vu 1963 (lueg Seegfrörni) isch mer uf dr Sieber ufmerksam wore, wun er z Züri im e alte Bunker e Unterchumft fir Obdachlosi yygrichtet het. Dodrus isch e sälbschtverwalteti Gmainschaft vu Obdachlose wore, wu 1975 in e Huus zoge isch, wu hite d Wohn- un Arbetsgmainschaft Suneboge mit 35 Bett un 20 gschitzte Arbetsblätz drus wore isch.

Ändi 1980er-Johr het er aagfange no dr Drogesichtige uf em Platzspitz z luege. S sin Aalaufstelle, Notschlofstelle, e Aids-Hoschpiz un Rehabilitationsyyrichtige entstande, wu schließlig in dr Stiftung Sozialwerke Pfarrer Sieber zämegfasst wore sin, wu är glaitet het.

D Sozialwärch sin aber eso groß wore, ass em Sieber di adminischtrative Ufgabe iber dr Chopf gwachse sin. In dr zwoote Helfti vu dr 1990er-Johr hän d Sozialwärch massivi Liquiditetsprobläm ghaa. No ne baar Umstrukturierige, wu unter anderem dr Sieber vu dr Laitig zruckdrätte isch un e Dail Wärch uusglideret wore sin, isch d Stiftig hit finanziäll saniert.

Dr Bfaarer Sieber het bis zue sym Dod wytergschafft. Ais vu syne Brojäkt isch zem Byschpel dr Pfuusbus, en alte Sattelschlepper, wu im Winter zwelf Schlofblätz fir Obdachlosi bietet.

Ehrige

• 1987 het em di Teologisch Fakultet vu dr Universitet Züri d Ehredokterwird gee.
• 2013 isch er vum Zürcher Stadtrot fir sy groß gsellschaftli Engaschmänt mit em Staatssiegel vu Züri gehrt wore.
• 2017 isch dr Sieber dr «Lifetime Award» vum Prix Courage verlihe wore, wu äxtra fir ihn gschaffe wore isch.

Publikatione (Uuswahl)

• Platzspitz, Spitze des Eisbergs: Jugend- und Erwachsenenprobleme unserer Zeit: Begegnungen, Begebenheiten und eine Vision für die Zukunft. Zytglogge, Gümligen 1991, ISBN 3-7296-0373-6.
• Menschenware – wahre Menschen: Vom Bunker zum Suneboge. Die Familiengeschichte der Obdachlosen. Zytglogge, Gümligen 1987, ISBN 3-7296-0249-7.
• Licht im Tunnel: Unterwegs von Assisi nach Zürich. Zytglogge, Gümligen 1998, ISBN 3-729-60541-0.

Literatur

• Marianne Härri: Ernst Sieber (Pfarrer) In: Historisches Lexikon vo dr Schwiiz.
• Daniel J. Schütz: Der Pfarrer: Begegnungen mit Ernst Sieber. Zytglogge, Oberhofen 2008, ISBN 978-3-7296-0753-8.
• Samuel Geiser, Tilmann Zuber: Pfarrer Ernst Sieber im Gespräch: «Deshalb wehre ich mich!» Presseberichte. In: Zürcher Kirchenbote. Archiviert vom Original am 4. Juli 1998; abgruefen am 20. Mai 2018. 
• Sandra Hohendahl-Tesch: «Ich habe doch gar keine Zeit, ans Alter zu denken» (Site cha nüme abgrüeft wärde; Suche im Webarchiv)[1] [2] Vorlage:Toter Link/reformiert.info Ardikel uf reformiert. vom 24. Februar 2017.
• Urs Bühler: Zum Tod von Pfarrer Ernst Sieber: Er war ein Gottesmann der Tat. Ardikel i dr Zürizytig vum 20. Mai 2018.

Dokumentatione

• Marcel Zwingli: Bhüet di Gott DVD vo artfilm.ch vo 2007 (schwizertütsch, mit Undertitel uf Dütsch, Französisch und Englisch)
• Patrick Rohr: Der gute Mensch von Zürich: Pfarrer Ernst Sieber, SF-Sändig «Quer» vom 23. Februar 2007 (26 Minute, cha nümm im Netz abgruefe wärde)
• Roger Schawinski: Roger Schawinski im Gespräch mit Ernst Sieber SRF-Sändig «Schawinski» vom 10. Dezember 2012 (27 Minute)
• Hanspeter Bäni: Der Showman von Gottes Gnaden SRF-Sändig «Reporter» vom 30. Dezember 2012 (22 Minute)

Weblink

• Stiftung Sozialwerke Pfarrer Ernst Sieber