Dänike

Däniken
	Wappe vo Däniken
Basisdate
Staat:	Schwiiz
Kanton:	Soledurn (SO)
Bezirk:	Oute
BFS-Nr.:	2572
Poschtleitzahl:	4658
UN/LOCODE:	CH DNK
Koordinate:	641048 / 245264Koordinate: 47° 21′ 25″ N, 7° 58′ 55″ O; CH1903: 641048 / 245264
Höchi:	382 m ü. M.
Flächi:	5,43 km²
Iiwohner:	2946 (31. Dezämber 2022)
Website:	www.daeniken.ch
Charte
	Charte vo Däniken

Dä Artikel behandlet e Schwizer Gmaind. Wyteri Bedütige findt me under Dänike (Begriffsklärig).

Dänike (amtlich Däniken) isch e Iiwohnergmein im Bezirk Oute im Kanton Soledurn, Schwiiz.

Geografi

Dänike liit an dr Aare im soledurnische Nideramt, am e Uuslöifer vom Enguberg. Zue dr Gmeind ghööre d Ortsteil Eich, Nöi-Dänike und Hagnau. D Gmeindsflächi umfasst 35,2 % langwirtschaftlichi Flächi, 34,8 % Waud, 28,9 % Sidligsflächi und 1,1 % suschtigi Flächi.^[2]

Nochbergmeine si Nedergösge, Obergösge, Dullike, Wauterswiu und Grezebach.

Gschicht

Dänike isch zum erschte Mou gnennt worde im Johr 1273 aus de Tennikon (1317 de Tennenkon, 1423 von Taennikon).

Bevöukerig

Quälle: Bundesamt für Statistik 2005^[3]

Johr	1850	1860	1870	1880	1888	1900	1910	1920
Iiwohner	670	655	635	655	655	836	941	953
Johr	1930	1941	1950	1960	1970	1980	1990	2000
Iiwohner	1105	1142	1286	1457	1956	2047	2429	2602

De Uusländeraateil isch 2010 bi 16,5 % gläge.^[2]

Religion

33,8 % vo dr Iiwooner si im Johr 2000 evangelisch-reformiert gsii, 34,6 % römisch-katholisch.^[2]

Politik

Bi dr Nationalrootswaale 2011 hät s das Ergebnis gää:^[2] BDP 4,1 %, CVP 12,5 %, EDU 0,5 %, EVP 1,3 %, FDP 18,5 %. GLP 3,5 %, GP 5,5 %, SP 15,6 %, SVP 35,8 %, Suschtigi 2,5 %.

Gmeindspresidänt isch dr Hans Frei (Stand 2012).

Wirtschaft

S Chernchraftwerch Gösge liit uf em Biet vo Dänike. S wird vo dr Kernkraftwerk Gösgen-Däniken AG betribe und isch siit 1979 in Betrib.

Ä wiitere grosse Arbetgeber isch d'Firma LEONI Studer AG. D'LEONI Studer AG isch es Kabelwärch a de Herremattstros und het no es Wärch a de Hogeweidstros. I de Hogeweid wird ElektroneStrahlvernetzig gmacht, das heisst verschiedeni Stoff wärde dur Beschtrahlig veränderet.

D Arbetslosigkeit z Dänike isch im Johr 2011 bi 1,9 % gläge.^[2]

Sproch und Dialäkt

Bi dr Voukszellig 2000 hei vo dr 2602 Iiwohner 89,5 % Dütsch aus Hauptsproch aagää, 0,3 % Französisch, 1,9 % Italienisch und 8,3 % angeri Sproche.^[2]

Dr hochalemannisch Dialäkt vo Dänike ghört zue dr Dialäkt vo dr Region Oute, wo ähnlech si zue dr Aargauer Dialäkt.