Rhyschteeg Neuhuusè–Flurlingè

Dè Rhyschteeg Neuhuusè–Flurlingè isch è Brugg, wo i dè Schwiz dè Rhy bi Kilometer 46,855 übberschpannt un d Gmeind Neuhuusè im Kanton Schaffuusè mit dè Gemeind Flurlingè im Kanton Züri vobindet. Dè Brugg wyst a dè Sitè è Trottoir- un Velowäg uff. I dè Mitti isch è einschtreifigi, ampelgschtuèrti Faarbaan vorhandè, wo vo Chraftfaarzüüg mit eim Högschtgwicht vo 4 Tonnè befaarè wörrè darf.

Rhyschteeg Neuhuusè–Fluringè

Flussjoch

Hischtoriè

S Bauwärch isch 1921 mit èrè 2,5 Meter breitè Faarbaan un èm 1,0 Meter breitè Trottoir baut worrè. Dõdeby hèt dè Kanton Züri, wo è grössers Intresse a sellèm Bauwärch ghaa hèt, 86,5 Brozènt vo dè Bauköschtè un 75 Brozènt vo dè Unterhaltsköschtè übbernõ. È Inschtandsetzig isch 1949 durrègfüürt worrè, im Johr 1957 isch èn Umbau vom Steeg für 322'000 Frankè gmacht worrè. Mò hèt d Staalkonschtruktion voschtärkt, demit dè Faarschtreifè uff 3,0 Meter vobreiterèt un beidsitig 1,45 Meter breiti Trottoir uff Konsolè aagordnet wörrè hèn chönnè. È witeri Sanyrig im Johr 1992, unter andrem mit èm neuè Korrosionsschutz, hèt 630'000 Frankè koschtet.

Bauwys

Dè 99 Meter lange un 3,6 Meter hoche Bruggèübberbau hèt zwei trapezförmig uusbildeti stäälerni Hauptdräger un è unnè ligendi Faarbaanblattè uss Bedong. D Trapezdräger wysèd è dreifäldrigs Strebèfachwärch mit Pföschtè uff. Dè Durchlaufdräger mit Stützwittènè vo 25,0, 49,4 un 24,6 Meter isch s Bauwärchssischteem in Längsrichtig.

Vokeersaabindig

Dè Rhyschteeg bi Flürlingè diènt grundsätzlich im lokale Vokeer zwǜschem Dorf Flurlingè uff dè linkè Rhysitè im Zürcher Wyland un èm Induschtryschtandort Neuhuusè am rächtè Rhyufer. D Neuhuuser Zuèfaart gòt übber d Baanhofsstrǒß vom Baanhof Neuhuusè, am südlichè Ènd vum Baanhof unter dè Baanlinniè Züri-Schaffuusè durrè un übber è Gwerbeareal abbè zum Rhyufer. Bi dè Zürcher Sitè gòt d Zuèfaart vom A4-Aaschluss hoch a dè linkè Rhywangè übber d Ortdurchfaart vo Flurlingè bis zum Zürcher Widerlager vum Rhyschteeg am Dorfrand vo Flurlingè. Well di yheimischè un d Autofaarer mit Navi d Vorzüüg von èrè Umfaarig vum Stadtgebièt vo Schaffuusè wôrend dè Stosszitè kennè- un schätzèglernt hèn, isch es Vokeersuffchõ insgsamt immer mee aagschtigè, bsunders Faahrer, wo vom Chläggi in Richitg Winti wän, faarèd gèrn mòl via Neuhuusè-Zèntrum witer übber dè Flurlinger Rhyschteeg bis zum A4-Aaschluss un vo dört witer gu Winti bzw. i d Oschtschwiz. Um dè regionale Vokeer z reglemenyrè, hèt d Gemeind Flurlingè dõrum è 30er - Zonè un vokeersberuhigendi Massnaamè im Zùg vo dè Ortsdurchfaart vo Flurlingè durrègfüürt. Immerhy limityrt dè Steg sèlber dè Vokeersdurchfluss durch diè einschpurigi Faarbaan un d Ampelschtüèrig.

Literadur

• Hans Rudolf Stierli, Erwin Stucki, Paul Wüst: Vor dem Bau der N4: Die Rheinübergänge zwischen Stein am Rhein und Eglisau. I dè:Rheinbrücke N4, Hrsg. Nationalstrõssèbüro vum Kanton Schaffuusè, Meier Volaag Schaffuusè 1995, ISBN 3-85801-112-6

Weblingg

 Commons: Rheinbrücke Neuhausen am Rheinfall–Flurlingen – Sammlig vo Multimediadateie

47.6821666666678.6258333333333

Di nögscht Brugg flussufwärts: Autobaanbrugg A4

Bruggene öber de Rhy

Di nögscht Brugg flussabwärts: Ysèbaabrugg bi Laufè

Dä Artikel basiert uff ere fräie Übersetzig vum Artikel „Rheinsteg_Neuhausen–Flurlingen“ vu de dütsche Wikipedia. E Liste vu de Autore un Versione isch do z finde.