Hauptmenü ufmache

Es Stadtviertel oder au Stadtkwartier isch en Oortsteil von ere Stadt.

en alte Stadtplan vo Manne mit de Hüüserblöck vo der Innestadt

S Wort chunt vom latynische quartus, was «der Vierti» bedüütet, und vo däm het sech s französische Wort quartier entwicklet, wo als Leenwort is Düütsche cho isch.

d Stadtteil und d Kwartier vo Bärn

Alti Stedt, wo bi der Gründig nach eme geometrische Plan i der Landschaft platziert worde sind, händ i vilne Fäll es zäntraals Stroossechrüüz gha mit Stadttor i vier Himmelsrichtige – so sind zwüschedrin vier ähnlech grossi Teil vo der Stadtflechi entstande. Das planerische Prinzip isch bsunders au bi de röömische Stadtgründige und de römische Milidäärlager der Standard gsi.

I der Nöizyt, wo d Stedt immer wie grösser woorde sind, het men agfange, au den andere Gebiet vo der Stadtsidlig usserhalb vom Zäntrum Viertel oder ebe Kwartier z sääge. Es sind geografischi Einheite innerhalb vo der ganze Stadt, wo sech durs Zämeläbe vo soziale Gruppe, wäge der Gschicht vo der Stadt oder au wäge der Topografy oder der wirtschaftlichen Entwicklig und bsunderen Instituzioonen als abgränzti Oort vonenand underscheide. Us Hüüsergruppen am Stadtrand und vor de alte Stadtmuure sind Stadtkwartier so wie öpe z Basel d Dalbevorstadt woorde. Wenn früener ehemoligi Nochbergmeinde mit der Chärnstadt vo n ere Regioon zämegleit worde sind, so bhalte die Ortschafte mängmol mindeschtens deilwys der eiget Charakter, was d Architektur oder au d Kultur agoot, so wie me’s als Bischpiil bim ehemolige Dorf Höngg z Züri gseht.

Nöi seit me dene Rüüm au eifach Stadtteil und für d Politik und d Verwaltig sind s a teil Oorte d Stadtbezirk. So het d Stadt Fryburg im Brysgau 42 Stadtbezirk, der eerscht dervo isch d Altstadt und die meischten andere sind ehemolige Landgmeinde oder Oortsteil vo settige.

Z Stuttgart het me ane 1956 der alt Stadtteil Stuttgart-Middi ufdeilt in zää nöji Stadtteil. Zmitzt drinn isch s Viertel Obere Schlossgarte, wo’s divärsi öfentlichi und politischi Instituzioone vo Baade-Württebärg het. Dernäbe liged s Spitalviertel, s Gärberviertel, s Öiropaviertel und anderi Kwartier. Die ganzi Stadt Stuttgart het wäge de vile Ygmeindige hüt 152 Stadtviertel.

S Chlooschterviertel vo Sanggalle mit em grosse Chlooschter Sanggallen isch i der ofizielle Ydeilig vo der Stadt nid es eigets Gebiet, sondern e Deil vom Kwartier Altstadt.

Im Gwärbkwartier a der Aaren under der Altstadt z Bärn het men en bekante eigete Lokaldialäkt gredt, s Mattenänglisch.

LiteraturBearbeite

  • Schnur, Olaf (Hrsg.): Quartiersforschung – zwischen Theorie und Praxis. VS-Verlag. Wiesbaden, 2008.