S Naturschutzpiet Wolmedinger Ried – Undersee – Gnadesee isch es Naturschutzpiet vo Baade-Würtebärg und s gröschte Naturreservat am dütsche Ufer vom Bodesee.

d Laag ändere

S Wolmedinger Ried foot am Seerhy bi Choschdez a und goot zu der Halbsinsle vo Rychenau im Undersee und bis zum Gnadesee bi Allensbach-Hegne. Derzue ghöre au no d Insle Triboldingerbohl und Middlere Chopf.

D Ortschaft Wolmedinge isch e Deil vom Stadtgebiet vo Choschdez.

S Ried vo Wolmedinge isch 1930 under Naturschutz gstellt worde. Zerscht isch s nur 465 Hektaare gross gsi, und ane 1964 het me von em bi Choschdez sogar föif Hektaare abgschnitte, zum es nöis Gwärbareaal bi Underloon yzrichte. Ane 1980 isch neu au d Wasserflechi vor em Riedgländ derzuegrächnet worde, so dass s Naturschutzpiet, wo jetz zuesätzlech au es Landschaftschutzpiet isch, jetzt ebe uf 767 Hektaare chunt.

Der Wärt vom Areal ändere

Im Wolmedinger Ried läbe vil Pflanzearte; me het meh als 700 dervo zellt. Und öpe 190 Vogelarte sind do beobachtet worde. Im Herbscht chöme mängmol meh als 40'000 Zugvögel dohi.

Im grosse flache Wasserruum vor em Ufer, wo nid darf gjagt wärde, vor allem i der Wolmetiger Bucht, het s vil Fisch und im Seebode Muschle und chlyni Dier. Die sind alli als Fuetter für d Vögel guet; drum läbe im Ried Kormoraan, Graureiher, Tüüchel, Schwään, Wildänte, Taucherli, Mööwe und no vil anderi Wasservögel.

Am Seeufer hets wyti Schilfflechene, wo s Land vor em Wasser schütze und vilne Dier Schutz und Platz zum Nischte biete. Näbedra wachse ufem Land Ufergras und Matte, wo au bsunderi und sälteni Pflanze vorchöme, und vereinzelt no Gstrüüch und Baumgruppe.

Wil im Ried so vil Läbewäse, wo süscht i der Kulturlandschaft sälte worde sind, überläbe, isch s Naturschutzpiet am Undersee denn au i grossi Kategorie vo Schutzareal ufgnoo worde: me zellts zu de “Europareservaat‹, zu de internazional wichtige füechte Gländ, wo s wäge der Ramsar-Konvänzioon git, und zu der Gruppe vo Schutzpiet im Programm Natura 2000.

Organisazioon vom Naturschutz ändere

Ane 1979 het s Land Baade-Würtebärg em Düütsche Naturschutzbund der Uuftrag ggee, s Schutzpiet z pfläge. Zäme mid der Bezirksstell Fryburg für Naturschutz und Landschaftspfläg und mid em Forschtamt luegt der Naturschutzbund füre nötige Underhalt vom Gländ.

1979 isch s Naturschutzzentrum Wollmatinger Ried ygrichtet worde, wo undersuecht, wie s de Pflanze und de Dier im Ried goot, und wo d Arbete leitet, vor allem s Mäje und Schnyde vo gwüsse Pflanze, und wo d Psuecher übers Naturschutzpiet informiert.

Bilder ändere

Weblink ändere