Magnus Kaiser

Dr Magnus Kaiser (* 1964 z Waldshuet) isch e dytsche Physiker un Badäntaawalt. Mer chännt en z Siidbade as Folk- un Bluessänger, unter anderem zäme mit sym eltere Brueder Johannes im Duo Kaiser & Kaiser.

Lääbe

Dr Kaiser isch z Birdef im Hotzewald un z Steine im Wisedal ufgwachse. Är isch z Schopfe uf d Schuel gange. Noch em Abitur het er bis 1990 Universitet Fryburg Fysik studiert.

Vu 1989 bis 1992 het er z Fryburg as Wisseschaftlige Mitarbaiter am Fraunhofer-Institut für solare Energiesysteme gschafft. Syni Schäärpinkt deert sin Halblaitertächnology, Feschtkeerperfysik, Optik, Mässtächnik, Verfaarestächnik, Leisertächnik, Oberflechetächnik un Elektroonik gsii.

Syter anne 1992 schafft er im gwäärblige Räächtschutz un het nääbehäär Badäntaawalt gleert. S Batäntassessorexaame het er anne 1995 gmacht un isch anne 1996 z Dytschland un bim Europäische Maarkeamt as Badäntaawalt zuegloo woore un 1997 derno bim Europäische Badäntamt. Syter 2000 schafft er as Badäntaawalt bi dr dr Chanzlei „Lemcke, Brommer & Partner“ z Chaarlsrue.

In syre Freizyt macht er Musik im Beryych Blues, Folk un Rock, är spiilt Gitarre un duet singe. Är het in verschiidene Band gspiilt (z. B. Influence, Soulutions) un isch au scho as Gaschtmusiker mit verschiidene regionaale Band ufdrätte, zem Byschpel mit dr Fryburger Blues Association (FBA). Mit unterschiidlige Musiker dritt er unter em Name „Magnus Kaiser Band“ uf.

Mit sym Brueder Johannes isch er langi Joor as Duo Kaiser & Kaiser ufdrätte. Si hän Blues- un Folklieder uf Alemannisch gsunge. Anne 1984 het dr Magnus Kaiser bim Wettbewärb Jungi Mundart 84 vu dr Muettersproch-Gsellschaft mitgmacht. Gedicht vun em uf Alemannisch sin unter anderem in dr Anthologie D Hailiecher un weleweg selleweg uusechuu.

Wäärch

• Gedichte. In: D Hailiecher, Alemannische Anthologie Junge Mundart. Hrsg. Markus Manfred Jung/Muettersproch-Gsellschaft, Morstadt Verlag, Kehl 1987
• Im graue Morge - Folk & Blues uf alemannisch. 14 Lieder von Kaiser & Kaiser, zusammen mit Magnus Kaiser. Audiocassette, Selbstverlag 1990
• Gedichte. In: weleweg selleweg. Eine Anthologie mit Texten von 33 zeitgenössischen Mundartautoren aus Baden. Hrsg. für die Muettersproch-Gsellschaft. Redaktion: Markus Manfred Jung, Hanspeter Wieland, Wendelinus Wurth. Drey-Verlag, Gutach 1996. ISBN 3-9804636-2-1
• Gedichte. In: Jung/Wieland/Wurth: I mag di mog di mig di. Alemannische Liebesgedichte. Drey Verlag Gutach 2009

Websyte

• dr Magnus Kaiser bi Lemcke, Brommer & Partner
• Täxtprobe uf dr Websyte vu dr Muetersproch-Gsellschaft
• dr Magnus Kaiser mit dr FBA, ZMF Fryburg, 2015 (uf youtube.com)
• dr Magnus Kaiser mit dr FBA, ZMF Fryburg, 2013 (uf youtube.com)