Christian Menn

Dr Christian Menn (* 3. März 1927 z Meiringe; † 16. Juli 2018 z Chur) isch e Schwiizer Bouingeniöör gsi. Er isch Profässer a dr ETH Züri gsi.

d Sunnibärgbrugg über d Landquart oberhalb vo Serneus

D Familie vom Menn chunt vo Zillis us em Bündnerland. Dr Christian Menn het z Chur s Gymnasium psuecht und derno z Züri a dr ETH d Ingeniöörwüsseschaft studiert. Ane 1950 het er s Diplom vo dr ETH übercho.

Er het bi Planigsbüro z Chur und z Züri und bin ere Boufirma z Bärn gschaffet, und ane 1953 isch er Assistänt a dr ETH worde und het dört 1959 s Dokterexame gmacht. E Zyt lang het er denn z Paris und denn nomol z Bärn für Bouundernäme gschaffet, und 1957 het er z Chur es eigets Ingeniöörbüro ggründet.

S Büro Menn het 14 Joor lang vor alem Bruggene plant, elei im Kanton Graubünde sind s meh als achzg gsi. Bekant worde sind psunders d Naninbrugge vo dr San Bernardino-Stross bi Mesocco und dr Felsenauviadukt vo dr Autobahn z Bärn. Vom Joor 1971 aa isch dr Menn Profässer für Boustatik und Konstrukzion a dr ETH Züri gsi, bis er ane 1992 emeritiert worden isch. Au i dr Zyt a dr ETH het er grossi Brugge planet, so öpe d Ganterbrugg am Simplon und d Sunnibärgbrugg bi Chlooschtersch.

Bilder

• 
  d Ganterbrugg im Wallis
• 
  d Rhybrugg vo Tamins
• 
  d Brugg über dr Hinderrhy bim Crestawald z Sufers
• 
  dr Felsenauviadukt bi Bärn
• 
  d Cascellabrugg im Misox

Literatur

• Bruno Meyer: Menn, Christian. In: Historisches Lexikon vo dr Schwiiz.
• Caspar Schärer und Christian Menn (Hrsg.): Christian Menn. Brücken, Zürich 2015, ISBN 978-3-85881-455-5
• Thomas Vogel, Peter Marti (Hrsg.): Christian Menn – Brückenbauer 2., Zürich 2009, ISBN 978-3-7281-3137-9

Weblink

 Commons: Christian Menn – Sammlig vo Multimediadateie

• d Website vom Christian Menn