Carlo Conti

Dialäkt: Baseldütsch

Dr Carlo Conti (* 1. Februar 1954 z Basel) isch e Schwizer Politiker (CVP) und sit 2000 Regierigsroot vom Kanton Basel-Stadt. Er isch Vorsteher vom Gsundhäitsdepartemänt Basel-Stadt.

Dr Conti het 1973 d Matur am Basler Wirtschaftsgümnasium gmacht und denn bis 1978 Jurisprudänz an dr Universidäät Basel studiert. 1982 het er s Aawaltspadänt überchoo und het denn bis 1985 as Aawalt gschafft. Bis 2000 isch er bi dr Hoffmann-La Roche as Läiter vo dr Rächtsabdäilig aagstellt gsi.

Dr Conti isch 1978 politisch aktiv worde, won er Gschäftsfüerer vo dr CVP Basel-Stadt worden isch. Vo 1983 bis 1992 und wider vo 1997 bis 2000 isch er für d CVP im Groosse Root, em Basler Kantonsparlamänt, gsässe. Vo 1991 bis 1999 isch er Bresidänt vo dr Kantonalpartei CVP Basel-Stadt gsi. Im Joor 2000 isch er in Regierigsroot gweelt worde, 2004 und 2008 isch er im Amt bestäätigt worde.

Am 7. Januar 2014 het er bekannt gee, ass er im Summer wurd zruggdräte. Dr Grund drfür isch dää, ass er sit 2005 im ganze 111'000 Franke an Honorar nit korräkt abgrächnet het.

Weblingg

• Dr Carlo Conti uf dr Website vom Kanton Basel-Stadt

Fuessnoote

Dä Artikel basiert uff ere fräie Übersetzig vum Artikel „Carlo_Conti_(Politiker)“ vu de dütsche Wikipedia. E Liste vu de Autore un Versione isch do z finde.