Jörg Schneider
|
Dä Artikel behandlet en Schwizer Volksschauspiler. Witeri Persone mit em gliiche Name findt me do. |
De Jörg Schneider (* 7. Februar 1935 z Züri; † 22. August 2015 z Wetzike[1]) isch en Schwizer Schauspiler gsi.
Biografii ändere
Vor sinere Schauspilkarriere isch de Jörg Schneider a s Lehrersemi gange und wil inn i sinnere Verwandtschaft niemert bezügli Schauspilerei understüzt hät, isch er zerscht als kaufmännische Aagstellte in ere Isewarehandlig e Lehr go mache. Zwüscheddure hät er Schauspil- und Sprächunterricht gno. 1955 isch er Mitbegründer vom Cabaret «Äxgüsi» z Züri gsii.
Ab 1958 isch de Jörg Schneider hauptbrueflich Schauspiler gsi. Sini Karriere hät mit em Uuftritt in ere Fernsehfassig vo Pünktchen und Anton aagfange. Ab 1963 isch er gmainsam mit em Vico Torriani i Schlagerparade z gseh gsi. Vo 1974 bis 1979 hät er i Livekrimis vo SF DRS en Detektiv gspillt. Nochhär hät er sich uf s Bühneschaffe am Theater konzentriert, won er sich no as 70-jährige i Dure bi rot (2005) em Publikum präsentiert hät. 1984 isch de Jörg Schneider i de Fernsehserii Motel als Chuchischef Koni Frei z gseh gsi. I däre 40-tailige Kultserii hät er d Hauptrolle gspillt.[2] Vo 2004 bis 2006 isch er i de Saifeopere Lüthi und Blanc als Buechhalter Oskar Wehrli ufträte. 2007 hät er im Film Ameisenweg mitgspillt. S Johr druf spillt er im Kinofilm Happy New Year vom Christoph Schaub de Herbert, wo sich i de Silvesternacht uf e nächtlechi Odyssee macht.
Zämme mit de Ines Torelli und em Paul Bühlmann spilt de Jörg Schneider 1967 z Züri im Musical Bibi Balù. Vo 1967 bis 1976 hät er 41 Hörspiilfassige vom Kasperli und sine Aabetüür gschribe und gsproche, wo en Klassiker vom vertoonte Schwizer Chindermärli worden isch. Die Märli, wo d Figure Schwizerdütsch reded, sind bishär gege drü Millione Mol verchauft worde. Mit em Paul Bühlmann zäme hät er au Gschichte vom Meister Eder und sim Pumuckl i Mundart vertoont. Für d Zürcher Märlibühni hät er Märlispiil verfasst und für s Operehuus Züri hät er zäme mit de Komponiste Hans Moeckel und Emil Moser Chindermusical gschribe und inszeniert.
1981 spilt de Jörg Schneider näbed em Ruedi Walter d Rolle vom Wladimir i Warte uf de Godot, e Dialäktfassig vom Urs Widmer. 2004/05 spilt er Pseudolus im Musical Toll trieben es die alten Römer vom Stephen Sondheim. A de Solethurner Filmtäg 2015 hät de Kinofilm Usfahrt Oerlike, wo de Jörg Schneider näbed em Mathias Gnädinger e Hauptrolle spillt, de Publikumspriis gwunne.[3]
Im September 2014 isch bekannt worde, as de Jörg Schneider schwer chrank isch und nümeme uf d Bühni zruggcheere wird. De zwaiti Tail vo sinere Abschidstournee Häppi Änd isch abgsait worde.[4] Fasch e Johr spöter, am 22. Augschte 2015, isch er sim Chräbsliide erläge.[1]
Nochtrag ändere
Bim draie vom Film «Usfahrt Oerlike» isch scho klar gsi, as de Jörg Schneider schwär chrank isch und me hät ghofft, as me de Film no vor sim Tod cha fertig mache.[4] De Mathias Gnädinger sait im Film zum Schneider; „I stirb wohrschiinli vor Dir“. De Gnädinger isch scho em 3. April 2015 gstorbe.
Privats ändere
De Jörg Schneider isch sit 1963 verhüroted gsi und hät z Wetzike im züri Oberland gwohnt. Sin Sohn isch 2010 im Alter vo 46 Johre gstorbe[5] und sini Frau Romy isch scho sit es Zitli querschnittglähmt und uf de Rollstuel aagwise.[6]
Ehrige ändere
1995 hät de Jörg Schneider de Prix Walo i de Sparte Schauspiler gwunne.[7] Am 18. Mai 2014, bim 40. Prix Walo, isch em au de Ehre-Prix-Walo öberreicht worde.[8]
Filmografii (Uuswahl) ändere
- 1960er: «Polizischt Wäckerli» (Fernsehserie)
- 1984: Motel (Fernsehserie)
- 2002–2007: Lüthi und Blanc
- 2007: Ameisenweg
- 2008: Happy New Year – Regie: Christoph Schaub
- 2015: Usfahrt Oerlike – Regie: Paul Riniker
Literatur ändere
- Jörg Schneider: Äxgüsi! Aus meinem Leben. Tudor Recording, Zürich 2015, ISBN 978-3-03776-518-0.
- Judith Niethammer: Jörg Schneider. In: Andreas Kotte (Hrsg.): Theaterlexikon der Schweiz. Band 3. Chronos, Zürich 2005, ISBN 3-0340-0715-9, S. 1623 f.
Weblink ändere
- D Website vom Jörg Schneider
- De Jörg Schneider bi Lüthi und Blanc
- Jörg Schneider in der Internet Movie Database
- Peter Hossli: «Ja, so ist das jetzt» Interview im Sunntigsblick vom 5. Oktober 2014
- Der beliebte Volksschauspieler Jörg Schneider ist tot Mittailig uf srf.ch vom 22. Augschte 2015
- Archiv-Perlen: Die schönsten Jörg-Schneider-Momente E Zämestellig uf srf.ch
Fuessnoote ändere
- ↑ 1,0 1,1 Der beliebte Volksschauspieler Jörg Schneider ist tot Mittailig uf srf.ch vom 22. Augschte 2015
- ↑ Motel - Erinnerungen an die Kultserie Filmli us em SRF-Archiv uf youtube.com
- ↑ 50. Solothurner Filmtage: Die Nacht gehörte den Jungen Artikel i de NZZ vom 31. Jänner 2015
- ↑ 4,0 4,1 Jörg Schneider schwer krank – er sagt sämtliche Vorstellungen ab Mitteilig vom 29. September 2014 uf srf.ch
- ↑ Jörg Schneider hat seinen Sohn verloren Schwizer Färnseä, Sändig glanz & gloria vom 27. Juni 2010 (Video)
- ↑ Jörg Schneider ist tot Artikel im Zürcher Oberländer online vom 22. Augschte 2015
- ↑ Sparten-Prix-Walo sit 1994 im Archiv vo prixwalo.ch, abgruefe am 25. Augschte 2015
- ↑ Prix Walo für Bligg, Bastian Baker und Beatrice Egli Tages-Anzeiger online, Artikel vom 18. Mai 2014
|
Dä Artikel basiert uff ere fräie Übersetzig vu dere Version vum Artikel „Jörg_Schneider_(Schauspieler)“ vu de dütsche Wikipedia. E Liste vu de Autore un Versione isch do z finde. |