Stefan Mappus

ditsche Bolitiker
Dialäkt: Undermarkgreflerisch

Dr Stefan Mappus (* 4. April 1966 z Pforze) isch e dytsche Bolitiker vu dr CDU. Är isch vum 10. Februar 2010 bis zum 12. Mai 2011 Minischterbresidänt vu Bade-Wirttebärg gsi, derzue isch er vum 20. Novämber 2009 bis zum 23. Juli 2011 Landesvorsitzende vu dr CDU Bade-Wirttebärg gsii.

Stefan Mappus 2010

Uusbildig un Beruef ändere

Vu 1972 bis 1976 isch dr Mappus uf d Grundschuel z Mihlacker-Enzberg gange un derno bis zum Abitur 1985 uf s Theodor-Heuss-Gymnasium z Mihlacker. No dr Uusbildig zem Induschtriichaufmann bi dr Standard Elektrik Lorenz z Pforze het er ab 1987 syy Grundwehrdienscht bim Raketeartilleriibataillon 122 z Philippsburg gleischtet, wu dodmol dr 12. Panzerdivision unterstellt gsi isch.

Vu 1988 bis 1993 het dr Mappus Wirtschafts- un Sozialwisseschafte an dr Universitet Hoheheim studiert un het dr Abschluss as Diplom-Ökonom gmacht. Vu 1993 bis 1995 isch er Wisseschaftlige Mitarbeiter am Lehrstuehl fir Bolitischi Wisseschafte an dr Universitet Hoheheim gsi. 1995 bis 1998 het er im Beraich Verdrib vu Telekommunikationsaalage bi dr Siemens AG z Stuegert gschafft.

Ändi Augschte 2011 het er si us dr Bolitik zruggzoge un het zum 1. Septämber 2011 bim Pharma- un Chemiekonzern Merck e Fierigsposition im Uusland ibernuu.[1] Zum Johresänd 2011 het er syy Arbet fir Merck uffgee.[2]

Im Novämber 2012 het dr Mappus as Beroter vum Vorstand bim IT-Berotigsunternämme pmOne AG aagfange (Stand: Juli 2014).[3]

Bolitischi Arbet ändere

 
Dr Stefan Mappus bin ere CDU-Chreisvorstandssitzig (2007)

Dr Stefan Mappus isch anne 1983 in di Jung Union yydrätte un 1985 in d CDU. Vu 1988 bis 1990 isch er Chreisvorsitzende vu dr Junge Union Enzchreis/Pforze gsi un vu 1989 bis 2002 Mitglid im Landesvorstand vu dr Junge Union Bade-Wirttebärg. Syt 1994 isch er Chreisvorsitzende vu dr CDU Enzchreis/Pforze un ab 2005 stellverdrättende Landesvorsitzende vu dr CDU Bade-Wirttebärg.

Vu 1989 bis 1995 isch er Mitglid vum Gmeirot vu dr Stadt Mihlacker gsi un vu 1994 bis 1995 Chreisrot im Enzchreis. Syt 1996 isch dr Stefan Mappus as Inhaber vum Diräktmandat vum Landdagswahlchreis Pforze Mitglid vum Landdag vu Bade-Wirttebärg. Bi dr Landdagswahl 2001 isch d Ute Vogt, d Landesvorsitzende un Spitzekandidati vu dr SPD Bade-Wirttebärg fir s Amt vum Minischterbresidänt im nämlige Wahlchreis aadrätte. D Ute Vogt het im Wahlchreis e Stimmezuewags vu 13,5 Prozäntpinkt gschafft, des het aber nit glängt fir s Diräktmandat[4]

Vu 1998 bis 2004 isch dr Mappus bolitische Staatssekretär im bade-wirttebärgische Minischterium fir Umwält un Verchehr gsi un 2004 bis 2005 Umwält- un Verchehrsminischter. Är isch am 21. April 2005 as Noofolger vum Günther Oettinger, wu Minischterbresidänt vum Land woren isch, in ere Champfabstimmig geg dr Peter Hauk zum Vorsitzende vu dr CDU-Landdagsfraktion gwehlt wore. No dr Landdagswahl am 26. März 2006 isch er mit ere großer Mehrheit in däm Amt bstetigt wore.

Am 24. Oktober 2009 het dr Mappus erklärt, ass er bereit sej, dr Noofolger vum bade-wirttebärgische Minischterbresidänt Oettinger z wäre, wu im Zug vu dr Bildig vu dr neje schwarz-gele Regierigskoalition z Berlin as neje EU-Kommissar nominiert woren isch.[5] Zwe Däg speter hän s Landesbresidium un dr Landesvorstand vu dr CDU gschlosse fir d Nominierig vum Stefan Mappus fir s Minischterbresidänteamt gstimmt.[6] Derzue isch dr Mappus as Spitzekandidat fir d Landdagswahl 2011 nominiert wore[7] un am 20. Novämber 2009 zum neje Landesvorsitzende vu dr CDU Bade-Wirttebärg gwehlt wore. Am 10. Februar 2010 isch er im bade-wirttebärgische Landdag mit 83 vu 139 Stimme zum Minischterbresidänt gwehlt[8]. Dodermit het er ei Stimm weniger iberchuu wie di schwarz-gel Koalition Stimme im Landdag het.

Syt em Jänner 2011 isch er Bevollmächtigte fir di dytsch-franzesisch kulturäll Zämmearbet.[9]

Bi dr Landdagswahl z Bade-Wirttebärg 2011 het d CDU unter em Mappus mit 39 Brozänt 5,2 weniger as 2006 iberchuu un wäg em guete Abschnyyde vu dr Griene zem erschte Mol syt fascht 58 Johr d Regierigsmehrhait verlore, wel di Griene mit dr SPD zäme ne Koalition bildet hän. As Konsequenz het dr Mappus aagchindet, syy Amt as Landesvorsitzende vu dr CDU ab Mai z Verfiegig z stelle, aber au syy Landdagsmandat behalte z welle.[10]

Mit dr Wahl vum Winfried Kretschmann zum neie bade-wirttebärgische Minischterbresidänt am 12. Mai 2011 isch em Mappus syy Amtszyt z Änd gange.

Ändi Augschte 2011 het er syy Landdagsmandat niderglait[1] Fir ihn isch d Zwootkandidati Marianne Engeser noogruckt.[11]

Fir dr Chauf vu dr EnBW dur s Land in syre Zyt as Minischterbresidänt isch dr Mappus stark kritisiert wore. Ihm isch vorghalte wore, dr Chaufbryys sei z hoch gsii. Im Juli 2012 d Staatsaawaltschaft Stuegert im däm Zämmehang Ermittlige gege dr Mappus wäg em Verdacht vu Uudreji ufgnuu. Am 28. Oktober 2014 sin die Ermittlige yygstellt wore.[12]

Kontroverse ändere

Im Zug vu dr umstrittene Druurreed, wu dr bade-wirttebärgisch Minischterbresidänt Günther Oettinger 2007 zum Dod vum Hans Filbinger ghalte het, het dr SPD-Landdagsabgordnete Thomas Knapp uf eme Chreisbarteidag au em Mappus schwäri Vorwirf gmacht, är diej unter anderem am rächte Rand fische. Wel dr Knapp e Unterlassigserklärig abglähnt het, het dr Mappus e Aadrag uf e einschtwyyligi Verfiegig gstellt, wu aber vum Landgricht Karlsrueh am 31. Mai 2007 abglähnt woren isch.[13][14]

Wu anne 2005 dr CDU-Sozialminischter Andreas Renner d Schirmherrschaft fir dr Christopher Street Day Stuegert ibernuu het, het dr Stefan Mappus em grote, CDU-Bolitiker sotte besser ewäg blyybe vun eson eme "frivolen, karnevalesken Zurschaustellen sexueller Neigungen". Är heb kei Nochholbedarf in Sache Toleranz, aber do deet versuecht wäre, "auf eine für mich abstoßende Art und Weise eine Woche lang Veranstaltungen durchzubringen, die wir ablehnen".[15].

Wu d Bundesjuschtizminischteri Brigitte Zypries (SPD) im Summer 2009 ne Adoptionsrächt fir Homo-Baar gforderet gha het, het dr Mapuus kritisiert: „Kinder sind denkbar ungeeignet für Experimente im Bereich der gleichgeschlechtlichen Lebenspartnerschaften und bedürfen dem besonderen Schutz der Gesellschaft“.[16]

Dr Stefan Mappus isch ein vu dääjenige Bolitker gsi, wu dergege gsi sin, ass yydraiti Läbensbartnerschafte in dr Dröuzimmer vu dr Standesämter gschlosse wäre. Dr Dibenger Oberburgermeischter Boris Palmer (Bündnis 90/Die Grünen) het wäge däm im Oktober 2009 gsait, dr Mappus heb z verantworte, „dass sich schwule und lesbische Paare in baden-württembergischen Kfz-Zulassungsstellen trauen lassen“ mießte.[17]

Im Johr 2003 het dr Mappus z Pforze versuecht, d Uusstellig Neofaschismus in der BRD z verhindere, wel dert e baar Bolitiker e inhaltligi Nechi zum Rächtsextremismus unterstellt wore isch.[18]

Privat ändere

Dr Mappus isch evangelisch un stammt us ere Schuemacherfamilie vu Mihlacker-Enzberg[19]. Är isch syt 2001 ghyrote mit dr Susanne Verweyen-Mappus vu Kleve, dr ehmolige Landesgschäftsfiereri vu dr CDU Bade-Wirttebärg[20]. Si hän zämme zwe Sihn.

Fueßnotte ändere

  1. 1,0 1,1 shs: Stefan Mappus zieht es in die Ferne. In: Süddeutsche Zeitung vum 5. Augschte 2011
  2. Mappus steigt bei Merck aus, abgruefen am 3. Dezämber 2011.
  3. Claus Hecking: Baden-Württembergs Ex-Ministerpräsident: Was wurde eigentlich aus... Stefan Mappus?, Spiegel, 30. Juli 2014
  4. Die Landtagswahlen 2001 in Baden-Württemberg und Rheinland-Pfalz und die Kommunalwahlen in Hessen. cosmopolis.ch Nr. 25/2001 vum 3. April 2001
  5. Mappus will Oettingers Nachfolger werden. Spiegel Online vom 24. Oktober 2009
  6. Klares Votum für Mappus. Focus Online vom 26. Oktober 2009
  7. CDU nominiert Mappus als Oettinger-Nachfolger. stern.de vom 26. Oktober 2009
  8. Abstimmung im Landtag: Mappus ist neuer Ministerpräsident Archivlink (Memento vom 12. Februar 2010 im Internet Archive), Stuttgarter Zeitung, 10.02.2010
  9. Neuer Bevollmächtigte für die deutsch-französische kulturelle Zusammenarbeit: Stefan Mappus. Abgruefen am 15. Dezember 2010. (Site cha nüme abgrüeft wärde; Suche im Webarchiv)[1] [2] Vorlage:Toter Link/www.europaeische-bewegung.de
  10. Brüderle und Mappus treten von Parteiämtern zurück, abgruefen am 28. Merz 2011.
  11. Ex-Regierungschef Mappus geht in die Pharmabranche. In: swr.de vum 4. Augschte 2011
  12. Ermittlungsverfahren wegen des EnBW-Deals mit Einstellungsverfügung abgeschlossen. In: Pressemitteilung Staatsanwaltschaft Stuttgart. 29. Oktober 2014, archiviert vom Original am 25. Dezember 2014; abgruefen am 29. Oktober 2014.
  13. Braune-Soße Streit. (Site cha nüme abgrüeft wärde; Suche im Webarchiv)[3] [4] Vorlage:Toter Link/www.ka-news.de KA-news vum 30. Juni 2007 [pdf]
  14. Mappus muss heftige Attacken hinnehmen - Antrag auf einstweilige Verfügung zurückgewiesen Badische Neueste Nachrichten vum 1. Juni 2007
  15. Schwule befürchten Intoleranz Archivlink (Memento vom 15. Dezämber 2009 im Internet Archive) Stuttgarter Zeitung, 12.12.2009
  16. Stefan Mappus und Wilfried Klenk sprechen sich gegen geplantes Adoptionsrecht für gleichgeschlechtliche Lebenspartnerschaften aus, Pressemitteilig vu dr CDU Pforzheim (Memento vom 12. Jänner 2010 im Internet Archive), 29.07.2009
  17. Grüner Palmer über CDU-Mann Mappus: "Er ist für Grüne wie mich eine Reizfigur". Spiegel Online vum 25. Oktober 2009
  18. Informatione zue dr Uusstellig un zum uffige Brief vu dr CDU Archivlink (Memento vom 10. Oktober 2010 im Internet Archive)
  19. Enzberger zu Stefan Mappus: "Immer noch einer von uns" Pforzheimer Zeitung 8.02.10 (abgruefen am 10.02.2010) Archivlink (Memento vom 24. April 2011 im Internet Archive)
  20. Stefan Mappus - das rechte CDU-Schwergewicht, Stern 10.02.2010 (abgruefen am 10.02.2010)

Weblink ändere

  Commons: Stefan Mappus – Sammlig vo Multimediadateie



  Dä Artikel basiert uff ere fräie Übersetzig vu dere Version vum Artikel „Stefan_Mappus“ vu de dütsche Wikipedia. E Liste vu de Autore un Versione isch do z finde.