Eveline Widmer-Schlumpf

D Eveline Widmer-Schlumpf (* 16. März 1956 z Fältschbrg bi Chur) isch e Schwiizer Politikerin vo de Bürgerlich-Demokratische Partei. Sit em 1. Jänner 2008, damals no als Mitglid vo de SVP, isch si Mitglid vom Bundesrat. Im Johr 2012 isch si Bundespräsidentin vo de Schwiiz gsi. Am 28. Oktober 2015 het d Widmer-Schlumpf ihre Ruggtritt us em Bundesrot per Endi 2015 bekannt gää.

Eveline Widmer-Schlumpf (2011)

Usbildig, Bruef un Privats

D Eveline Widmer-Schlumpf isch d Tochter vom Altbundesrat Leon Schlumpf. Si isch z Fältschbrg ufgwachse und wohnt au hüt dert. S Gymnasium het si z Chur bsuecht und im Johr 1976 d Prüefig für d Matura Typus B bstande. Si het dann a de Uni Züri Jus studiirt und mim Lizenziat abgschlosse. Sit 1983 het si s Bündner Awaltspatent, sit 1986 s Bündner Notariatspatent un im Johr 1990 het si a de Uni z Züri promovirt. Vo 1987 bis 1998 het d Eveline Widmer-Schlumpf als Rechtsawältin un Notarin gschaffet. Ghürote isch si mit eme Bauingenieur un di beide hei drei Chind. Si isch Bürgeri vo Fältschbrg un Mönchaltorf.

Politischs

Vo 1994 bis 1998 isch si z Graubünde im Grosse Rat gsi. Als erschti Frau isch si am 15. März 1998 zur Regierigsrätin z Graubünde gwählt worde. un het d Leitig vom Finanz- un Militärdepartement übernoh. I de Johr 2001 un 2005 isch si Regirigspräsidente vo Graubünde gsi.

Bi de Bundesratswahle 2007 isch si im zweite Wahlgang mit 125 Stimme bi erem absolute Mehr vo 122 Stimme zur Bundesrätin gwählt worde. De unterlegene Christoph Blocher het 115 Stimme übercho. Ihri Wahl het en risige Striit bi de SVP usglöst. Scho vorher het d Fraktionsführig vo de SVP aakündt gha, dass es SVP-Mitglid, wo e allfälligi Wahl dät aanäh, us de Fraktion dät usgschlosse werde. D Eveline Widmer-Schlumpft het deswäge en Tag Bedenkziit bruucht, wo si überlegt het, ob si d Wahl wot aanäh. Am 13. Dezämber 2007 het si d Wahl aagnoh. Mit ihrer Wahl zur Bundesrötin sin ersachtmols drei Fraue gliichzitig i de Schwiizer Regirig un nach em Eugène Ruffy isch si s zwait Mitglid vom Bundesrot, wo scho de Vater isch im Bundesrot gsi.

D SVP het dann zerscht welle d Eveline Widmer-Schlumpf us de Partei ussschliesse. Weil des nach de Statute numme d Kantonalpartei het chönne mache un di sich gweigeret het, het de Zentralvorstand vo de SVP Schwiiz am 1. Juni 2008 di ganzi Bündner Kantonalsektion usgschlosse. D Kantonalsektion het sich dann zerscht in BPS umgnennt, spöter in BDP Graubünde. Uf de 1. November 2010 het si vom Eidgenössische Juschtiz- und Polizeidepartement (EJPD) ins Eidgenössisch Finanzdepartement (EFD) gwächslet.

Am 9. Dezämber 2015 isch an iirem Blatz dr Waadtländer SVP-Maa Guy Parmelin in Bundesroot gweelt worde.

Publikatione

• Voraussetzungen der Konzession bei Radio und Fernsehen, Dissertation Zürich 1990, Basel 1990, ISBN 3-7190-1157-7.

Literatur

• Esther Girsberger: Eveline Widmer-Schlumpf. Die Unbeirrbare. Orell Füssli, Zürich 2011, ISBN 978-3-280-06124-4.
• Eveline Widmer-Schlumpf im Munzinger-Archiv (Artikelaafang frei abruefbar)

Weblink

 Commons: Eveline Widmer-Schlumpf – Sammlig vo Multimediadateie

• Publikatione vo dr Eveline Widmer-Schlumpf in dr Kantonsbibliothek Graubünden
• Eveline Widmer-Schlumpf uf admin.ch
• Porträt vo dr Eveline Widmer-Schlumpf uf dr Internetsite vom EJPD (Memento vom 4. März 2008 im Internet Archive)
• Eveline Widmer-Schlumpf Schweizerin des Jahres 2008 Artikel uf swissinfo.ch vom 11. Januar 2009

Fuessnote

Vorgänger Christoph Blocher

Mitgliid im Schwiizer Bundesrat 2008-2015

Nochfolger Guy Parmelin

Dä Artikel basiert uff ere fräie Übersetzig vum Artikel „Eveline_Widmer-Schlumpf“ vu de dütsche Wikipedia. E Liste vu de Autore un Versione isch do z finde.