Florian Melcher

Dr Florian Melcher, wo am 22. Dezämber 1875 z S-chanf uf d Wält cho und am 23. Oktober 1913 z Samaade gstorben isch, isch e Schwiizer Romanischt und Wörterbuechredakter gsi.

Lääbe und Wärch

Dr Melcher isch dr Son vom Giosua Melcher un dr Catharina geb. Thöni gsi. Er het z S-chanf d Grundschuel und z Chur s Gimnasium bsuecht. Dänn isch er ad Universitäte z Gämf, z München un no z Wien bim Wilhelm Meyer-Lübke go d Filology studiere. Z Wien het er syni Dokterarbet gschribe, won er drinn der romanisch Dialäkt vo S-chanf beschrybt. Er isch mit dr Martha Walin ghürootet gsi.

Drno het en die Rätoromanischi Gselschaft 1904 as eerschte Redakter für s dozmol grad plaanete romanische Wörterbuech Dicziunari Rumantsch Grischun agstelt. Zäme mit em Robert von Planta und em Chasper Pult het er s Projäkt vorbereitet, und dr Nöieburger Romanischt Louis Gauchat, wo s Wälschschwiizer Mundartwörterbuech ufpout gha het, isch ne drby mit sym Wüsse cho hälfe.

Dr Melcher isch i de bünderromanische Sproochregioone zu de Lüüt ggange go Wörter und Sprüüch vo de verschidene Idioom uufschrybe, und zwar psunders i dene Döörffer, wo am Rand vom rätoromanische Sprochpiet sind und sech d Nochbersprooche Düütsch und Iteliänisch immer wie meh is romanische Areaal usbreite.

Sid 1910 het dr Melcher syni Redakzioonsarbet nümme z Chur, sondern wider deheime z S-chanf gmacht. Drüü joor spöter isch dr Sproochwüüseschaftler wägen ere Chranket wärend dr Arbet und vill z früe im Alter vo 38 Joor gstorbe. Dr Engadyner Chasper Pult isch si Nochfolger woorde.

Wäärch

• Davart vschins e fulasters nella lingua retorumauntscha. In Annalas da la Societad Retorumantscha, 20, 1906, S. 197–217.
• Fraseologia rumauntscha. Chur 1911.
• Gesamtbericht über den Gang der Arbeiten für das rätoromanische Idiotikon während der Zeit vom 1. Dezember 1904 bis zum 31. Dezember 1912. 1913
• Furmaziun nominala nel idiom d’Engiadin’Ota. In: Annalas da la Societad Retorumantscha, 38, 1924, S. 119–179; 39, 1925, S. 1–43.
• Dicziunari Rumantsch Grischun, Chur 1938ff.

Literatur

• A. Casanova: Dr. Florian Melcher. In: Schweizerisches Archiv für Volkskunde, 17, 1913, S. 256.
• R. Planta: Doctor Florian Melcher. In: Annalas, 29, 1915, S. 1–15, 329–331.
• Jakob Jud: Vorwort zum Dicziunari rumantsch grischun. In: Vox Romanica, 4, 1939, S. 1–19.

Weblink

• Dr Afang vom DRG uf dr Websyte vom Dicziunari Rumantsch Grischun
• Adolf Collenberg: Melcher, Florian bim Lexicon istoric retic