Riichsland Elsass-Lothringe

S Riichsland Elsass-Lothringe isch vo 1871 bis 1918 e Gebiet vom Dütsche Riich gsi und het us Däil vo de alte Landschafte Elsass und Lothringe bestande. Andersch as d Bundesstaate isch s Riichsland ummittelbar em Dütsche Kaiser understande.

Riichsland Elsass-Lothringe

Wabbe Faane Dienstfaane vom Riichsland Elsass-Lothringe 1911–1918 D Laag im Dütsche Riich   Landeshauptstadt Stroossburg Regierigsform Däil vom Dütsche Kaiserriich Staatsoberhaupt Dr Dütsch Kaiser, verdrätte dur e Kaiserlige Statthalter Bestande 1871–1918 Flechi 14.522 km² Iiwooner 1.874.014 (1910) Bevölkerigsdichti 129 Iiwooner/km² Entstande us Gebiet, wo Frankriich abdrätte het Ufgange in frz. Departemänt Moselle, Bas-Rhin, Haut-Rhin Stimme im Bundesroot 3 Stimme (sit 1911) Kfz-Kennzäiche VI A, B, C Charte Charte vo Elsass-Lothringe us em Joor 1905

Gschicht

Elsass und Lothringe si nodino vo Frankriich annekdiert worde. Noch em Dütsch-Französische Chrieg vo 1870/71, wo Frankriich usglööst und schliesslig verloore het, het s im Friide vo Frankfurt die dütschsproochige Däil vom Elsass und Lothringe an s dütsche Kaiserriich müesse abdrätte, aber au e baar hundertduusig franzöösischi Muetersprööchler si eso zu Dütschland cho. Das und dr velornigi Chrieg het die dütsch-französische Beziejige in de Joorzäänt druf belastet. Au die dütschsproochig Bevölkerig het d Annexion zu groosse Däil abgleent. E Rolle doodrbii het im Raame vom Kulturkampf, wo au im Elsass usbrochen isch, die katholischi Chille gspiilt, wo d Brotestbeweegig in dr Bevölkerig understützt het.

S Riichsland isch lang diräkt vom Riich regiert worde, aber i de Bevölcherig isch dr Wunsch nach Autonomii meh und meh aagwachse. 1911 isch es schliessli mit de dütsche Länder (fascht) gliichgstellt worde. Es het doozmool en äigeni Landesverfassig und en äiges Landesparlamänt, de Landtag vom Riichsland Elsass-Lothringe, überchoo. Doodrmit isch i Elsass-Lothringe en allgimäini Normalisierig iidrätte.

Wo dr Erst Wältchrieg für die Dütsche verlore gsi isch, isch am 9. Novämber 1918 z Berlin d Republik usgrüeft worde und am Daag druf isch dr Kaiser Wilhelm II. in d Niiderland gflüchdet. Am 11. Novämber isch dr Waffestillstand vo Compiègne in Chraft drätte, und noch däm sine Bedingige häi die Dütsche Elsass-Lothringe innerhalb vo 15 Dääg müesse ruume. Wil sdr Kaiser as Staatsoberhaupt gflüchdet isch, isch vo denn aa s Riichsland Elsass-Lothringe de facto unabhängig worde. Dr Landdaag under em Eugen Ricklin het am 11. Novämber 1918 die unabhängigi Republik Elsass-Lothringe usgrüeft, die isch aber internazional nid anerkennt worde. E Wuche spööter si französischi Drubbe im Elsass iigruckt: am 17. Novämber z Mülhuuse, denn z Colmar und Metz, und am 21. Novämber z Stroossburg. Zerst het s Däil vo dr Bevölkerig gee, wo enthusiastisch gsi si, ass s Elsass wider zu Frankriich ghöört. D Begäisterig isch aber schnäll chliiner worde, wo d Franzose mit iirer Assimilazionspolitik aagfange häi, wo äins vo de Ziil drvo gsi isch, dr lokali dütschi Dialäkt uszrotte.

Bis hüt gilt im Gebiet vom früeneren Elsass-Lothringe na tüütsches Rächt us de Kaiserzyt, s Lokàlracht ìn Elsàss-Mosel.

Administrativi Iitäiliig

S Riichsland isch in drei Bezirk uftäilt gsi:

• Bezirk Ober-Elsaß mit em Hauptort Colmer
• Bezirk Unter-Elsaß mit em Hauptort Stroßburi
• Bezirk Lothringe mit em Hauptort Metz

Weblingg

 Commons: Elsass-Lothringe – Sammlig vo Multimediadateie

• Reichsland Elsaß-Lothringen
• Reichsland Elsaß-Lothringen (Kreise und Gemeinden) 1910
• Quellen, insbes. Nr. 2 und 3, zur politischen Stimmung in Elsaß-Lothringen 1871 bis 1918
• Deutsche Festungen im Reichsland Elsass-Lothringen zwischen 1871 und 1914 – fotografische Impressionen von heute

Fuessnoote

Bundesstaate vum Dytsche Chaiserrych (1871–1918)

Dä Artikel basiert uff ere fräie Übersetzig vum Artikel „Reichsland_Elsaß-Lothringen“ vu de dütsche Wikipedia. E Liste vu de Autore un Versione isch do z finde.