Flavio Cotti
De Flavio Cotti (* 18. Oktober 1939 z Muralto; † 16. Dezember 2020 z Locarno), vo Prato-Sornico TI, isch en Schwyzer Politiker (CVP) gsy.
Karriere ändere
De Cotti isch zeerscht z Ascona und nachane z Sarne i d Schuel und hät z Friburg Jus gstudiert. Nach em Lizänziat hät er as Aawalt z Locarno gschaffet.
Vo 1964 bis 1975 isch er Gmäindrat (aso Mitglid vo de Legislative) vo Locarno gsy, vo 1967 bis 1975 Mitglid vom Grosse Rat (em Kantonsparlamänt) vom Kanton Tessin und vo 1975 bis 1983 Staatsrat (Regierigsrat) vo däm Kanton. Im Staatsrat isch er em Volchswirtschafts- und Justizdepartemänt vorgstande.
1983 isch er in Nationalrat gwählt worde und dänn vo 1984 bis 1986 Presidänt vo de CVP Schwyz gsy. Am 10. Dezember 1986 er in in Bundesrat gwählt worde. Wäret synere Amtszyt isch er däne Departemänt vorgstande:
- 1987–1993: Eidgnössischs Departemänt vom Innere;
- 1994–1999: Eidgnössischs Departemänt für usswärtigi Aaglägehäite (näbet em Cotti als «Diplomat» isch 1993 au der Adolf Ogi als «Macher» für d Leitig vom EDA ghandlet worde).
Er isch Bundespräsident gsy i de Jahre 1991 und 1998 und Vizepräsident i de Jahre 1990 und 1997.
De Cotti gilt as «Vatter vo de Bilaterale» mit der EU; mit däre hät er nämli e grosses Vertragswärch uusghandlet. I synere Zyt im EDI isch au s nöi Chrankeversicherigsgsetz und s nöi AHV-Gsetz gschribe worde. Uf syn Aatrag hii isch au d «Bergier-Kommission» pildet worde, di «Unabhängig Expertekommission Schwyz – Zwäite Wältchrieg», wo s Verhalte vo de Schwyz i däm Chrieg undersuecht hät.
Am 30. April 1999 hät er sys Amt abggää; syn Rücktritt hät er am 13. Januar bekannt ggää gha.
Literatur ändere
- Fabrizio Panzera: Cotti, Flavio. In: Historisches Lexikon vo dr Schwiiz.
Weblink ändere
Commons: Flavio Cotti – Sammlig vo Multimediadateie
| Vorgänger Alphons Egli |
Mitgliid im Schwiizer Bundesrat 1987-1999 |
Nochfolger Joseph Deiss |
