Ruine Urgiz

D Ruine Urgiz isch e ehemoligi Burg uf em Gmeindsbann vo Däischbere im Schwiizer Kanton Aargau. D Ruine ligt nordöschtlich vom Dorf uf eme Felsgrat öppe 120 Meter über em Tal.

Vo de Entstehigsgschicht isch wenig bekannt, aber schpöteschtens im 12. Johrhundert isch si bauet worde. In ere Urkund taucht si s erschti Mol im Johr 1277 uf, wo d Herre vo Uriols gnennt werde, wo d Burg vom Bischof von Strassburg als Lehe hei übercho. Au di beide Dörfer Däischbere und Schp, wo zämme d Herrschaft Urgiz bildet hei, hei zum Lehe ghört. Nach em 1315 werdet di Herre vo Uriols nüm gnennt und so isch di witeri Gschicht vo de Burg so unklar wi d Entstehig. Bekannt isch, dass si durch Basler Erdbäbe vo 1356i schwer beschädigt worde-n-isch. Im 1429i hei d Effinger vo Brugg s Lehe vo de Burg gha und im 1444 isch d Burg an d Familie Rätz vo Säckinge verchauft worde und im 1475i an d Hasfurter vo Lozärn. Im 1502 hei d Bärner d Herrschaft Urgiz kauft, d Burg isch damals scho e Ruine gsi. Im 1996i/97i het me d Muurrescht vo de Burg freiglägt und konserviert.