Anton Dichtel

Dr Anton Dichtel (* 18. Septämber 1901 z Brilon, Saarland; † 29. April 1978 z Fryburg) isch e dytsche Bolitiker (zerscht Zäntrum, speter CDU) gsii.

dr Anton Dichtel (1958)

Lääbe

Dr Anton Dichtel isch e Suhn vum Schrynermaischter Wilhelm Dichtel (1869-1914) un dr Wilhelmine Dichtel, geb. Dohle (1874-1947) gsii. Är isch z Brilon mit vier Gschwischterig ufgwagse: Josef (* 1905), Franz (* 1907), Albert (* 1909) un Klemens (* 1914). Dr Anton isch z Brilon vu 1907 bsio 1915 uf d Volksschuel gange un het noch em Erschte Wältchrieg vu 1920 bis 1933 as Sekretär vu dr chrischtlige Fabrik- un Transportarbaitergwerkschaft z Brilon, z Essen, z Halle, z Magdeburg, z Berlin un ab 1924 z Fryburg im Brysgau gschafft.

Syt Ändi 1920er Johr het si dr Dichtel au bolitisch engaschiert. Är het em Vorstand vu dr Zäntrumsbartei aaghert un isch fi die Bartei au Mitglid im Gmairot vu dr Stadt Fryburg gsii. Im Dritte Rych het er syni Ämter verlore, isch zytwylig verhaftet gsii un het derno vu 1933 bi 1946 in ere Fryburger Lääbesmittelgroßhandlig gschafft, zletscht as Prokurischt.

Noch em Zweete Wältchrieg isch dr Dichtel Grindigsmitglid vu dr CDU gsii, fir die isch er wider in Gmairot z Fryburg yyzoge, speter het er au em Bundesvorstand vu syre Bartei aaghert. Anne 1946 isch dr Dichtel im Staatssekretariat Wohleb churzi Zyt Staatskommissar fir Ernehrig z Sidbade gsii. Är isch au in Landdag vum Land Bade gwehlt wore, wu s bis 1952 gee het. Im badische Landdag isch er Vorsitzer vu dr CDU-Fraktion gsii. Wu s Land Bade-Wirttebärg bildet woren isch, het dr Dichtel ab 1953 as Staatsrot mit Stimmrächt dr Kabinett unter em Minischterbresidänt Gebhard Müller aaghert. Am 6. Mai 1958 isch er us däm Amt uusgschide, wel er zum Regierigsbresidänt vum Regierigsbezirk Sidbade ernännt woren isch. Sy Noofolger as Staatsrot im Kabinett Müller isch dr Hans Filbinger wore. Scho am 1. Oktober 1957 het dr Dichtel uf sy Mandat as Abgordnete im Landdag vu Bade-Wirttebärg verzichtet ghaa, wun er syt dr Landdagswahl 1956 fir dr Wahlkrais Offeburg ghaa het. Är isch aber Vorsitzer vu dr CDU z Sidbade blibe, bis er anne 1966 au des Amt niderglait het. In syre Zyt as Regierigsbresidänt het er u. a. erschti bolitischi Noochriegskontakt ins Elsass mit em domolige Oberburgermaischter vu ColmarColmer, Joseph Rey, gchnipft, wu mit em Dichtel zäme z Fryburg unter dr Nationalsozialischte im Gfängnis ghockt isch. Sy Amtszyt as Regierigsbresidänt het anne 1967 ufghert. Derno het si dr Dichtel us dr aktive Bolitik zruggzoge. Är het aber no aafangs 1970er Johr as Guetachter in Sachen Kraisreform z Bade-Wirttebärg gschafft. Dr badisch Landdag het ihn 1949 zum Mitglid vu dr erschte Bundesversammlig gwehlt ghaa. 1959, 1964 un 1969 isch er vum bade-wirttebärgische Landdag wider in d Bundesversammlig gschickt wore.

Ehrige

Anne 1952 isch dr Dichtel mit em Steckchryz vum Verdienschtorde vu dr Bundesrepublik Dytschland, 1958 mit em Große Verdienschtchryz mit Stärn un 1967 mit em Große Verdienschtchryz mit Stärn un Schulterband uuszaichnet wore, 1967 mit em „Hebeldank“ vum Hebelbund Löörech un 1969 mit dr Johann-Peter-Hebel-Plakette. 1975 het er d Verdienschtmedaille vum Land Bade-Wirttebärg kriegt. 1971 isch er Ehreburger vu dr Stadt Fryburg im Brysgau wore, 1967 vu Chrozige, 1968 vu Bernau un 1969 vu Bellige. Derzue isch er Ehresenator vu dr Universitet Fryburg gsii.

Anne 1965 isch er vum Kardinal-Großmaischter Eugène Kardinal Tisserant zum Ritter vum Ritterorde vum Hailige Grab zu Jerusalem ernännt un am 2. Juni 1965 z Rom inveschtiert wore. Är isch zletscht Offizier vum Orde gsi.

Privatlääbe

Dr Dichtel het z Brilon anne 1926 d Maria Tilly (1906-1976) ghyrote. Mit ire ht er drei Chinder ghaa: Angela Dichtel (* 1930), Irmgard Dichtel (* 1932) un Robert Dichtel (* 1934)

Weblink

• dr Anton Dichtel uf leo-bw, em landeskundlige Informationssischtem Bade-Wirttebärg
• Online-Findbuch Landesarchiv Baden-Württemberg, Staatsarchiv Freiburg, T1 Dichtel, Anton

Fueßnote

Dä Artikel basiert uff ere fräie Übersetzig vu dere Version vum Artikel „Anton_Dichtel“ vu de dütsche Wikipedia. E Liste vu de Autore un Versione isch do z finde.