Ruedolfstaal

S Ruedolfstaal – uf Französisch: Val de Ruz – isch es Taal im Jura im Kanton Nöieburg.

De Blick vom Ruedolfstaal uf d Alpe

Der Düütsch Name «Ruedolfstaal», wo sid em Middelalter bekant isch, wird hüt chuum me bruucht. S Wort ruz i dämm geografische Name chunt us der vorrömische Sprooch, wie der Nöieburger Romanischt und Nameforscher Andres Kristol ufzeigt het. Me darf s nid verwächsle mit em frankoprovenzalische Wort ruz, wo «Bach» bedüütet.

S Taal lyt zwüsche der Bärglandschaft vo Schodfoo und der Stadt Nöieburg, wo am Nöieburgersee isch. Dur s Taal lauft der Fluss Seyon, wo bi Nöieburg unden in See mündet. S Taal het e Flechi vo öppe 45 Kwadratkilometer. Im Oschte vonnem stoot d Bärgchetti vom Chaumont bis zum Chasseral ufe und im Weschte die vom Mont Racine. Über die Hööchi goot d Passstroos vo der Vue des Alpes und unde dure het’s es Dunäll vo der Kantonsstrooss und no eis für d Ysebahn.

De Lüüt i däm Piet seit me les Vaudruziens.

Früener isch s Taal im nöieburgische Bezirk Val-de-Ruz gsi; jetz het der Kanton Nöieburg keini Bezirke meh. Es git aber no d Region Val-de-Ruz.

D Ortschafte im Val de Ruz sin:

• Villiers
• Le Pâquier
• Valangin
• Cernier
• Fontainemelon
• Chézard-Saint-Martin
• Les Hauts-Geneveys
• Montmollin
• Les Geneveys-sur-Coffrane
• Dombresson
• Coffrane
• Boudevilliers
• Fontaines
• Engollon
• Savagnier
• Fenin-Vilars-Saules

Vo dene isch Valangin no en eigeni Gmeind blibe; alli andere sin sid der grosse Gmeindfusion vo anne 2013 jetz i der nöje Gmeind Val-de-Ruz zämegschlosse.

Literatur

• Maurice Evard: Val-de-Ruz. In: Historisches Lexikon vo dr Schwiiz.
• Redaktion: Val-de-Ruz (Gemeinde). In: Historisches Lexikon vo dr Schwiiz.
• Maurice Evard: Valangin (Herrschaft). In: Historisches Lexikon vo dr Schwiiz.

Weblink

• e Website über s Taal