Metropoolregioon Baasel

Dialäkt: Baseldütsch

D Metropoolregioon Baasel isch äini vo fümf Metropoolregioone vo dr Schwiz wie si s schwizerische Bundesamt für Statistik (BFS) definiert het. D andere Metropoolregioone si: Züüri, Gämf-Losann (Arc Lémanique), Bärn und Tessin.

Noch dr aktuell gültige Volkszelig vo 2000 lääbe in dr änger gfasste trinazionaale Agglomerazioon Baasel 830'000 Mensche,^[1] wääred die witlöifigeri Metropoolregioon Baasel gmääss em Bundesamt für Ruumentwicklig rund 1,3 Millioone Lüt in dr Schwiz, Südwestdütschland und Ostfrankriich umfasst.^[2]

Wirtschaft und Kultuur

D Metropoolregioon Baasel goot über d Landesgränze uuse und isch e trinazionaale Lääbens- und Wirtschaftsruum. Dr Forschigs- und Wirtschaftsberiich «Life Sciences» (mit internazionaalen Firmesitz vo dr farmazöitische und dr chemische Industrii), Banke (Bank für en Internazional Zaaligsusgliich), Dransbort und Logistik (Binnehaafe vo dr Schwiz), Mässwääse (Basel World, Art Basel) und Kultuur (3-Sparte-Theater, Beyeler-Museum) si im Gebiet wo men em au «metrobasel» säit, bsundrigs stark verdräte. D Regioon het mit em EuroAirport Basel-Mulhouse-Freiburg au e Flughaafe, wo in de letschte Joor stark gwaggsen isch.

Es git no anderi Begriff für e urbaan Ruum Baasel, nämlig RegioTriRhena, Trinazionaale Öirodistrikt Baasel (TEB) und Trinazionaali Agglomerazioon Baasel (TAB). D RegioTriRhena, wo sich äänlig wie «metrobasel» zämmesetzt und sich witer gege Norde (Dütschland und Frankriich) usdeent, zelt 2,3 Millioone Iiwooner. Us dr Sicht vo dr Standortpromozioon «BaselArea.swiss»^[3] ghööre d Kantöön Baasel-Stadt, Baasel-Landschaft und Jura zur Regioon Baasel.