Johannes Weinmar

Dialäkt: Schwäbisch

Dr Johannes Weinmar (* 18. Merz 1715 z Bondorf^[1], wo-nr am 9. Sebdember 1795 au gschdorba ischt) ischt a bedeidender deitscher Orglbauer gwäa.

Aus seim Leaba

Dr Johannes Weinmar – manchmôl isch der Familianama au „Weimar“ odr „Weimer“ gschriiba wôrra – ischt am 18. Merz 1715 z Bondorf bei Herraberg uff d Welt komma. Sei Vadder Jakob Weinmar isch en deam Ort dr Wirt vom Gaschthaus «Traube» gwäa^[2]. Ibr sei Kendheit ond Jugend isch nix bekannt. Mr woiß et amôl, wo-nr sei Handwerk als Orglbauer glernt hôt. A baar Ôzeiche vo seim Schaffa deidet abr druff nôô, dass meglicherweise oiner vo dr Orglbauer-Familie Schmahl en Heilbronn sei Lehrmoischtr gwäa ischt.

Em Jôhr 1749 hôt dr Johannes Weinmar d Maria Katharina Weimar – a weitlaifiga Vorwanda us Bondorf – zom Traualdar gfihrt. Dô drnôch hôt’r en seim Hoimetort a Werkstatt firs Orglbaua grendet. En dr Zeit vo 1752 bis 1780 hôt der Môô a ganz beachtlicha Ôzahl vo Kirchaorgla gschaffa. Sei Frau hôt em Lauf dr Zeit sechs Kendr uff d Welt brôcht. Sei zwoideldeschder Soh Johann Jakob Weinmar (1751 bis 1822) ischt au Orglbauer wôrra ond hôt em Ondrnehma vo seim Vadder mitgschafft.

Am 9. Sebdember 1795 hôt dr Johannes Weinmar en seim Hoimatort em Alder vo 80 Jôhr d Auga fir emmer gschlossa. Dô drnôch hôt sei Soh Johann Jakob dui vom Vadder grendada Firma weidergfihrt.

A Auswahl vo de Orgla, wo-nr gmachet hôt fir

Dr kunschtvolle Orglproschbekt vom Johannes Weinmar en dr Amanduskirch z Beihenga

d Remigius-Kirch en Bondorf (1763/64)
d Amandus-Kirch en Beienga^[3] (1764/66)
de Evangelisch Stadtkirch en Aldasteig (1772/73)
de Evangelisch Kirch vo Wildberg em Schwarzwald (1773)
d Pelagius-Kirch z Nufrenga (1776)
de Evangelisch Stadtkirch vo Neiabirg (1776)
de Evangelisch Kirch vo Dailfenga bei Herraberg^[4] (1776/77)
d Luther-Kirch vo Fellbach (zamma mit seim Soh Johann Jakob, 1780)
d Nikomedes-Kirch en Hildrizhausa (1781)
d Nikolaus-Kirch z Mundelsheim (1784)

Quella

Burkhard Goethe, Stephen Blaich: Die Orgelbauerfamilie Weinmar (Weimar) in Bondorf, an Uffsatz en de Württembergische Blätter für Kirchenmusik, Heft 6/2015, S. 6 bis 16
Lueg d Weblink

Weblink

Ibr da Johannes Weinmar uff dr Webseit vom Verein für Computergenealogie

Fuaßnoda

↑ Dui Gmoind leit em heidiga Landkreis Beblenga
↑ Nôch-ra andra Quell (Weblink) ischt’r Richter gwäa
↑ Heit a Stadtdoil vo Freiberg am Neckar
↑ Dailfenga ischt heit a Ortsdoil vo Gaifelda

[1] Dui Gmoind leit em heidiga Landkreis Beblenga

[2] Nôch-ra andra Quell (Weblink) ischt’r Richter gwäa

[3] Heit a Stadtdoil vo Freiberg am Neckar

[4] Dailfenga ischt heit a Ortsdoil vo Gaifelda

[1]

[2]

[3]

[4]