Johann Jakob Im Hof

Dialäkt: Baseldütsch

Dr Johann Jakob Im Hof, vilmol au Johann Jakob Im Hof-Forcart, (* 6. Merz 1815 z Baasel; † 7. Juni 1900 z Baasel) isch e Baasler Kaufmaa, Politiker und Kunstmezeen gsi.

Dr Johann Jakob Im Hof

Lääbe und Wärk

Dr Johann Jakob Im Hof isch dr Soon vom Richder und Gärbereibsitzer Johann Jakob Im Hof (1786–1848) und däm sinere erste Frau, Margaretha Steiger (1788–1817) gsi. Dr Vater het welle, ass er Kaufmaa leehri und so het er e kaufmännischi Usbildig gmacht, het sich aber au sine wirklige Inträsse dörfe widme, dr Technik und dr Kunst.

So het dr Im Hof bim Achilles Benz si erste Underricht im Zäichne überchoo. Spööter isch er für e Zitli dr Schüeler vom Hieronymus Hess gsi, und sächzig Joor spööter het er vo däm e Biografii uusegee. Won er z Losann uf d Schuel gange isch, isch er e Schüeler vom Jean-Pierre Naef gsi.

As Kaufmaa het sich dr Im Hof 1836/1837 z Bariis ufghalte und het sich seer für s Milidäär afo intressiere. Er het bim Johann Georg Heck topografischs Zäichne gleert, vor allem mit eme Blick druf, wie s für s Milidäär relewant isch, und er isch vil in s Musée de l’Armée gange. Wo s im Dezämber 1836 en Attentat uf e Köönig Louis-Philippe I. gee het, häi si dr Im Hof für e Zitli as Verdäächdige festgnoo.

Zrugg z Baasel het er, was er uf em kaufmännische, em politische und em milidäärische Gebiet gleert het, guet chönne bruuche. 1843 isch dr Im Hof Mitgliid vom Stadtbolizeigricht und vom Zivil- und Appellazioonsgricht worde. Wo z Baasel 1865/1866 e Tüfusepidemii usbroche isch, het dr Im Hof as Vorsteher vom Gsundhäitsdepartemänt dr Kampf gege d Chranket organisiert. As freisinnige, liberaale Politiker isch er 1858 bis 1866 in dr Chläi Root gweelt worde. As Major im äidgenössische Generaalstaab und as Inhaaber vom ene äigene Gärbereibetriib het dr Im Hof hoochs Aasee gnosse. D Gärberzumft het en 1853 in dr Zumftvorstand gweelt, und vo 1869 bis 1881 isch er Zumftmäister gsi.

1842 isch dr Im Hof dr nöi gründete Baasler Künstlergsellschaft (BKG) biidrätte und het für die neggste 26 Joor s Bresidium übernoo, und das au noch dr Fusioon mit em Baasler KUnstveräin 1864 bhalte. Er het sich 1854 drfür iigsetzt, ass zum en äignigs «Künstlerhuus» z finanziere, d Baasler Fäärigsellschaft gründet wurd, was dr spööter Bau vo dr Kunsthalle Baasel mööglig gmacht het.

Es isch vor allem im Im Hof sim Iisatz z verdanke, ass s Joggeli Dänggmol und s Hebel-Dänggmol verwirkligt worde si. Dr Im Hof isch mit vile Künstler us sinere Zit Fründ gsi, u. a. mit em Rudolf Koller, em Arnold Böcklin, em Richard Kissling und vor allem mit em Ferdinand Schlöth, wo 1880 e Bortretbüste von em gmacht het.

1872 isch er mit sinere Dochder und zwäi Archidekte über Mailand, Florenz, Pisa, Siena, Rom, Neapel uf Capri gräist. In Rom het er sich mit e Hufe Künstler droffe, u. a. mit em Ernst Stückelberg, em August Weckesser und em Anselm Feuerbach. Er isch immer wider emol uf Bariis und het au dört mit Künstler Kontakt ufgnoo.

Dr Im Hof isch drissig Joor lang mit dr Maria Forcart (1819–1871) verhürootet gsi. Zsämme häi si meereri Chinder gha, wo zum Däil no chli gstorbe si. Spööter het er d Witwe Amalia Rüsch, gebooreni Jakob (1831–1911) ghürootet. Vo 1864 aa het er im Baasler Stadtbalä zem Kirschgarte gwoont.

Publikazioone

• Der Historienmaler Hieronymus Hess von Basel – Geschichte seines Lebens und Verzeichnis seiner Werke. Baasel 1887 (Digitalisat vo dr Baadische Landesbibliotheek).

Literatur

• Jakob Probst: Ratsherr J. J. Im Hof 1815–1900. In: Basler Stadtbuch. 1902, S. 24–44.
• Paul Koelner: Vier Briefe Arnold Böcklins an einen Basler. In: Basler Stadtbuch. 1908, S. 106–112.

Weblingg

• Johann Jakob Im Hof im Staatsarchiv Basel-Stadt
• Stammbaum vom J. J. Im Hof in Stroux.org

Fuessnoote

Dä Artikel basiert uff ere fräie Übersetzig vum Artikel „Johann_Jakob_Im_Hof“ vu de dütsche Wikipedia. E Liste vu de Autore un Versione isch do z finde.