Sina

Sina (* 28. Mai 1966 z Visp; bürgerlig Ursula Bellwald) isch e Schwizer Mundart-Popsängere us Gampel im Kanton Wallis.

D Sina uf em Zermatt Unplugged 2011

Karriere

1983 het si dr erst Blatz bim Oberwalliser Schlagerfestiwal mit em Song «The House of the Rising Sun» überchoo. Denn isch si bi Konzärt in dr Schwiz und im Usland ufdräte und het Hauptrolle in de Miusicl «Annie Get Your Gun» und «Jesus Christ Superstar» gspiilt. In dere Zit het si z Züüri Muusigunderricht gnoo in klassischer Muusig, Dschääs und Rock.

1990 het si dütschi Schlaager under em Psöidonüüm SINA CAMPELL gsunge. Vo 1993 bis 1996 isch si Radiomoderatorin bim DRS gsi. 1994 isch iir ersts Mundartalbum «Sina» erschiine, wo 23 Wuche in de Schwizer Tscharts bliibe isch und mit Gold und Platin uszäichnet worde isch.

1995 isch iir zwäits Album «Wiiblich» e Wuche lang uf em erste Blatz in dr Schwiz gstande und im Ganze 12 Wuche in de Schwizer Tschharts bliibe. Si het Gold und Platin überchoo. Uf dr Wiiblich-Tuur isch si bi öbbe 70 Konzärt ufdräte. Iire erst Prix Walo het d Sina 1996 as «erfolgriichsti Sängere in dr Sparte Pop im Joor 1995» überchoo.

1997 isch au s Album «Häx odär heilig» erfolgriich gsi und druf het d Sina en äijöörigi Schwizer Durnee gmacht. Au iir vierts Schwizer Album, «4», het s 1999 in d Schwizer Top-Ten gschafft und Gold überchoo. Drud het si e Schwizer Durnee mit 80 Konzärt gmacht. Im gliiche Joor het si d Duet «Där Papa isch äs Chorbi gsi» und «Wenn es nötig wär» mit em Polo Hofer ufgnoo.

2000 het si mit dr «Alpine Experience» Dschääs gmacht. D Sina het am Schauspiilhuus Bochum im Stück «Helges Leben» vo dr Sibylle Berg d Rolle vo dr «Frau Tod» gha, wo d Erika Stucky «Frau Gott» gspiilt het. 2001 isch d Sina mit em Prix Walo 2000 in dr Sparte Singer/Songwriter uszäichnet worde. D CD «Marzipan» isch in däm Joor diräkt uf em zwäite Blatz in de CH-Tscharts iigstiige und isch mit Gold uszäichnet worde. Vom August bis zum Dezämber het si 40 Konzärt gee.

2002 het si für d Expo z Biel komponiert und het bi dr Eröffnigsfiir d Rolle vo dr schwarze Panthere gspiilt. Denn isch d CD «Bescht of Sina» uusechoo und druf het si Konzärt in dr Schwiz gee und isch im Septämber 2002 z China ufdräte. Bi de Davoser Muusiddääg het si mit ere rumänische Romabänd musiziert.

Im Joor druf si die verdoonte Super-8-Film «Toluheischis Vorläbu» erschiine. Druf isch si uf Durnee mit dr Erika Stucky und het mit dere d CD «Goldigi Öigä» broduziert. 2004 si die bäide mit «Toluheischis Vorläbu» wider uf Durnee. In däm Joor het d Sina dr Markus Kühne ghürootet. 2005 isch iir sibta Album, «All:Tag», uusechoo und denn isch si uf ere äijöörige Durnee dur d Schwiz. 2007 het si uf dr CD «Buebetröim» vom Swiss Jazz Orchestra mitgspiilt und isch bi meerere Konzärt vom Swiss Jazz Orchestra and Friends (Büne Huber, Kuno Lauener, Polo Hofer, Freda Goodlett, Philipp Fankhauser, Hendrix Ackle, Schmidi Schmidhauser) drbii gsi.

Iir Gold-Album «In Wolkä fische» isch 2008 erschiine und uf Blatz 2 vo de Schwizer Tscharts choo.

Im Herbst 2010 isch d Sina zämme mit em Michael von der Heide und em Sümfonische Orchester Züüri mit em Brogramm «Songs & Symphonie» uf verschidnige Büüne ufdräte. In däm Joor isch au s Album «Ich schwöru» uusechoo, drei Joor druf «Duette» und 2015 «Tiger & Reh».

Wärk

Album

• 1990: Mein Herz steht in Flammen
• 1994: Sina
• 1995: Wiiblich
• 1997: Häx odär Heilig
• 1997: Sina (Nur Deutschland)
• 1999: Sina 4
• 2001: Marzipan
• 2002: Bescht of Sina
• 2005: All:Tag
• 2008: In Wolkä fische
• 2010: Ich schwöru
• 2013: Duette
• 2015: Tiger & Reh
• 2019: Emma
• 2022: Ziitsammläri

Singgels

• 1997: Immär und ewig
• 1999: Där Papa isch äs Chorbi gsi (zämme mit em Polo Hofer)
• 1999: Nix värbii
• 2001: Propäller
• 2007: Alperose (zämme mit em Polo Hofer, Sandee und Kandlbauer)
• 2008: Wänn nit jetzt wänn dä
• 2008: Hinnär diär
• 2010: Ich schwöru (zämme mit em Büne Huber)
• 2013: Wa du bisch (zämme mit em Marc Sway)

Weblingg

• D Website vo dr Sina
• E Fansite