Bischtum Lugano

S Bischtum Lugano (lat.: Dioecesis Luganensis) isch e Diözese vo de römisch-katholische Chile i de Schwiz.

s Bischtum Lugano

Es umfasst de Kanton Tessin. De Sitz vom Bischof isch Lugano und d Bischofschile isch d Kathedrale San Lorenzo. De Schutzpatron vo de Diözese isch de Heiligi Karl Borromäus zäme mit de Heilige Abundius und Ambrosius. I öppe 50 Gmeinde vom Bischtum wird d Mäss gmäss em Ambrosianische Ritus gfyret.

Gschicht

Im Mittelalter isch s Tessin zwüsched Mailand und Como ufteilt gsi.

d Kathedrale San Lorenzo

S Gebiet vom hütige Kanton Tessin isch syt em Ändi vom 9. Joorhunder zum Teil em Ärzbischtum Mailand und zum Teil em Bischtum Como understellt gsi. I de Mailänder Gebiet het dur de Ambrosianischi Ritus en anderi Liturgie und en andere Fäschtkaländer ggulte.

Mit dr Unabhängigkeit vom Kanton Tessin im Joor 1803 het sich s Bedürfnis nach eme eigne Bistum verschtercht, was aber am Widerstand vo Öschtrych gschiteret isch. Die konservativi Regierig vo Öschtrych het befürchtet, dass die katholischi Chile im Tessin under de Yfluss vo de liberale Tessiner Regierung grate chönnti. D Situation het sich erscht nach de Gründig vom Königrych Italie ane 1861 gänderet. Nach eme Vertrag zwüschet de Schwizerische Eidgenossenschaft und em Vatikan im Jahr 1884 sind d Tessiner Pfarrye vo de Bischtümer Como und Mailand trännt und i de Person vom Eugène Lachat, wo devor Bischof vo Basel gsi isch, eme Apostolischen Administrator understellt worde. De Lachat isch im Augschte 1885 i s Tessin gange und am 1. Novämber 1886 gstorbe.

Under dr Administration vom Vincenzo Molo, em Ärzprieschter vo Bellinzona, isch dur d Bulle Ad universam vom Papst Leo XIII. am 7. Septämber 1888 d Diözese Lugano gründet worde. Sie isch formal wyterhii als Apostolischi Administratur em Bischtum Basel understellt blybe. D Bulle Ad universam het au de Begriff Diözese gnau vermiede, wil s damals es Verbot vo de Gründig vo nüüe Bischtümer in de Bundesverfassig gäh het.

Am 8. März 1971 isch die Apostolischi Administratur vom Kanton Tessin offiziell vom Bischtum Basel losglöst worde, und Rom het em Administrator Giuseppe Martinoli de Titel vomene Bischof vo Lugano überträit. De nüüi Status vo de Diözese isch am 25. April 1971 dur en fyrlichi Mäss in de Kathedrale vo Lugano besiglet worde.

Weblink

 Commons: Bischtum Lugano – Sammlig vo Multimediadateie

• Website vom Bischtum Lugano
• Antonietta Moretti: Lugano (Diözese). In: Historisches Lexikon vo dr Schwiiz.