Felix-Louis Calonder

De Felix-Louis Calonder (* 7. Dezember 1863 z Scuol; † 14. Juni 1952 z Züri), vo Trin GR, isch en Schwiizer Politiker (FDP) gsii.

Dialäkt: Züritüütsch (See)

De Calonder hät ab 1885 z Züri, z Münche, z Paris und z Bern Rächt gstudiert und 1889 bim Carl Hilty mit ere Dissertation über di schwiizerisch Neutralität promoviert.

1891 isch er in Bündner Grosse Rat gwählt worde, won er dänn bis 1913 pliben isch. 1893 isch er au bi de Wahle zum Chliine Rat aaträtte, aber vergäbes.

1899 isch er in Ständerat gwählt worde, aber gliichziitg au Groossrat plibe. As Ständerat hät am neue Schwiizerische Zivilgsetzbuech mitgschaffet. Er hät sich (vergäbes) für en internationali Bahnlinie via de Schplügepass und (erfolgriich) für Bundesgälder für de Bou vo de Rhätische Bahn iigsetzt.

Am 12. Juni 1913 isch er als bis jetz einzige Rätoroman in Bundesrat gwählt worde. Am 12. Februar 1920 hät er siis Amt abggee. Währed siinere Amtsziit isch er dene Departement vorgschtande:

1913-1917: Departement vom Innere
1918-1919: Politischs Departement

Er hät sich mit em Bundesrat Giuseppe Motta für de Biitritt vo dr Schwiiz zum Völkerbund engagiert. Am 16. Mai 1920 isch d Schwiiz dänn mit eme knappe Schtändemehr (11 Ja / 10 Nein) em Völkerbund biiträte.

Nach em Rücktritt us em Bundesrat hät er zäme mit em Völkerrächtsprofessor Max Huber im Konflikt zwüsched Finnland und Åland vermittlet.

Er isch Bundespresidänt gsii im Jahr 1918 und Vizepresidänt im Jahr 1917.

Literatur

Jürg Simonett: Felix-Louis Calonder. In: Historisches Lexikon vo dr Schwiiz.
Hercli Bertogg: Calonder, Felix Ludwig. In: Neue Deutsche Biographie (NDB). Band 3, Duncker & Humblot, Berlin 1957, ISBN 3-428-00184-2, S. 98 f.
Jürg Simonett: Felix Calonder. In: Urs Altermatt (Hrsg.): Die Schweizer Bundesräte. Ein biographisches Lexikon. 2. Auflage. Artemis Verlag, Zürich/München 1991, ISBN 3-7608-0702-X, S. 327–332.

Vorgänger
Louis Perrier

Mitgliid im Schwiizer Bundesrat
1913-1919

Nochfolger
Heinrich Häberlin

Dä Artikel basiert uff ere fräie Übersetzig vum Artikel „Felix-Louis_Calonder“ vu de dütsche Wikipedia. E Liste vu de Autore un Versione isch do z finde.