alliance F

D alliance F isch der gröscht Tachverband für Organisazioone vo Fraue i der Schwiiz.

Si het öpe 150 Mitgliiderverbänd und derzue öpe vierhundert Persoone als einzelni Mitgliider. Es isch e politischi Organisazioon, wo sech für d Situazioon vo de Frauen i der Gselschaft, der Familie und i der Pruefswält tuet angschiere.

Gschicht

Früener het d Organisazioon Bund Schweizerischer Frauenvereine BSF gheisse. Der BSF isch z Bärn am 26. Mai 1900 vo 17 Vereine ggründet worde und är het sich für d Emanzipazioon vo de Frauen ygsetzt. Die wichtigschte Iniziantinne sind gsi: d Helene vo Müline vo Bärn, d Camille Vidart und d Pauline Chaponnière-Chaix vo Gämf, d Marguerite Duvillard-Chavannes vo Lausanne und d Emma Boos-Jegher und d Klara Honegger vo Züri. D vo Müline isch die erschti Presidäntin vom BSF woorde.

1903 isch der BSF em Internazionale Fraueroot byträtte.

Zäme mit em Schwiizerische Verband für s Frauestimmrächt SVF het der BSF ane 1918 der politisch Vorstoss understützt, ass i der Schwiiz s Frauestimmrächt sell cho. 1928 isch er bi der Organisazioon vo der Uusstellig SAFFA, der Schwiizerische Uusstellig vo der Frauenarbet, derby gsi – 1958 het er denn die zwöite SAFFA uf d Bei gstellt. Nach em Zwöite Wältchrieg het er vom Bund verlangt, ass d Fraue öpe bi de Gschäft vo der AHV und der Muetterschaftsversicherig müsse mitreede. Und jetzt het sech der BSF, wo vorhär e bürgerlichi Organisazioon gsi isch, politisch freier posizioniert, und so isch es glunge, au der Verband vo de Arbeiterinne SP-Fraue id Tachorganisazioon ufznää.

Sid 1970 isch der Verband under em Name Bund Schweizerischer Frauenorganisationen ufträtte. Und sid 1999 heisst si alliance F.

d Presidäntinne vom Verband

• Helene vo Müline, vo 1900 bis 1904
• Pauline Chaponnière-Chaix, vo 1904 bis 1910 und nomol vo 1916 bis 1920
• Klara Honegger, vo 1911 bis 1916
• Elisabeth Zellweger, vo 1920 bis 1929
• Anne de Montet-Burckhardt, vo 1929 bis 1935
• Clara Nef, vo 1935 bis 1944
• Adrienne Jeannet-Nicolet, vo 1944 bis 1949
• Gertrud Haemmerli-Schindler, vo 1949 bis 1955
• Dora Julia Rittmeyer-Iselin, vo 1959 bis 1965
• Rolande Gaillard, vo 1965 bis 1971
• Jacqueline Berenstein-Wavre, vo 1975 bis 1980
• Sibylle Burger-Bono, 1999–2005
• Rosmarie Zapfl-Helbling, vo 2006 bis 2014
• Maya Graf, Co-Presidäntin sid 2014
• Kathrin Bertschy, Co-Presidäntin sid 2014

Lueg au

• Tachverband vo de Schwiizer Gmäinnützige Froue

Literatur

• Elisabeth Joris: Bund Schweizerischer Frauenorganisationen (BSF). In: Historisches Lexikon vo dr Schwiiz.
• Silke Redolfi: Frauen bauen Staat. 100 Jahre Bund Schweizerischer Frauenorganisationen; 1900–2000. Verlag der NZZ, Zürich 2000, ISBN 3-85823-819-8.

Weblink

• Offizielle Website