Herta Däubler-Gmelin

Dialäkt: Undermarkgreflerisch

D Herta Däubler-Gmelin (* 12. Augschte 1943 z Preßburg, Slowakei, as Hertha Gmelin) isch e dytschi Jurischti un Bolitikeri (SPD). Si isch vu 1998 bis 2002 Bundesminischteri vu dr Juschtiz gsii un het vu 1972 bis 2009 em Dytsche Bundesdag aaghert.

d Däubler-Gmelin 1988

Lääben un Beruf

D Herta Däubler-Gmelin isch e Dochter vum friejere Diplomat un Dibenger Oberburgermaischter Hans Gmelin. Syter 1969 isch si mit em Arbetsrächtler Wolfgang Däubler ghyrote. S hän zwai Chinder.

Noch em Abitur z Dibenga het d Herta Däubler-Gmelin z Dibenga un z Berlin Gschicht, Rächtswisseschaft un Bolitikwisseschafte studiert. Noch dr juristische Staatsexamina (1969 un 1974) un ere arbetsrächtlige Promotion (1975) zum Thema Bildungsurlaub für Arbeitnehmer: ein Weg zur Verwirklichung des Grundrechts auf Bildung? an dr Universitet Bremen, wu ihre Mann scho syt 1971 as Hochschuellehrer fir Arbetsrächt fungiert ghaa het, het si as Rächtsaawälti gschafft, zerscht z Stuegert, derno z Berlin. Anne 1995 isch si Honorar-Brofässeri mit eme Lehrufdrag am Otto-Suhr-Inschtitut vu dr Freie Universitet Berlin wore. Syt Oktober 2011 isch si Gaschtbrofässeri am Lehrstuel fir Sischtematischi Theology vu dr RWTH Aachen.

Bartei

D Däubler-Gmelin isch zyter anne 1965 Mitglid vu dr SPD, wu si vu 1988 bis 1997 Stellverdrättendi Bundesvorsitzeri gsii isch. Si isch derzue au Schirmherri vum „Virtuelle Ortsverein“ (VOV).

Abgordneti

Vu 1972 bis 2009 isch si Mitglid vum Dytsche Bundesdag gsii, wu si vu 1980 bis 1983 Vorsitzeri vum Rächtsuusschuss gsii isch. Vu 1983 bis 1993 stellverdrättendi Vorsitzeri vu dr SPD-Bundesdagsfraktion gsii un vu 1994 bis 1998 Sprächeri vu dr Arbetsgruppe Rechtspolitik un Juschtiziari vu dr SPD-Fraktion.

Vorsitzeri vum Uusschuss fir Verbruucherschutz, Ernehrig un Landwirtschaft isch si vu 2002 bis 2005 gsii, vu 2005 bis 2009 Vorsitzeri vum Uusschuss fir Mänscherächt un humaniteeri Hilf un vu 2008 bis 2009 Vorsitzeri vum Rächtsuusschuss vu dr Barlemäntarische Versammlig im Europarot.

D Herta Däubler-Gmelin isch anne 1998 as diräkt gwehlti Abgordneti vum Wahlkrais Dibenga un sunscht alliwyl iber d Landeslischt Bade-Wirttebärg in Bundesdag yyzoge.

Anne 2008 het d Däubler-Gmelin verchindet, ass si 2009 nimi fir dr Bundesdag wett kandiere, dodermit isch si mit Ablauf vu dr 16. Wahlperiod vum Dytsche Bundesdag am 27. Oktober 2009 us em Barlemänt uusgschide.

Effetligi Ämter

Ihri Kandidatur fir s Amt vu dr Vizebresidänti vum Bundesverfassigsgricht, wu uf heftige Widerstand vor allem vu dr CDU/CSU gstoßen isch, het si Ändi 1993 no barteibolitische Ussenandersetzige zrugzoge.

Am 27. Oktober 1998 isch si as Bundesminischteri vu dr Juschtiz in di vum domolige Bundeschanzler Gerhard Schröder gfiert Bundesregierig gruefe wore. In ihre Amtszyt het si si fir e grundlegendi Novellierig vum Burgerlige Gsetzbuech im Schuldrächt yygsetzt, wu schließli am 1. Jänner 2002 in Chraft drätten isch. Bi dr Neifassig vum Schuldrächt handlet s si um aini vu dr greschte Reforme vum BGB syt des in Chraft drätten sich am 1. Jänner 1900. Si het si au fir s Lääbespartnerschaftsgsetz yygsetzt, wu anne 2001 in Chraft drätten isch.

Ass d Däubler-Gmelin gärn zuegspitzt formuliert het, het er er dr Spitzname „Schwertgosch“ yybrocht. Wu sim Wahlkampf gsait heb, dr amerikanisch Bresidänt Bush diei mit syre Ussebolitik vu innebolitische Brobläm ablänke, un des diei mer scho „seit Adolf Nazi“ chänne, isch d Däubler-Gmelin no dr Bundesdagswahl 2002 un dr aigene Aachindigung, ass si kai Minischteramt me wett, bi dr Regierigsbildig nimi vorgsääne wore un am 22. Oktober 2002 us dr Bundesregierig uusgschide.

Akademischi Lehr

As Honorarbrofässeri het d Däubler-Gmelin e Lehrufdrag am Otto-Suhr-Inschtitut vu dr Freie Universitet Berlin. Si laitet dert vor allem Veraastaltige in ihre Inträssebiet Internationali Beziehige un Mänscherächt. Sii het au Hauptseminar zue dr Theme Transitional Justice, Responsibility to Protect un Sidafrika ghalte.

Im Wintersemeschter 2011/2012 het d Herta Däubler-Gmelin d Hemmerle-Broffässur vum Inschtitut fir kadolischi Theology an dr RWTH Aachen ghaa.

Sunschtigs

Anne 1989 het si zäme mit em Peter Becker di dytsch Sektion vu dr International Association of Lawyers against Nuclear Arms (IALANA) grindet.

Im SWR-Tatort Bienzle und der heimliche Zeuge vu 2001 het d Herta Däubler-Gmelin en Gaschtufdritt, wu si si sälber as Juschtizminischteri siilt. E Gaschtroll as Chorlaiteri het si scho 1992 in Ein Mann für jede Tonart gspiilt.

D Däubler-Gmelin isch Schirmherri vum Dytsche Hoschpiz- un Palliativverband.

Zäme mit em Leipziger Staats- un Verwaltigsrächtler Christoph Degenhart het si in ere Prässekumferänz vu dr Organisation „Mehr Demokratie“, wu si Kuratoriumsmitglid isch, – Mitti April 2012 d Verdrättig vun ere Bindnischlag vor em Verfassigsgricht fir dr Fall aa, ass es kai Referändum iber dr Europäisch Stabilitätsmechanismus (ESM) un dr Europäisch Fiskalpakt fir e satteri Huushaltsdisziplin in 25 vu dr 27 EU-Staate git. Am 29. Juni isch vum Bindnis „Europa braucht mehr Demokratie“ ihri gmainsam mit em Degenhart gschribe Chlagschrift yygee wore.

Zuesätzli engaschiert si si fir di dytsch un europäisch Jurischteniusbildig un Velkerverständigung im Byrot vu ELSA-Deutschland e. V.

Syt em 24. Oktober 2014 isch si Ehrebresidänti vum Bundesverband ehrenamtlicher Richterinnen und Richter e. V.

Uuszaichnige

• 1990: Wilhelm-Dröscher-Bryys
• 2014: Heckerhuet

Weblink

 Commons: Herta Däubler-Gmelin – Sammlig vo Multimediadateie

• Herta Däubler-Gmelin in dr Internet Movie Database
• Biographie beim Deutschen Bundestag

Fueßnote

Dä Artikel basiert uff ere fräie Übersetzig vu dere Version vum Artikel „Herta_Däubler-Gmelin“ vu de dütsche Wikipedia. E Liste vu de Autore un Versione isch do z finde.