Neuhuusè Baddischè Baanhof
| Neuhuusè Bad Bf | |
|---|---|
 | |
| D Strõssèsitè vum Baddischè Baanhof z Neuhuusè | |
| Daate | |
| Kategorii | 2. Klass, 3. Klass |
| Bauform | Durchgangsbaanhof |
| Perron | 2 |
| Abchürzig | RNHN [1] |
| Eröffnig | 13. Juni 1863: offizielle Einweihung (BadStB) |
| Laag | |
| Gmeind | Neuhuusè |
| Kanton | Schaffuuse |
| Staat | Schweiz |
| Koordinate | 688125 / 281960 |
| Höchi | 440 m |
| Iisebahnstreckene | |
| Lischte vo de Bahnhööf in dr Schwiz | |
Neuhuusè Baddischè Baanhof (amtlich Neuhausen Bad Bf) isch eini vo zwei Baanschtationè vo dè Stadt Neuhuusè im Kanton Schaffuusè. Bi dè Inbedrybnaam vo dè S-Baan Schaffuusè uff èm Hochrhybaan-Abschnitt Ärzingè (Baddè)–Schaffuusè sin d Perrons vum Baddischè Baanhof volait un dè Baanhof zum Haltepungt umbaut worrè. Zämmè mit dè andrè dütschè Baanhöf uff Schwyzer Staatsgebièt ghört er zuè dè letschtè Baanhööf, wo nõch dè Baanreform z Dütschland Eigèdum vo dè BRD sin un zum uumittelbarè Bundesbsitz ghörèt.[2]
Laag ändere
Dè Baddische Baanhof lyt öppè 85 m obberhalb un 550 m èwäg vu dè Rhyfall-Gumpè. Glychzitig isch sèbbi Station öppè 550 m nordweschtlich èwäg un öppè 20 m obberhalb vum Neuhuuser Stadtzèntrum. Dè H 14, wo Schaffuusè/Neuhuusè mit èm Chläggi vochnüpfè duèt, un d H 4, wo s Schaffuuser Gebièt mit dè Zürcher Agglo vobindè duèt, zwygèd bi dè Chrützschtrõss vonènand ab, sèbbi Chrützig isch öppè 180 m vum EG resp. 110 m vum aktuèllè Hp, wo zum Baddischè Baanhof vu Neuhuusè ghörèd.
Unterhalb vo dè südöschtlichè Uusfaart kurvt d Hochrhybaan um obberè Rand vum Neuhuusemer Ortszèntrum ummè un gòt denn bis an Hochrhy bi Schaffuusè abbè. Im Aaschtyg vo Schaffuusè übber Neuhuusè un dè Baddische Baanhof bis zuè dè Beringer Ängi sait mò au d Schaffuuser Rampè.
A dè nordweschtlichi Uusfaart schlièsst sich diè chlyni Schlucht aa, wo Beringer Ängi dauft wörd. D Beringer Ängi isch glychzitig dè Scheitelpungt vum Schaffuuser Abschnitt vo dè Hochrhybaan un dè obberi Ändpungt vo dè Schaffuuser Rampè.
Infraschtruktur ändere
D Station Neuhuusè Baddischè Bf isch urschprünglich mit folgendè Komponäntè baut worrè:
- 2 Durchgangsgleis
- EG
- 2 Güètergleis (Gleis 3 & 4) mit beidsitigem Aaschluss a s Gleis 2
- Güèterschopf am Gleis 4 mit Laddekran un Bruggèwòòg
- Stumpfgleis in Volängerig vum Gleis 3/4
- 3 Stellwärch
- Lagerblatz
- Wôschhüsli
- Aborthüsli
- 2 Baanübbergäng (BÜ), nordweschtlichi un südöschtlichi Uusfaart
Ab 2013 hèt folgèndi Änderigè gää :
- Baanunterfüürig vo dè H 4 als Ersatz für dè BÜ Nordwescht
- uff dè Baanunterfüürig isch èn Hp mit zwei Sitèperrons ygrichtet worrè
- s EG isch für dè Personèvokeer stillglait worrè
Gleisaalaag ändere
Dè Baddische Bf isch vo Aafang aa mit zwei Perrongleis uusgrüschtet gsi. S Gleis 1 lyt am Huusperron, gègèübber am Gleis 2 gits èn Sitèperron. Aafänglich hèt diè BadStB iri Züüg im Linksvokeer bedribbè, d Schaffuuser Züüg sin dèmnõch uff Gleis 2, d Chläggi-Züüg uff Gleis 1 abgfèrtigèt worrè. Nõch dè Umschtellig uff Rächtsvokeer bi dè BadStB isch sèll Vofaarè gnau drüllt worrè, un d Schaffuuser Züüg haaltèd bis hüt am Gleis 1. Öschtlich vum Gleis 2 gits zwei Güètergleis (Gleis 3 & 4), wo in beidi Richtigè a s Gleis 2 aabundè sin. I dè Mitti vum Gleis 4 isch dè Güèterschopf gschtandè. Übbers Gleis 4 hèt mò dè Güèterschopf sowiè dè Lager- un Voladeblatz bediènè chönnè. Am Weschtänd vu beidè Güètergleis hèts è Stumpfgleis zuè nèrè Drèèschiibè gää. Mit sèbbèrè Drèèschiibè isch dè Induschtryaaschluss für s èrschte Alusuisse-Wärch z Neuhuusè realisyrt worrè.
Neuhuusè Bad Bf isch übber drei lokali un mechanische Stellwärch gschtüèrèt worrè. S Hauptschtellwärch isch im Ärdgschoss uff dè Gleissitè ybaut worrè un hèt d Bauform Bruchsal. Anno 2002 isch s lokale, mechanische Stèllwärch z Neuhuusè usser Bedryb gnõ worrè.[3] Allerdings isch s mechanische Stellwärch durch è ESTW z Neuhuusè ersetzt worrè [4]. S ESTW wörd sitdèm vo dè SBB fèrngschtüèrèt übber d Bedrybszèntralè Züri Oscht [5]. Well dè Baddische Baanhof in èm Gleisbogè lyt un übber relativ langi Perrongleis vofüègt, hèt mò a beidè Uusfaartè è Wärterschtellwärch in èm Stellwärchstürmli baut. Urschprünglich sin im Baddischè Baanhof Flügelsignaal nõch DB-Bauart im Ysatz gsi. D Flügelsignaal sin inzwüschè durch Ks-Lichtsignaal ersetzt worrè.
Baanübbergäng hèts am Baddischè Baanhof zwei gää, je ein a dè Nordwescht- un a dè Südoschtuusfaart. Beidi Übbergäng sin technisch gsicherèt gsi, wa bim BÜ a dè Nordweschtuusfaart, wo d H 4 d Strèggi chrützt hèt, nit anderscht z voantwortè gsi isch. Dè BÜ Nordwescht isch bim Umbau 2013 uffglöst worrè. Dè BÜ Südoscht isch bis hüt niveauglych un vobindèt è Woongebièt obsi vum Rhyfallbèggi mit dè H 14.
Hochbautè ändere
S EG bschtòt us èm Huus mit zwei Stöck un èm Satteldach mit Chrützgibbel. Im 1. Stock sin früèner Diènschtwoonigè fürs Baanhofspersonal gsi. Im Ärdgschoß uff dè Nordweschtsitè isch s Wartesäli für d Passagyr ygrichtet worrè, i dè Südoschtsitè isch dè Blatz vum Stellwärch. I dè Mitti isch d Billettuusgaab vorgsää gsi. Anno 1901 isch es EG mit ènèm zuèsätzlichè Aabau am öschtlichè Gibbl mit ènèm zuèsätzlichè Wartesäli erwitterèt worrè. S EG stòt zwar bis hüt nò, hèt sit èm Umbau vo 2013 vum Stellwärch abgsää kei Fungtion mee un isch sowitt stillglait. Bi dè Yfüürig vo dè Schaffuuser S-Baan hèt mò beidi Perron öppè 80 m Richtig Ängi volait un dõdèmit èn neuè Haltepungt hèrrè baut. Bim Hp (Stand: 2022) gits zwei übberdachti Perron am Gleis 1 un 2 sowiè èn Veloabschtellblätzli unterm Huusperron. S Perron am Gleis 2 isch mit èrè Unterfüürig a dè Zuègang vo dè H 4 zum Huusperron vobundè. Dè Güèterschopf isch us Holz gsi, wa im Standard entschprochè hèt. Im Johr 1970 isch dè Güèterschopf abgrissè worrè.
Vokeer ändere
Baanvokeer ändere
Sit èm Dezèmber 2013 vokeert d Schaffuuser S-Baan zwǜschè Schaffuusè un Ärzingè/Beringè Bad Bf mit Halt im Baddischè Baanhof z Neuhuusè im Halb-/Vyrtelschtundètagt.
- RB Schaffuusè – Neuhuusè Bad Bf – Ärzingè (SBB GmbH/Thurbo)
- RB Schaffuusè – Neuhuusè Bad Bf – Baddischè Bf Beringè (SBB GmbH/Thurbo)
D Züüg vom Interregio-Exprèss Basl Bad Bf-Bhf. Friddrichshaffè uff dè DB-Linniè IRE 3 halted un chrützèd im Bf Schaffuusè un fägèd churz vor dè S-Baan durch dè Nõchbòrbaanhof z Neuhuusè durrè. I sellnè Schnellzüüg wörd mò mèngmòl bi dè Passagè vum Baddischè Baanhof z Neuhuusè uff d Uussicht uff dè Rhyfall hyygwisè.
Autobusvokeer ändere
Nordöschtlich vum Baddischè Baanhof Neuhuusè lyt im Abschtand vu öppè 150 m d Halteschtell Neuhuusè Chrützschtrõss (amtlich: Neuhausen Kreuzstrasse) vo dè Buslinniè 1, 7 & 21 vo dè Vokeersbedryb Schaffuusè.[6].
Literadur ändere
- Schienennetz Schweiz. Usègää 1980 vum Generalsekretariat SBB. Bèrn 1980.
- Hans G. Wägli: Schienennetz Schweiz und Bahnprofil Schweiz CH+. AS Volaag, Züri 2010, ISBN 978-3-909111-74-9.
- Jürg Zimmermann: 125 Jahre deutsche Bahn auf Schaffhauser Boden. Volaag Peter Meili, Schaffuusè 1988, ISBN 3-85805-143-8.
- Rainer Gerber: 125 Jahre Basel–Waldshut: Jubiläum der Eisenbahn am Hochrhein. Ysèbaa-Kuryr Volaag, Fryburg 1981, ISBN 3-88255-789-3
- Hans Wolfgang Scharf: Die Eisenbahn am Hochrhein. Band 1: Von Basel zum Bodensee 1840–1939 (= Südweschtdütschi Ysèbaagschichtè, Band 4). Ysèbaa-Kuryr Volaag, Fryburg 1993, ISBN 3-88255-755-9.
- Hans Wolfgang Scharf: Die Eisenbahn am Hochrhein. Band 2: Von Basel zum Bodensee 1939–1992 (= Südweschtdütschi Ysèbaagschichtè, Band 5). Ysèbaa-Kuryr Volaag, Fryburg 1993, ISBN 3-88255-756-7.