Thomas Oppermann

Dr Thomas Ludwig Albert Oppermann (* 27. April 1954 z Freckenhorst; † 25. Oktober 2020 z Göttingen) isch e dytsche Bolitiker (SPD) gsii. Vum 24. Oktober 2017 bis zue sym Dod isch Vizebresidänt vum Dytsche Bundesdag gsii.

dr Thomas Oppermann (2020)

Vorhär isch er vu Dezämber 2013 bis Septämber 2017 Vorsitzer vu dr SPD-Bundesdagsfraktion, vu Novämber 2007 bis Dezämber 2013 Erschte Barlemäntarische Gschäftsfierer vu dr SPD-Bundesdagsfraktion un vu Merz 1998 bis Merz 2003 nidersächsische Minischter fir Wisseschaft un Kultur gsii.

Är isch no dr Bundesdagswahle 2005, 2009, 2013 un 2017 as diräkt gwehlte Abgordnete in Bundesdag yy.

Läbe

Uusbildig un Beruef

Dr Oppermann isch anne 1954 as Suhn vun eme Molkereimaischte ruf d Wält chuu. Är isch uf d Goetheschuel z Einbeck gange, wun er zwaimol e Klass het mieße widerhole un 1975 s Abitur gmacht het. Derno het er an dr Univertsitet Dibenga Germanischtik un Anglischtik studiert. Är het dr Chriegsdienst verwaigeret un vu 1976 bis 1978 as freiwillige Hälfer bi dr Aktion Sühnezeichen Friedensdienste (ASF) in dr USA gschafft, wun er au fir d Fäld- un Wanderarbaitergwerkschaft UFW/AFL-CIO gschafft het. No syre Ruggchehr het er an dr Georg-August-Universität Göttingen Rächstwisseschafte studiert un anne 1983 no nume acht Semeschter s Erscht Juristisch Staatsexame gmacht. In dr Zyt vum Studium isch er Mitglid un Mitgrinder vu dr Studäntegruppe Basisgruppe Jura am Juristische Fachberaich un Mitgliid vu dr Juso-Hochschuelgruppe im Studäntebarlemänt (StuPa) vu dr Universitet Göttingen gsii. No sym Referendariat het er 1986 s Zwait Juristisch Staatsexame abglait, wun wer mit Predikat bstande het. No isch er bis 1990 as Richter am Verwaltigsgricht Hannover un speter am Verwaltigsgricht Braunschweig gsii. Vu 1988 bis 1989 isch er as Rächtsdezernänt vu dr Stadt Hannoversch Münden in d Kommunalverwaltig abgordnet gsii.

Barteilaufbahn

Dr Oppermann isch syter anne 1980 Mitglid vu dr SPD gsii un syt 1989 Vorsitzer vum SPD-Unterbezirk Göttingen. Vu 1990 bis 2005 het er em Landdag vu Nidersachse aaghert. Dert isch er vu 1990 bis 1998 rächtsbolitische Sprächer un vu 2003 bis 2005 wirtschaftsbolitische Sprächer vu dr SPD-Landdagsfraktion gsii.

Vu 2001 bis 2005 het dr Oppermann au em Chraisdag vum Landchrais Göttingen aaghert. Syt dr Bundesdagswahl 2005 isch er Mitglid vum Dytsche Bundesdag gsii. Dert isch er vu Merz 2006 bis Novämber 2007 Sprächer vu dr Arbetsgruppe un Obmann vu dr SPD-Fraktion im Ghaimdienscht-Untersuechugsuusschuss gsii. Am 26. Novämber 2007 isch er zum Erschte Barlemäntarische Gschäftsfierer vu dr SPD-Bundesdagsfraktion gwehlt wore. Är het dodermit dr Olaf Scholz abglest, wu as Bundesminischter fir Arbet un Sozials ins Kabinett Merkel I gwächslet. Vu 2007 bis 2013 iscbh er Vorsitzer vum Barlemäntarische Kontrollgremium gsii. Im Bundesdagswahlkampf 2009 het dr Oppermann zum Schattekabinett vum SPD-Chanzlerkandidat Frank-Walter Steinmeier ghert. Im Bundesdagswahlkampf 2013 het dr Peer Steinbrück dr Oppermann in sy Kompetenzteam fir dr Beraich vu dr Inne- un Rächtsbolitik gruefe.

Dr Thomas Oppermann isch alliwyl as diräkt gwehlte Abgordnete vum Wahlchrais Göttingen in Bundesdag yyzoge. Bi dr Bundesdagswahl 2017 isch er uf 34,9 Brozänt vu dr Erschtsimme chuu.

Am 16. Dezämber 2013 hän 90,81 Brozänt vu dr SPD-Abgordnete ihn zum neie Vorsitzer vu dr SPD-Bundesdagsfraktion gwehlt. Zue syre Noofolgeri isch am 27. Septämber 2017 d Andrea Nahles gwehlt wore.

Effetligi Ämter

Am 30. Merz 1998 isch dr Oppermann as Minischter fir Wisseschaft un Kultur in di vum Minischterbresidänt Gerhard Schröder gfiert Landesregierig vu Nidersachse gruefe wore. In däm Amt het er au dr Regierige vu sällem syne Noofolger Gerhard Glogowski un Sigmar Gabriel aaghert. Wu d SPD bi dr Landdagswahl 2003 ihre absolut Meh verlore ghaa het, hän d CDU un d FDP e Koalition gschlosse. D Amtszyt vu dr Regierig Gabriel het am 4. Merz 2003 ufghert.

Vu 2019 bis 2020 isch dr Oppermann im Vorstand vu dr Dytsch-Franzesische Barlemäntarische Versammlig gsii.

Sunschtigs Engaschmänt

Dr Oppermann het em „Netzwerk Berlin“ un em „Seeheimer Kreis“ aaghert un isch stellverdrättende Vorsitzer vu dr dytsch-israelische Barlemäntariergruppe gsii.

Är het em Johrgang 1992 vum „Young Leaders Programm“ vum Netzwärch „Atlantik-Brücke“ aaghert.

Im Septämber 2019 isch dr Thomas Oppermann uf em 43. Ordelige DFB-Bundesdag z Frankfurt am Main in dr Noofolg vum Klaus Kinkel zum Vorsitzer vu dr Ethikkummission vum Dytsche Fueßball-Bund gwehlt wore.

Privats

Dr Oppermann het zwoo Dechtere us ere friejere Eh un e Dochter un e Suhn mit syre Partneri ghaa. Är isch e passionierte Fueßballspiler un Wanderer gsii. Derzue het er au gärn gläse.

Dr Thomas Oppermann isch am 25. Oktober 2020 gstorbe, nodäm er vor eme Live-Interview fir d ZDF-Sändig „Berlin direkt“ zämebroche un ins Universitetsklinikum Göttingen yygliferet wore isch.

Weblink

 Commons: Thomas Oppermann – Sammlig vo Multimediadateie

• Websyte vum Thomas Oppermann
• Biographie beim Deutschen Bundestag
• Thomas Oppermann uf abgeordnetenwatch.de
• Deutschlandfunk Kulturfragen. Debatten und Dokumente vom 17. März 2019: Gespräch unter der Reichstagskuppel: Paritäten und Identitäten – Thomas Oppermann über aktuelle Debatten im Parlament im Gespräch mit Stefan Detjen

Fueßnote

Dä Artikel basiert uff ere fräie Übersetzig vu dere Version vum Artikel „Thomas_Oppermann_(Politiker)“ vu de dütsche Wikipedia. E Liste vu de Autore un Versione isch do z finde.