Metropooleregion Züri

D Metropooleregion Züri (oder au dr Metropolitanruum Züri) isch e grosse Siidligsruum vo dr Schwiiz.

Ane 2000 hät s Bundesamt für Statistik für d Schwiiz die geografeschi Kategorii vo de Metropoolrüüm definiert. D Geograafe kenne die Ruumydeilig au i anderne Länder. Dr Metropolitanruum vo Züri isch eini vo däne Gägende. Dernäbe gits no d Metropoolregioone vo Bärn, Gämf-Losann, Basel und vom Tessiin.

Dr Metropolitanruum vo Züri hät i dr wyte Umgäbig vo dr Stadt Züri nid nur d Gmeinde vom Bezirk Züri und fasch dr ganz Kanton Züri, sondern au no vil Gebiet vo de Nochberkantöön Aargau, Schaffuuse, Schwyz, Sanggale, Tuurgi und Zug.

S Bundesamt tuet die rüümlechi Struktur vo dr Schwiiz noch jeder Volkszeelig nöi uusrächne. So chönne sech d Areaal, wo zu dene Metropolitanrüüm ghööre, mid der Zyt verändere. Zu somene Metropoolruum zelle im Normalfall d Chärnaglomerazioon mit der zäntrale Stadt, also im däm Fall Züri, und verschidnegi anderi Aglomerazioone, wo i dr Nööchi sind und vil wirtschaftlechi und anderi Beziehige zu der Chärnregioon hend, und allefalls no wyteri einzelne Stedt im Umland.

Dr Metropolitanruum vo Züri hät noch dr Beschrybig vom Bundesamt für Statistik usser der Aglo vo Züri no zää chlyneri Aglomerazioone derzue und en Einzelstadt dezue, das isch Äisidle im obere Syldaal im Kanton Schwyz. Zäme läben i däm ganze Gebiet, wo 2103 Kwadratkilometer gross isch, öpe 1,66 Millioone Ywooner.

Vom Kanton Züri sind 127 Gmäinde (vo de gsamthaft 168 Zürcher Gmäinde) i däm Ruum, vom Aargau 58, vo Schwyz 11, vo Zug 10, vo Schaffuuse nüün, vom Tuurgi drü, und vom Kanton Sanggale sinds au drü Gmeinde.

D Aglomerazioone vom Metropoolruum Züri sind:

• D Aglomerazioon Züri hät 1,3 Millioone Ywooner i dr Chärnstadt Züri und i de 131 Gmäinde zringsetume (103 zürchereschi, 25 aargaueschi und 3 schwyzereschi Gmäinde)
• D Aglomerazioon vo Winti mit dr Chärnstadt und 11 Zürcher Gmäinde: 123'416 Ywooner
• D Aglomerazioon Baade-Brugg mit de beide Stedt und 21 anderne Aargauer Gmäinde: 106'736 Ywwoner
• D Aglomerazioon vo Zuug mit dr Stadt Zug und 9 wytere Gmäinde vom Kanton Zug: 95'557 Ywooner
• D Aglomerazioon Schaffuuse mit dr Chärnstadt Schaffuuse und 8 anderne Schaffuuser und 4 Zürcher Gmäinde: 61'399 Ywooner
• D Aglomerazioon Rappi-Jona-Rüti mit dr Stadt am Zürisee und no zwei Zürcher und zwei Sanggaler Gmäinde: 46'337 Ywooner.
• D Aglomerazioon Wetzike-Pfäfike mit dr Stadt Wetzike und vier anderne Zürcher Gmäinde: 44'015 Ywooner
• D Aglomerazioon Lache mid dr Chärngmäind Lache und sächs anderne Schwyzer Gmäinde: 31'840 Ywooner
• D Aglomerazioon Frauefäld mit dr Thurgauer Hauptstadt und zwei anderne Tuurgauer Gmäinde: 27'005 Ywooner
• D Aglomerazioon Länzbrg mit dr Stadt und sächs anderne Aargauer Gmäinde: 25'903 Ywooner
• D Aglomerazioon vo Woole im Freiamt mit drü Aargauer Gmäinde: 20'437 Ywooner

D Stadt Äisidle hät 12'622 Ywooner.

Anderi Modäll

Vo Politiker, Geograafe und Wirtschaftsfachlüüt sind für s grosse Gebiet, wo Züri drin liit, scho diväärsi anderi Nääme vorgschlage worde, wo sech nid allgemäin duregsetzt hend:

• Metropolitanregion Nordschwiiz
• Metropoole Züri
• Zürcher Wirtschaftsraum
• Greater Zurich Area

Sid ane 2009 gits en private Veräin, wo sälber au Metropolitanruum Zürich gheisst.

Weblink

 Commons: Metropolregion Zürich – Sammlig vo Multimediadateie

• Website vo dr Metropolitankonferänz Züri