Reschafim

Reschafim (hüfig au Reshafim, e Schriibig wo us em Änglische chunnt, hebr. רשפים) isch e Kibbuz drei Kilometer südwestlig vo der Stadt Bet Sche'an und ghört administrativ zum Emeq HaMaayanot (Kwelledaal) Regionalroot.

Reschafim

Reschafim us dr Luft

Basisdate

hebräisch:

רשפים

arabisch:

رشفيم

Staat:

Israel

Bezirk:

Nord

Gründet:

s Kooperativ: 1944^[1],
d Siidlig: 1948/49^[2]

Koordinate:

32° 29′ N, 35° 29′ OKoordinate: 32° 29′ 0″ N, 35° 28′ 40″ O

Höchi:

119 m unter em Meeresspiegel

Iiwohner:

536 (2011)

Telefonvorwahl:

(+972) 972-4

Postleitzahl:

10905

Art vo dr Gmeind:

Kibbuz

Webpresänz:

www.reshafim.org.il/

Reschafim

D Iiwooner

D Gründer si nit-religiösi rumänischi Überläbendi vo dr Schoa gsi, wo meistens scho z Europa Mitgliider in der sozialistische HaSchomer HaTzair-Jugendbeweegig gsi si. Drzue si bulgarischi und palestinensischi Juude cho. Si hai im Johr 1948, wo alli Araber s Beit-Schean-Daal verlo gha hai,^[3] Staatsland in der Aschrafie-Gegend zuedeilt übercho. Am Aafang hai si in ere provisorische Siidlig zwüsche de hütige Kibbuzim Reschafim und Schluchot gwohnt, zsämme mit Mitgliider vo der orthodoxe Bnei-Akiva-Bewegig, wo denn in s Kibbuz Schluchot zooge si. Son e ängs Zsämmeläbe und gueti Zsämmenaarbet vo nitreligiööse und religiööse Jude isch in sällere Zit äinzigartig gsi.

1949 si polnischi Flüchtling cho und in de 1950er Johr isch d Iiwohnerschaft vom Kibbuz mit em Zuezug vo neue Mitgliider vo der HaSchomer HaTzair us Argentinie, und mit dr Ufnaam vo Zöögling vo dr Aliat Noar^[4] us Marokko, der Türkei, Egüpte und Süürie, wo ooni Eltere iigwanderet si, stark gwachse. Vo de 1960er Johr aa si die mäiste nöije Kibbuznik geboreni Israeli, aber au e baar Freiwilligi us Europa si Mitgliider worde.

Wääred dr Wirtschaftskriise vo de 1990er Joor häi e Hufe Mitgliider s Kibbuz verloo, und erst in de 2010er Joor häi Nöiufnaame deren iiri Zaal wider guetgmacht.

D Wirtschaftskriise

Für zum us dr Krise usezcho, won e schweri Verschuldig vom Kibbuz währed dr grosse Inflation vo de 1980er Johr z Israel d Kibbutzgsellschaft iinegstürzt het, bassiert z Reschafim sit 1990 e diefgrifendi wirtschaftligi und soziali Wandlig. In deren ihrem Raame si grossi Däil vom Kibbuzlääbe privatisiert worde. So si dr gmäinschaftlig Ässsaal, d Chuchi und d Wöscherei zuedo worde, dr Kibbutzlaade isch privatisiert worde und für d Erziehig vo de Chinder underdags in de Chinderhüüser – sit em erste Irakchrieg schloofe d Chinder nüme im Chinderhuus sondern in dr Woonig vo den Eltere – müesse d Eltere zum e groosse Däil sälber ufcho. Im Lauf vo dr Sanierig het s Kibbuz mee as achzig Brozänt vo dr Bedeiligung an dr Plastikfabrik "Terraflex" müesse verchaufe, und im Joor 2022 het s si Bedäiligung ganz likwidiert. Zum d Schulde abzzaale het s Kibbuz au Fälder in dr Noochberschaft vom Stedtli Bet-Sche'an im Staat zruggverchauft und dr Geegewärt vo sine Akzie am Agraarundernääme Tnuva, wo an chineesischi Inwestoore verchauft worde isch, de Banke überloo.

Erziejig

Im Kibbuz hets drei Chinderhüüser (Kitas für Chinder bis zum Chindergartenalter) und zwäi Chindergärde, wo d Chinder vom Siibni am Morge bis am Vieri am Nomiddag bhüetet wärde. Mit de benochberte Kibbuz Messilot und Nir Dawid bedriibt Reschafim e Primarschuel z Messilot, won e Abdeilig für autistischi Chinder het. Wenn d Chinder noch dr Schuel heimchömme, chönne si bis am Vieri in ihr eignigs Chinderhuus goo. Das isch au an schuelfreije Dääg und in de Ferie vom Sibni bis am Vieri offe. D Mittelschuel, wo die vier Haschomer Hatzair Kibbuz Reschafim, Nir Dawid, Messilot und Beit Alpha bedriibe hai, isch wäge dr chliine Schüelerzahl vor e baar Johr gschlosse worde und d Chinder leere jetzt uf dr regionale Schuel z Neve Eitan.

Wirtschaft

Wenn no vor fufzig Joor braktisch alli Kibbuznik Aarbet im Kibbuz sälber gfunde häi, schaffe sit de wirtschaftlige und organisatorische Reforme in de 1990er und 2000er Joor die mäiste Mitgliider usserhalb vom Kibbuz.

S Kibbuz bedribt Landwirtschaft (Milchwirtschaft, Fischzucht, subdropischi Frücht, Fäldwirtschaft). Es isch e Däilhaaber am ene Hüenerstall für Äierbrodukzioon und an ere Gsellschaft für d Brodukzioon vo mediziinaalem Kannabis. E groosse Däil vo de Dächer vo de industrielle und landwirtschaftlige Geböid broduziert elektrische Stroom. S Kibbuz vermietet leeri Geböid an uswärtigi Handwärker.

Brojekt

Für zum d Iiwohnerzahl zvergrössere und d Iiwohnerschaft zverjünge, wird zur Zit e neui Siidlig, Schlafim, baut, wo Reschafim mit em Kibbuz Schluchot verbindet und d Iiwohner drvo däils religiös, däils nitreligiös si. Im Joor 2012 hai d Bauarbeite aagfange. In de 2020er Joor isch d Siidlig scho so grooss gsi, ass mä sich het afo überleege, öb Schlafim nid besser e sälbständigi Gmäind weer.

Fuessnoote

↑ העתון הרשמי של ממשלת פלשטינה (א"י), מס' 1372, עמוד 832 , 08/11/1944 (Die offizielli Zitig vo dr Regierig vo Palestina, No. 1372, p. 832, 08/11/1944)
↑ Davar, 17/06/1949, en Ardikel uf Hebräisch: "קיבוץ רשפים עלה למקום התיישותו" (S Kibbutz Reshafim het si permanänti Siidlig bezooge)
↑ Morris, The Birth of the Palestinian Refugee Problem Revisited, Cambridge University Press, 2004, S.227
↑ E Beweegig für jungi Iiwanderer, wo Juugedligi ooni Familie oder wo d Familie von ene si nid chönne understütze, in Internaat, vili von ene in Kibbuzim, underbringt.

Weblingg

Reshafim Homepage (uf Hebräisch)

[foundation1944-1] העתון הרשמי של ממשלת פלשטינה (א"י), מס' 1372, עמוד 832 , 08/11/1944 (Die offizielli Zitig vo dr Regierig vo Palestina, No. 1372, p. 832, 08/11/1944)

[2] Davar, 17/06/1949, en Ardikel uf Hebräisch: "קיבוץ רשפים עלה למקום התיישותו" (S Kibbutz Reshafim het si permanänti Siidlig bezooge)

[3] Morris, The Birth of the Palestinian Refugee Problem Revisited, Cambridge University Press, 2004, S.227

[4] E Beweegig für jungi Iiwanderer, wo Juugedligi ooni Familie oder wo d Familie von ene si nid chönne understütze, in Internaat, vili von ene in Kibbuzim, underbringt.

[1]

[2]

[3]

[4]