Burg Hauelupfe

Dä Artikel bschrybt d Burg Hauelupfe bi Dale. Fir s Schloss Hochelupfe bi Stüelige lueg dert.

D Burg Hauelupfe, au Burgräscht Hauelupfe oder Lupfe gnännt (dt. Burg Hohenlupfen), isch e Burgruine iber Dale im Landchreis Duttlinge z Bade-Wirttebärg.

Burg Hauelupfe
Alternativnäme:	Burgrest Hohenlupfen, Lupfen
Entstehigsziit:	vor 1065
Burgetyp:	Hecheburg
Erhaltigszuestand:	Ruine
Ort:	Dale
Geografischi Lag:	48° 1′ 26″ N, 8° 40′ 15,3″ O48.0238888888898.6709194444444977
Höchi:	977 m ü. NN
Burg Hohenlupfen (Baden-Württemberg) Burg Hohenlupfen

Lag

Dr Burgreäscht vu däre ehmolige Hecheburg lyt uf em Zyygebärg Lupfe, au Hauelupfe gnännt. Dr Lupfe isch mit 977 m ü. NN dr hegscht Bärg vu dr Baaralb (dr Kenig vu dr Baar).

Gschicht

D Burg Hauelupfe, wu anne 1065 s erscht Mol gnännt woren isch, isch d Stammburg vu dr Grofe von Lupfen gsi, eme mächtige Adelsgschlächt, wu zem schwebische Uradel ghert gha het. Si hän anne 1251 dur Erbfall d Landgrofschaft Stüelige im Chleggi iberchuu, derzue d Herrschaft Hauehewe un Bsitzige im Elsass.

Wäge langjehrige Fehde mit em benochberte Firschtehuus Firschtebärg hän sich d Grofe vu Lupfe im Stedtchrieg um dr Schwebische Stedtbund uf d Syte vu dr Wirttebärger gstellt gege d Ryychsstadt Rautweil, wu mit dr Firschtebärger verbindet gsi isch. Anne 1377 hän Rautweiler Druppe di wirttebärgisch Stadt Duttlinge gstirmt, hän dert dr Grof Eberhard von Lupfen gfange gnuu un uf em Ruckwäg d Burg Lupfe gschlisse un gschleift.

D Burg isch derno wider ufböue wore, aber scho anne 1416 wider vu dr Rautweiler ändgiltig gschlisse wore, desmol im Ufdrag vum Chenig Sigismund wägem Bindnis vu dr Herre von Lupfen mit dr Herzeg vu Eschtryych. Dr Burgstall isch 1437 an d Herre von Fridingen chuu un 1444 an d Wirttebärger, wu d Herrschaft um dr Lupfe vu dr Fridinger gchauft hän.

Anne 1439, nume wenig Johr noch em Ibergang vu dr Burg an d Herre von Fridingen, isch d Linie vum Gschlächt vu dr Grofe von Lupfen verlosche. Wu d Stüeliger Linie 1562 uusgstorben isch, isch däne ihri Herrschaft an d Ryychsmarschäll von Pappenheim chu un speter an d Firschtebärger.

Aalag

Vu dr ehmolige Burgaalag sin hite nume no e Wall un e Grabe erhalte. Dert, wu dr quadratisch Bärgfrid wahrschyns gstanden isch, stoht hite ne Uussichtsdurm. Dr Bärgfrid het e Grundflechi vu 7 mol 7 Meter gha. Räscht vu dr Umfassigsmuure bzw. dr Ringmuure mit eme Durmässer vu 1,2 Meter sin no anne 1791 erhalte gsi. Hite isch dr Verlauf vu dr Umfassigsmuure un vum Burggrabe nume no an Verdiefige im Bode z sähne.

Literatur

• Max Miller, Gerhard Taddey: Handbuch der historischen Stätten Deutschlands. Band 6. Baden-Württemberg. Stuttgart 1965

Weblink

• Burge im Landchreis Duttlinge uf burgeninventar.de
• Info-Syte zue dr Grofe von Lupfen bi dr Residenzen-Kommission vu dr Akademie der Wissenschaften zu Göttingen
• Lupfe bi Burgen und Ruinen in Baden-Württemberg

Dä Artikel basiert uff ere fräie Übersetzig vu dere Version vum Artikel „Burg_Hohenlupfen“ vu de dütsche Wikipedia. E Liste vu de Autore un Versione isch do z finde.