Tächnischi Hochschuel Ulm
Di Tächnisch Hochschuel Ulm (dt. Technische Hochschule Ulm, churz THU; ängl. Ulm University of Applied Sciences) isch e staatligi Hochschuel fir aagwändti Wisseschafte z Ulm.
| Tächnischi Hochschuel Ulm | |
|---|---|
| |
| Gründig | 1960 |
| Drägerschaft | staatli |
| Ort |  Ulm
|
| Bundesland | Bade-Wirttebärg |
| Land | Dytschland |
| Räkter | Volker Reuter |
| Studänt*ene | 3.599 (WS 2019/20)[1] |
| Mitarbeiter*ne | 364 (WS 2019/20)[1] |
| drvo Profässer*ne | 169 (WS 2019/20)[1] |
| Website | www.thu.de |
Profil ändere
Anne 1960 isch d Vorgängerinschtituzion „Staatliche Ingenieurschule Ulm“ mit dr vier Studiegäng Maschineböu (Konschtrukzion), Maschineböu (Fertigung), Nochrichtetächnik un Feinwärchtächnik grindet wore. Syter 1971 het si dr Rang vun ere Fachhochschuel ghaa. Wäg em neie Landeshochschuelgsetz isch s 2006 in „Hochschule Ulm“ umgnännt wore.[2]
Syt em 1. Merz 2019 haißt d Hochschuel „Technische Hochschule Ulm“. Si het drei Standort z Ulm: Prittwitzstroß, Eberhard-Finckh-Stroß un Albert-Einstein-Allee.
In däne segs Fakultete wäre 18 Bachelor-, 7 Master- un 10 Duali Studiegäng[3] aabote:
- Fakultet Eläktrotächnik un Informazionstächnik
- Fakultet Mathematik, Natur- un Wirtschaftswisseschafte
- Fakultet Informatik
- Fakultet Maschineböu un Fahrzygtächnik
- Fakultet Produkzionstächnik un Produkzionswirtschaft
- Fakultet Mechatronik un Medizintächnik
D Hochschuel unterhaltet Kooperazionsveryybarige mit Hochschuele in 20 Länder un insgsamt 55 Partnerschafte uf allne fimf Kontinänt. Studänte*ne vu dr Hochschuel Ulm chenne ai Semschter an aire vu dr 140 Partnerhochschuele studiere bzw. ire praktisch Studiesemeschter oder iri Abschlussarbet im Uusland mache. Di Tächnisch Hochschuel Ulm bietet näbe Bachelor- un Masterstudiegäng e kooperativ Doktorat mit uusgläsene Universitete in eme Promozionskolleg aa.[4]
Mit em Projäkt vu dr „Donauhochschuele“ het d Hochschuel e internazional Netzwärch zwische Hochschuele, Universitete un Induschtry an dr Donau lang uf em Themebiet regenerativi Energy un effiziänti Energynutzig, wu verschideni Uusduschformat fir Lehr, Forschig un Entwicklig organisiert.[5]
Architäktur ändere
Dr Campus Prittwitzstroß vu dr Tächnische Hochschuel Ulm isch Ändi 1950er Johr vum Architäkt Günter Behnisch uusgschafft wore. 2001 isch er wäg dr aagwändte Montaschböuwys mit Betonfertigdail in d Lischt vu dr Kulturdänkmol ufgnuu wore un stoht syterhär unter Dänkmolschutz. Aagfange böue het me im Juli 1961. Yyzoge isch mer in d Gebei im Novämber 1962.[6]
Karakteristisch sin d Redukzion uf wenigi bruuchti Matrialie wie Beton, Stahl un Glas; di organisch Yygliderig vu dr Konschtrukzion in d Hanglag un di klar, zytlos Formsproch vu dr Gebei. As erschts groß Böuwärch vum Land Bade-Wirttebärg isch di Tächnisch Hochschuel Ulm im Rau- un Uusbau mit induschtriäll gfertigte Betondail konschtruiert wore. Wel z Dytschland d Härstellig vu unterschidligschte Betondail nit im induschtriälle Standard megli gsii isch, isch doderfir äxtra e niderländischi Tächnology bruucht wore.
Yyrichtige ändere
Forschig, Entwicklig un Transfer an dr Hochschuel Ulm hän e aigeständig Profil, wu abglaitet isch us em Bildigsufdrag vu dr Hochschuele. D Hochschuel Ulm het 12 Fakultets-Inschtitut, wu vor allem dr praxisnoche Lehr diene, wu aber au Forschigsvorhaa din duregfiert wäre. D Dachorganisazion fir d Forschigsaktivitete vu dr Hochschuel Ulm isch s Inschtitut fir aagwändti Forschig (IAF) as sälbschtständigi zäntrali Yyrichtig. S IAF macht Ressortforschig un au Ufdragsforschig fir Unternäme.
Automotive Center ändere
S Automotive Center isch Dail vum Inschtitut fir Fahrzyygsischtem (IFS). Näbe Labor-, Biro- un Wärchstattryym het s drei großi Briefständ uf Induschtryniveau[7]:
- Mobilhydraulik-Briefstand
- Rollebriefstand
- Motorebriefstand
D Briefständ wäre in dr Lehr iber d Fakultete ewäg un au in aawändigsorientierte Forschigsprojäkt in dr Fahrzyygtächnik, Fahrzyygeläktronik un Mobilhydraulik yygsetzt.
Hydraulik Kumpetänzzäntrum ändere
S Kumpetänzzäntrum Hydraulik isch e 2012 grindeti Yyrichtig, wu uusschließlig us private Mittel finanziert wird. Iber ai Million Euro sin vu dr Grindigsmitglider uf fimf Johr zuegsait gsii, go ne Plattform fir d Wyterentwicklig vu dr Hydraulik-Fachuusbildig un -Forschung schaffe un di aige Innovazionschraft sterker mache.[8] Zurzyt bindlet s Zäntrum vu dr Hochschuel Ulm d Hydraulik-Fachkumpetänz vu fascht 20 Firme im siddytsche Ruum, wu d Wettbewärbsfähigkait vun ene in hochem Maß vu qualifiziertem Noowugs mit aischlegige Hydraulik-Chänntnis abhangt. D IHK Ulm ferderet d Initiaziv mit 50.000 Euro im Johr.[9] As hochmodärni Laboruusstattig fir Lehr un aagwändti Forschig het s unter anderem e Väntil-Briefstand im Maschinelabor, e Hydraulik-Briefstand im Automotive-Center un e Briefyyrichtig fir Fluid un Elzuestandssänsore.
ZAFH Service-Robotik ändere
S Zäntrum fir Aagwändti Forschig an Fachhochschuele (ZAFH) forscht an dr Hochschuel Ulm im Beraich Service-Robotik, wu Algorithme un Verfahre entwicklet wäre, go Service-Roboter zueverlässiger, alldagsdaugliger un choschteginschtiger mache. Yygrichtet woren isch s im Rame vun ere wettbewärblige Uusschrybig as Forschigsverbund vu dr Hochschuele Ulm (Koordinator), Raveschburg-Waegaade un Mannem, go di exzellänt aagwändt Forschig im Beraich vu dr Servicerobotik bindle, sterker mache un zuen eme Exzellänzcluster uusbäue. Im Zytruum vum 1. Jänner 2008 bis 31. Merz 2013 isch s im Rame vu dr ZuechumftsoffensiveIV "Innovation und Exzellenz" un em Europäische Fond fir regionali Entwicklig (EFRE) gferderet wore.[10] S ZAFH wird iber d Ferderphase uuse as Exzellänzcluster wytergfiert un dient as Aalaufstell un Aasprächpartner fir s Innovazionsthema vu alldagsdauglige Serviceroboter.
ZAFH MikroSens ändere
Mit em ZAFH „MikroSens - Innovative Millimeterwellen-Sensorik für industrielle Anwendungen“ soll chlainere un mittlere Unternäme im Land neiartigi un hochintegrierti Millimeterwälletächnik fir verschideni Applikazionsfälder zuegängli gmacht wäre. In däm Forschigsprojäkt schaffe d Hochschuel Ulm, d Hochschuel Haalbrunn un d Hochschuel Pforze zäme mit dr Uniwersitet Ulm an dr Umsetzig vu däre Tächnik fir neii Mässufgabe, zem Byschpel in dr Produkzions- un Umwälttächnik. S Projäkt het im Septämber 2015 aagfange un isch mit rund 1,4 Millione Euro vom Land Bade-Wirttebärg un dr Europäische Union gferderet wore.[11]
Studänte*ne-Verdrättig ändere
Syt Oktober 2013 isch d Studänte*ne-Verdrättig vu dr Hochschuel Ulm verfasst unter em Name "VS Ulm". D VS Ulm setzt si fir d Belang vu dr Studänte*ne im Senat, dr Fakultetsreet un dr Studiekummissionen yy.
Näbe dr bolitische Verdrättig organisiert d VS Ulm au verschideni soziali Aktivitete an dr Hochschuel Ulm, wie d Wynäächtsfyyr, s Summerfescht Grill'n'Chill oder d Orientierigswuche bi dr Erschtsemeschteryyfierig.
Weblink ändere
Fueßnote ändere
- ↑ 1,0 1,1 1,2 Statistische Berichte Baden-Württemberg, Statistisches Landesamt Baden-Württemberg, Artikel-Nr. 3234 20001 B III 1 - j/20
- ↑ THU : Portrait. Von der SISU zur Hochschule Ulm. Januar 2014, abgruefen am 24. März 2020.
- ↑ Studium an der Hochschule Ulm. Abgruefen am 21. April 2019.
- ↑ Kooperatives Promotionskolleg der Universität Ulm und der Hochschule Ulm uf studium.hs-ulm.de vum 23. Merz 2021
- ↑ http://danubeuniversities.eu/
- ↑ Mee Informazionen im Blog-Yydrag "Architekt der Hochschule Ulm gestorben" im Blog "Updates"
- ↑ Pressemitteilung: Eröffnung AC
- ↑ http://www.hs-ulm.de/docs/institute/IFS/Hydraulik/_downloads/Flyer%20Hydraulik.pdf (Site cha nüme abgrüeft wärde; Suche im Webarchiv)
- ↑ Pressemitteilung: Kompetenzzentrum Hydraulik
- ↑ ZAFH Service-Robotik
- ↑ Pressemitteilung MWK Baden-Württemberg: 14 Millionen Euro für die Hochschule Ulm
Koordinate: 48° 24′ 31,9″ N, 9° 59′ 51″ O
|
Dä Artikel basiert uff ere fräie Übersetzig vu dere Version vum Artikel „Technische_Hochschule_Ulm“ vu de dütsche Wikipedia. E Liste vu de Autore un Versione isch do z finde. |