Werterbuech vu dr obersächsische Mundarte

Dialäkt: Undermarkgreflerisch

S Werterbuech vu dr obersächsische Mundarte (dt. Wörterbuch der obersächsischen Mundarten) erfasst d Dieläkt, wu im Frejstaat Sachse gschwätzt wäre. S Werterbuech isch e alfabetisch gordnet Bedytigswerterbuech mit hochsprochlige Stichwortaasätz.

Quälle

Quällegrundlag isch e Zetelarchiv gsi vu uugfehr 700.000 Zetel mit rund 1,5 Millione Beleg. Do het derzue ghert: Ergebnis vu diräkte Befrogige dur di wisseschaftlige Mitarbeiter, yygschickt Matrial vu Laie, uusgwärtet Frogebegematrial vu uugfehr 15.500 Frogebege, uusgwärteti Tonbandufnahme, verzetelti dieläktgeografischi Fachliteratur un Dieläktliteratur us em Arbetsgebiet.

Gschicht

S Projäkt isch anne 1928 grindet wore. Noch dr Vernichtig vum gsamte Matrial dur Brand anne 1943 isch im Johr 1955 d Arbetsstell Wörterbuch der obersächsischen Mundarten nej grindet wore unter em Dach vu dr Sächsischen Akademie der Wissenschaften, un s isch wider aagfange wore mit Sammle.

Vu 1955 bis 1977 isch d Sammlig un di wisseschaftlig Bearbeitig erfolgt, derzue d Uuswärtig un Ornig vum Sprochmatrials mitsamt dr Aafertigung vu 200 wortgeografische Charte. 1978 het mer aagfange mit Wortartikel schrybe un anne 1994 het schließlig d Vereffentlichung vum Wärch im Akademie-Verlag Berlin aagfange. Wie au bim Hesse-Nassauische Volkswerterbuech un bim Thüringische Werterbuech het mer bim Obersächsische Werterbuech d Uusarbeitig bim Buechstab L aagfange. Im Johr 2003 isch s Werterbuech abgschlosse wore un d Arbetsstell isch ufglest wore.

Mitarbeiter

Projektleiter: Prof. Dr. Rudolf Große
Arbetsstelleleiter: Dr. Gunter Bergmann
Mitarbeiter: Dr. Dagmar Helm, Dipl.-phil. Ingrid Eichler, Dr. Isolde Neumann, Dr. Horst Weber, Dipl.-phil. Lothar Wezel, Dipl.-phil. Hartmut Wittkowski, Dipl.-phil. Ingrid Wittkowski

Publikation

Band 3 (L–R) 1994
Band 4 (S–Z) 1996
Band 1 (A–F) 1998
Band 2 (G–K) 2003

Weblink

Sächsische Akademie der Wissenschaften

Dä Artikel basiert uff ere fräie Übersetzig vu dere Version vum Artikel „Wörterbuch_der_obersächsischen_Mundarten“ vu de dütsche Wikipedia. E Liste vu de Autore un Versione isch do z finde.