Reformierti Chile Birmischtorf

Di reformiert Chile Birmischstorf ligt am weschtliche Dorfrand vo BIrmischtorf uf eme Hügel, wo Räbe düent wachse. Si isch am 28. Juni 1936 iigweiht worde.

Ref. Chile Birmischtorf

Vorgschicht

Birmischtorf isch sit de Reformation es paritätischs Dorf gsi. Beidi Konfessione hei sich di alti Dorfchile teilt un die Chile het au sit em 1718 beiden Konfessione jewiils zur Hälfti ghört. Am 20. August im 1930i het di katholisch Chilegmeind für 35'000 Schwiizer Franke de reformiert Aateil gchauft.

Gschicht vo de Chile

Nach lange Diskussione het die reformiert Chilegmeind bschlosse, en eigeni Chile z baue. De Bollrai am weschtliche Dorfrand isch als Schtandort uusgsuecht worde. D Chile het de Albert Maurer, en Architekt vo Rüschlike, planet. Bauet worde-n-isch si vo Vogelsanger und Maurer, em Architektebüro, wo de Albrecht Maurer dezue ghört het. D Iiweihig isch am 28. Juni 1936 gsi. Wil s Gäld chnapp isch gsi, het d Chilegmeind erscht emol uf d Turmuur und d Orgle verzichtet. Beides het me im 1952 aber chönne nochehole. D Chile isch es typische Chilebau vom Noie Baue und schtoot unter kantonalem Schutz.

Usstattig

De Chorruum isch mit eme Wandbild vom Kunschtmaler Eugen Maurer vo Böiju gmalet. Es zeigt de Uferschtandne Chrischtus, wo sine Jünger am See Genezareth erschiint (Joh. 21). D Glasfeischter uf de Südsite zeiget di vier Evangelischte. Im Johr 1952 het d Chile en Orgle mit 17 Regischter übercho. Au d Uur isch in dem Johr iibauet worde. Sit em 1956i het d Chile es elektrischs Glüt.

An Pfingschte im 1995i isch e drüteiligi Figuregruppe und en Abigmahlstisch in de Chorruum vo de Chile iigfüegt worde, wo vom Ruedi Sommerhalder und em Otto Strauss gschtaltet worde-n-isch.

Glüt

S Glüt vo de Chile isch urschprünglich vo de Schtadtchile vo Länzbrg. Zwei Glocke, wo zum Iischmelze a d Glockegiiserei Rüetschi z Aarau verchauft worde sind, het d Chilegmeind erscht chönne uslähne und schpöter chönne günschtig chaufe. Di andere beide sind vo de Iiwoonergmeind Länzbrg usgleent. Im 2002 isch eini vo dene Gloggene, wo ursprünglich vo de Chile Schtaufbärg gsi isch, wider dert anne cho und me het z Birmischtorf e noii uffezoge.

Weblink

 Commons: Reformierte Kirche Birmenstorf – Sammlig vo Multimediadateie

47.4636258.24455

Dä Artikel basiert uff ere fräie Übersetzig vum Artikel „Reformierte_Kirche_Birmenstorf“ vu de dütsche Wikipedia. E Liste vu de Autore un Versione isch do z finde.