Eva Herzog

D Eva Herzog (* 25. Dezember 1961^[1] z Basel) isch e Schwizer Historikere, Kulturmänidschere und Politikere (SP).

Lääbe ändere

D Herzog het vo 1981 aa Gschicht, Wirtschaftswüsseschaft und Spanisch an de Uniwersidääte Basel und Santiago de Compostela studiert und het 1988 bim Hans Rudolf Guggisberg s Lizenziaat gmacht. 1989 isch si Mitgliid vo dr Gschäftsläitig vom Veräin Dritti Wält-Lääden vo dr Region Basel worde. Vo 1990 bis 1994 het si as wüsseschaftligi Mitarbäitere bi dr Forschigsstell Baselbieter Gschicht gschafft. 1994/1995 isch si Koordinatorin vom Veräin Frauestadtrundgang Basel gsi. 1995 het si mit ere Arbet über d Gschicht vom Frauedurne im Kanton Basel-Landschaft bromowiert. Vo 1995 bis 1999 isch d Herzog Mitgliid vom Läitigstiim und dr Gschäftsläitig vo dr Kultuurwärkstatt Kasärne z Basel gsi. 2000 het si as freiberufligi Kultuurveraastaltere gschafft, denn isch si vo 2001 bis 2004 wüsseschaftligi Mitarbäitere im Vizerektorat Forschig vo dr Uniwersisäät Basel gsi.

Vo 1999 bis 2003 isch d Herzog im Verfassigsroot vom Kanton Basel-Stadt gsässe. Vo 2001 bis 2005 isch si Mitgliid vom Groosse Root und isch in dr Bildigs- und Kultuurkommissioon gsi. 2004/2005 isch si Bresidäntin vo dr SP-Frakzioon im Groosse Root gsi. Denn isch si in Regierigsroot gweelt worde als Noochfolgere vom Ueli Vischer, wo si Vorstehere vom Finanzdepartemänt gsi isch. Im Oktober 2019 isch si in dr Ständeroot gwaählt worde.^[2] Im 2022 het sy für dr Bundesroot kandidiert, aber es isch denn d'Élisabeth Baume-Schneider zur Bundesröötin gwählt worde.^[3] Im Oktober 2023 isch si als Ständeröötin widrgwählt worde.^[4]

D Eva Herzog läbt in ere Bezieig und het zwäi Chinder.

Schrifte ändere

Die «Academia de Agricultura del Reino de Galicia» und ihr Projekt zur Bebauung der «montes». Ein Beitrag zur Agrargeschichte Spaniens im 18. Jahrhundert. Basel 1988 (unveröffentligti Lizenziaatsarbet).
«Frisch, frank, fröhlich, frau»: Frauenturnen im Kanton Basel-Landschaft. Ein Beitrag zur Sozialgeschichte des Breitensports (= Quellen und Forschungen zur Geschichte und Landeskunde des Kantons Basel-Landschaft. Bd. 52). Verlag des Kantons Basel-Landschaft, Liestal 1995, ISBN 3-85673-240-3 (= Dissertation, Universität Basel, 1995).