Musigwälle

es Radioprogramm vo SRF (früener DRS)

D Musigwälle isch es Radioprogramm vo SRF. Es bringt zur Hauptsach “liechti Underhaltigsmusig”, also Stück vo dr Volchsmusig, Schlager, Chanson und vo anderne Musigrichtige, öppen au Stück us Operette. Mit ere Hörerschaft vo öber 400‘000 Lüt pro Tag isch d Musigwälle s drittgröscht Radio i de Dütschschwiz.[1]

s Logo vo dr Musigwälle

Das Programm vom Schwiizer Radio git’s sid 1996 – dozmol under em Name «Musigwälle 531» gstarted.[2] Wil de Landessänder Beromünster im 2008 abgstellt woren isch, hät s Programm dänn «DRS Musigwälle» ghaisse. Im Dezämber 2012 het s Programm, noch grosse Umstrukturierige vo de SRG SSR-Programmaagebot, dr ofiziell Name «Radio SRF Musikwelle» übercho.

Anne 2012 het d Redakzioon vo dr Musigwälle agfange, s ganze Tagesprogramm vo Moderatoore und Moderatorinne lo z leite, wo i dr Mundart rede. So isch druus erscht rächt eis vo dene Radiogfäss worde, wo für s Schwyzerdüütsche bsunders nützlech sind. Es git Gsprööch mit Musiker, wo von irere Kariere und irne Produkzioone rede. Beliebti und tradizionelli Momänt im Programm sind d Sändig Gratulazioone am Morge, s Wunschkonzärt am Mäntigobig und d Visite (s Wunschkonzärt för di Chranke) am Fritignomittag. Die beede Wunschkonzärt chömed au uf Radio SRF 1.

Im Format WortSchatz im Morgeprogramm bringe d Radiolüüt überraschendi, mängmol luschtigi, mängmol bsinlechi Sache, und öppen au Interview mit Schriftsteller, wo öppis us irem Wärch vorträge. D Musigwälle bringt churzi Reportage über Tieläkt und über s Bruuchtum vo dr Schwiiz.

E längi Reie vo Mundartsändige isch dr Schwiizer Saagewält gwidmet. Immer am Donschtig chunt öpper us ere Landesgägend im Tieläkt vo dört cho Saage verzelle.[3] Nume es bar Bischpiil: D Marietta Kobald vo Fidärisch het im Juli und im Nofämber 2017 Prätiger Saage vorgläse,[4] am 21. Februar 2018 isch es d Nidwaldnerin Marie Odermatt-Lussy gsi, wo Gschichten us irem Kanton brocht het,[5] am 4. Juni 2018 isch es Porträä vo dr Loretta Federspiel cho, wo Saage vom Liechteschteinische vortreit het,[6] am 28. Augschte 2018 het dr Andreas Weissen vo Brig Saagen us em Wallis brocht[7] und am 7. Septämber 2018 d Ruth Lederer Gschichte usem Sarganserland.

Weblink ändere

Fuessnoote ändere

  1. Radio SRF Musikwelle – Ihr Radio für Volksmusik, Schlager und Unterhaltungsmusik! Sändigsporträ uf srf.ch, abgruefen am 28. Septämber 2018
  2. Am Anfang war die Musigwälle Artikel uf srf.ch vom 30. September 2016
  3. Schweizer Sagen Öbersicht vo de Sändige uf srf.ch, abgruefen am 27. Septämber 2018
  4. Prättigauer Sagenschatz von Marietta Kobald Artikel uf srf.ch vom 21. Novämber 2017
  5. Aus dem Sagen-Schatz von Marie Odermatt-Lussy Artikel uf srf.ch vom 21. Februar 2018
  6. Fesselnde Sagen aus Liechtenstein Artikel uf srf.ch vom 7. Juni 2018
  7. Andreas Weissen erzählt schaurig-schöne Walliser Sagen Artikel uf srf.ch vom 28. Augschte 2018