Internationali Schopfemer Mund-Art Literatur-Wärchstatt

Di International Schopfemer Mund-Art Literatur-Wärchstatt (dt. Internationale Schopfheimer Mund-Art Literatur-Werkstatt) isch e Literaturveraastaltig, wu syter anne 1989 z Schopfe alljohr im Friejohr stattfindet un hite aini vu dr wichtigschte Dräffe vu Dialäktautore us em dytschsprochige Ruum isch

Zue dr Mund-Art Literatur-Werkstatt wäre sechs oder sibe Dialäktautore us em ganze dytsche Sprochruum yyglade, zmaischt e jede us eme andere Dialäktruum.

Gschicht

Grindet wore isch d Mund-Art-Literatur-Werkstatt im Friejohr 1989 vum Thomas Burth un em Markus Manfred Jung.

D Aafäng vu däre Wärchstatt gehn zrugg uf e schwebisch Mundartdräffe anne 1987, wu dr Jung derzue yyglade gsii isch. Des het ihn un dr Burth uf d Idee brocht, sälber e Dräffe vu Dialäktautore z organisiere, wu d Literaturwärchstatt im Mittelpunkt stoht, des haißt s gmainsam Dischpetiere iber d Täxt. Derzue sin Lääsige vu Aafang aa ne zäntrale Bstanddail vu dr Wärchstatt gsii. Scho bi dr Premiere het di effetlig Lääsig im Schopfemer Museumkeller stattgfunde. Mit dr Schrybwys Mund-Art soll zaigt wäre, ass bi däre Wärchstatt vor allem modärni un experimentälli Literatur willchuu isch.

Noch em Dod vum Burth anne 2000 het dr Jung d Wärchstatt wytergfiert. Syt 2005 isch as Mitorganisator un Moderator dr Volker Habermaier derby, e Studiedirektor am Theodor-Heuss-Gymnasium z Schopfe, wu au dr Jung as Lehrer schafft.

Vu Aafang aa sin di alemannische Dialäkt iber alli Gränzen ewäg im Zäntrum gstande, vu Dytschland, dr Schwyz, us em Elsass, vu Vorarlberg, vu Liechtestai un au vu dr Walserderfer z Norditalie. Dernäbe sin im Lauf vu dr fimfezwanzg Johr bairischi, oschtränkischi, moselfränkischi, rhyfränkischi, lothringischi, plattdytschi, frisischi un anderi Dialäktautore us em ganze dytschsprochige Ruum a s Dailnämmer bi dr Literaturwärchstatt derby gsii.

Bis anne 2013 sin bi dr 25 Uusgabe insgsamt 133 Dytschi, 27 Schwyzer, 17 Franzose, 14 Eschtrycher, 2 Italiener, 1 Liechtesteiner un 1 Ungari as Dailnämmer derby gsii.

Im Johr 1999 isch d Gmai Rieche Mitveraastalter gsii. Näb em Kulturamt z Wiil am Rhii, wu syt vil Johr Mitveraastalter vu dr Literaturwärchstatt isch, isch bi dr 25. Literaturwerkstatt 2013 au d Basler „Allgemeine Lesegesellschaft“ Mitveraastalter gsii, derzue het s Kooperatione mit Schuele in dr Kanton Basel-Stadt un Basel-Land gee. Mittelfrischtig soll au ne wytere Mitveraastalter us em Elsass gwunne wäre.

Anne 2013 isch s 25-jehrig Jubileum vu dr Literatur-Werkstatt gfyyrt wore mit eme Feschtakt un Lääsige vu 36 Autorene un Autore us vier Länder an vier Ort (z Basel in dr Schwyz, z Saint-Louis z Frankrych un z Wiil un z Schopfe z Dytschland.

D Uusgab 2020 isch uf s Spotjohr 2021 verschobe wore wäg dr wältyte Coronavirus-Pandemy.

Weblink

• Markus Manfred Jung: Wo ane gohsch? Mundartdichtung im 21. Jahrhundert, Feschtvortrag bi dr 30. Bockenheimer Mundartdäg, 6. Mai 2007 in Bockenheim an der Weinstraße
• Schopfheimer Mund-Art Literatur-Werkstatt: Ein vielstimmiger Marathon (Badische Zeitung, 25.03.2013)
• Mundart hat festen Platz in der Stadt (Badische Zeitung, 25.03.2013)
• Wir verlangen Qualität von Mundartliteratur, Interview mit em Markus Manfred Jung (Badische Zeitung, 05.03.2012)