Tatort: Kennwort Fähre

Filmdate
Dütsche Titel	Tatort: Kennwort Fähre
Originaltitel	Tatort: Kennwort Fähre
Produktionsland	Deitschland
Originalsprooch	Deitsch
Erschiinigsjoor	1972
Lengi	102 Minute
Stab
Regie	Theo Mezger
Dräibuech	Wolfgang Menge
Produktion	Reinhard Müller-Freienfels fir da Siddeitscha Rundfunk
Muusig	Jonas C. Haefeli
Kamera	Willy Pankau
Schnitt	Hans Trollst
Bsetzig
	dr Werner Schumacher als Kriminalhauptkommissar Eugen Lutz; dr Siegfried Rauch als Robert Reiser; d Inge Bahr als Edith Reiser; d Ulla Berkéwicz als Hostess Vera Beermann; dr Harry Kalenberg als Pfisterer; d Renate Heilmeyer als Agnes; d Karin Frey als Angelika; dr Frank Strecker als Breilmeier; dr Max Strecker als Hauptkommissar Brauchle; dr Robert Naegele als Staatsôwalt; dr Thomas Reiner als Gschäftsfihrer; dr Wolfgang Bieger als Hartmann; dr Oscar Müller als Pulvermüller; dr Ueli Beck als Bankbeamdr; dr Peter Kner als Oberpolizischt; dr Wolfgang Hepp als em KHK Lutz sei Assischdent Schroth; d Doris Denzel; d Ruth Mönch; d Eva Schocke; d Elfriede Renner; dr Detlev Eckstein; dr Thomas Frey;

Tatort: Kennwort Fähre ischt a deitscher Fernsehfilm us-em Jôhr 1972 vom Reschisseer Theo Mezger, wo am ond uff-em Bodasee schbiilt. S Drehbuech vorfasst hôt dr Wolfgang Menge. Uruffgfihrt wôrra isch der Film am 3. April 1972 em Erschda Programm vo dr ARD. Dô drbei hôt der Stroifa a Eischaltquode vo 64 % ghet.

Dialäkt: Schwäbisch

Handlong ändere

Bei dr nächtlicha Fahrt mit-ra Bodasee-Fähre vo dr Schweiz nôch Deitschland fellt d Edith Reiser iber Bord. Zwar wuud glei a Suechaktioo eigleidet, aber dui bleibt erfolglos. D Tempradur vom Wasser ischt saumäßich kalt. Drom isch-es zemlich oowahrscheinlich, dass dui Frau ibrleaba hôt kenna. D Kriminalbolezei ondrsuacht dean Fall aber trotzdem, om ausschliaßa zo kenna, dass a Vorbrecha vorligt.

Vo dr Vormissda ihrem Môô erfehrt dr Kriminalhauptkommissar (KHK) Lutz, dass er zom frôglicha Zeitponkt z Friedrichshafa bei dr Bootsmesse gwäa wär ond somit a Alibi häb. Neababei kriagt dr Lutz aber au noh mit, dass dui Vormissda a hoha Lebensversicherong abgschlossa ghet hôt ond dass sich dr Robert Reiser gern ond oft em Schbiilkasino uffhalda dät. Dô druff kommet-em Zweifel am Ofalldod vo dr Edith Reiser. Seine Zweifel vorsterket sich, als sich raustellt, dass dr Robert Reiser a Geliibde hôt. De sell, d Vera Beermann, behaupdet au, dass d Edith Reiser vorooglickt wär.

Bei seine Ermiddlonga kriagt dr KHK Lutz raus, dass dr Vrtrag ibr d Lebensvorsicherong a Klausel hôt, wonôch d Vorsicherongssumme en de erschde drei Jôhr nôch-em Vortragsabschluss bei Selbschtmord et auszahlt wuud, enzwischa aber dui Frischt om zwoi Monet ibrschridda wär. Merkwirdich kommt em Lutz au vor, dass dr Reiser bloß mit 200.000 DM vorsichret ischt, sei Frau aber mit-ra halba Millioo!

Em Rahma vo seine Ermiddlonga erfehrt dr Lutz, dass dr Reiser am Ôbed vo sellem Vorfall ohne a Krawadd ens Schbiilkasino hôt ganga wella, obwohl’r als Gwohnheitsschbiiler wissa hôt miaßa, dass mr so a Kleidongsstick braucht. Drom wär’r weggschickt wôrra ond schbäder mit-ra Krawadd wiider komma. Dr Lutz kombiniirt, dass dui Zeitschbanne hedd langa kenna, om ans Schweizer Ufer ibrzosetza ond wiider zruckzokomma. A weiders Indiz fir a Vorbrecha isch dui Tatsach, dass dr Reiser erscht kirzlich an Neopren-Ôzug kauft hôt, womit mr’s au guat a lengera Zeit em kalda Wasser aushalda kôô.

Bald druff wuud dr Lutz en dr Vera Beermann ihr Wohnong gruafa, weil de sell dod en dr Badwann leit. Sichergschdellt wuud a Fehn, wo entweder vo selber en d Wann gfalla oder vo ebber andersch absichtlich ens Wasser gschmissa wôrra ischt.

D Schbur fihrt jetzt d Kriminalbolezei nôch Zirich, wo sich dr Reiser s Geld aus dr Lebensvorsicherong auszahla lôôt. Dr Reiser brengt’s ferdich, em Lutz zo entkomma. Dô druff geit’s a Vorfolgongsjagd mit-ma VW-Käfer durch Zirich. Zamma mit de eidgenessische Kollega schafft’s dr Lutz, da Reiser zo stella. Wia nô aber au d Edith Reiser us-em Auto steigt, send älle Vorfolger ganz baff. Jetzt kommt ans Licht, dass des Ganova-Pärle dean Vorsicherongsbetrug eigfädlet hôt, weil dr Reiser riisige Beträg em Kasino vorschbiilt hôt. Sei Freindin hôt dr Reiser om d Ecke brôcht, weil se Vordacht gschepft hôt, dass ihr Liibhaber dr Merder vo seira Frau sei kennt.

Au des muaß noh gsait werra ändere

D Ussa-Uffnahma send en de Städt Friedrichshafa, Lindau, Romanshorn, St. Gallen, Zirich, Tettnang, Stuegert ond Frankfurt am Main dreht wôrra ond d Ennauffnahma en de Studios vom Siddeitscha Rundfunk.

Weblink ändere

Dä Artikel basiert uff ere fräie Übersetzig vu dere Version vum Artikel „Tatort:_Kennwort_Fähre“ vu de dütsche Wikipedia. E Liste vu de Autore un Versione isch do z finde.