Viola Amherd

Schwizer Politikeri us em Wallis

D Viola Amherd (* 7. Juni 1962 z Brig im Kanton Wallis) isch e Schwiizer Politikeri (CVP). Vo 2000 bis 2012 isch si Stadtpräsidenti vo Brig-Glis gsi und sit em 2005 isch si Mitglid vom Nationalrot. Bi de Bundesratswahl am 5. Dezember 2018 isch si im erschte Wahlgang zur Nochfolgerin vo de Doris Leuthard gwählt worde.

d Viola Amherd anne 2018

LäbeBearbeite

D Viola Amherd isch vo 1969 bis 1978 a d Primar- und d Sekundarschuele z Brig-Glis gange vom 1978 bis 1982 am Latingymnasium z Brig gsi, wo si im 1982 mit de Maturität Typ B abgschlosse het. Vo 1982 bis 1987 het si a de Universität Fryburg Jus gstudiird und s Studium mit em Lizentiat abgschlosse. Im 1990 het si s Notardiplom vom Kanton Wallis übercho und im 1991 s Aawaltsdiplom und s Aawaltspatänt. Sit em 1991 isch si Advokatin und Notarin mit emene eigete Büro z Brig-Glis gsi.

PolitikBearbeite

Vo 1992 bis 2012 isch d Amherd Mitglid vom Brig-Gliser Stadtrot gsi, daderbi sit em 1996 als Vizepresidänti und ab em 2000 als Presidänti. Im 2005 isch si in Nationalrot nachegrütscht, wo de Jean-Michel Cina vo dete in d Walliser Kantonsregiirig gwechsled het. Si isch Mitglid i de Kommission für Vercheer- und Färnmeldewese, Mitglied vo de Kommission für Rechtsfroge, Mitglid vom Büro vom Nationalrot und sit em 2011 Vizepräsidenti vo de CVP-Bundeshusfraktion gsi. Zudem isch si im Präsidium vo de CVP Oberwallis.

Bi de Bundesrotswahle am 5. Dezämber 2018 isch d Amherd zur Nachfolgeri vo de Doris Leuthard gwählt worde, und si isch dadermit di acht Frau überhaupt, wo i de Bundesrot gwählt worde isch.[1][2][3][4][5]

Bi de Wahle vom Bundesroot am 11. Dezämber 2019 het die Vereinigti Bundesversamlig d Viola Amherd mit 218 Stimme (vo 243) wider is Amt gwählt.[6] Das isch schynts s zwöitbeschten Ergäbnis vo allne bishärige Bundesrootswahle.[7]

WeblinkBearbeite

  Commons: Viola Amherd – Sammlig vo Multimediadateie

FuessnooteBearbeite

  1. Die Resultate auf einen Blick d Bundesrotersatzwahl uf srf.ch vom 5. Dezember 2018
  2. En réalisant une élection parfaite, Viola Amherd se révèle elle, tout comme un nouveau Valais Artikel uf lenouvelliste.ch vom 5. Dezember 2018
  3. Viola Amherd: Die diskrete Politikerin Artikel uf handelszeitung.ch vom 5. Dezember 2018
  4. Landesmutter Viola Amherd Artikel uf blick.ch vom 5. Dezember 2018
  5. Walliser Bote: Viola Amherd im ersten Wahlgang mit 148 Stimmen gewählt Artikel uf 1815.ch vom 5. Dezember 2018
  6. Bundesratswahlen. Starkes Resultat für Verteidigungsministerin. Viola Amherd (CVP) im Amt bestätigt Artikel uf 1815.ch vom 11. Dezämber 2019
  7. Bundesratswahlen 2019. Alle Bisherigen wiedergewählt – keine Bundesrätin für die Grünen Artikel uf srf.ch vom 11. Dezämber 2019