Hauptmenü ufmache
Dialäkt: Schwäbisch

Dr Johann Jakob Weinmar (* 24. Mai 1751 z Bondorf[1], wo-nr am 23. Juni 1822 au gschdorba ischt) ischt a bedeidender deitscher Orglbauer gwäa.

Inhaltsverzeichnis

Aus seim LeabaBearbeite

Dr Johann Jakob Weinmar – manchmôl isch dr Familianama au „Weimar“ oder „Weimer“ gschriiba wôrra – ischt am 24. Mai 1751 z Bondorf bei Herraberg uff d Welt komma. Scho sei Vadder Johannes Weinmar ischt a bedeidender Orglbauer gwäa, wo em Jôhr 1752 en Bondorf a oigena Werkstatt zom Bau vo Kircha-Orgla grendet ghet hôt. Bei sellem hôt dr Johann Jakob des gleiche Handwerk glernt ond hendrher en dr Firma vo seim Vadder mitgschafft. Wia nô dr alde Weinmar em Sebdember 1795 s Zeitliche gsegnet ghet hôt, hôt dr Johann Jakob s Gschäft vo seim Vadder ibrnomma ond em sella sein Baustil weidergfihrt. Wia-nr 30 Jôhr alt gwäa ischt, hôt’r d Bondorfere Maria Barbara Müller gheiradet. Dui hôt em Lauf dr Zeit fenf Kender uff d Welt brôcht. Vo deane send zwoi Buaba au Orglmacher wôrda.

Em Jôhr 1815 isch Bondorf vo-ma vorheerenda Fuier hoimgsuacht wôrra. Rond 40 Heiser send bis uff d Grondmaura abebrennt. Ob dô drvoo au d Weinmarsche Orglbau-Werkstatt en Mitleidaschaft zoga wôrra ischt, ischt et bekannt. Mr woiß abr, dass des Ondrnehma en dr erschda Hälfde vom 19. Jôhrhondert mit grauße wirtschaftliche Schwirigkeida zo kempfa ghet hôt.

Am 23. Juni 1822 hôt dr Johann Jakob Weinmar en seim Hoimatort em Alder vo 71 Jôhr d Auga fir emmer gschlossa.

A Auswahl vo de Orgla, wo-nr gmachet hôt firBearbeite

  • d Peterskirch en Gültstein[2] (1786)
  • de Evangelisch Kirch en Greambach em Schwarzwald (1787)
  • d Mariakirch z Effrenga[3] (1789)
  • de Evangelisch Stadtkirch en Neiabirg (1790)
  • de Evangelisch Pfarrkirch St. Juliana z Kleinaspach (1791)
  • d Martinskirch en Großbottwar (1791)
  • de Evangelisch Kirch vo Dachtel[4] (1802)
  • de Evangelisch Stadtkirch en Aldasteig (1805)

NôchwirkongaBearbeite

Em Johann Jakob Weinmar seine Buaba Johann Jacob (* 21. Auguscht 1782, † 31. Auguscht 1858) ond Johannes Weinmar (* 21. Dezember 1785, † so oms Jôhr 1831 rom) send au Orglmacher wôrra. Aus wirtschaftliche Grend hend-se em April 1831 ihr Hoimet vorlassa ond send nôch Nordamerika ausgwandret. Heit exischdiirt d Orglbau-Werkstatt Weinmar nemme; abr dr Familianama „Weimer“ ischt z Bondorf emmer noh weit vrbroidet.

QuellaBearbeite

WeblinkBearbeite

FuaßnodaBearbeite

  1. Dui Gmoind leit em heidiga Landkreis Beblenga
  2. Heit a Stadtdoil vo Herrenberg
  3. Heit a Stadtdoil vo Wildberg (Schwarzwald)
  4. Heit a Ortsdoil vo Aidlenga