Kanton Fricktal

Der Kanton Frickdaal isch e Kanton vo der Helvetische Republik gsi. Er isch us de Gebiet, wo denn zu Östriich ghört hai, bildet worde und het us de hütige aargauische Bezirk Rhiifälde und Laufeburg bestande. Der Kanton Frickdaal het’s vo 1802 bis 1803 gää.

S Wappen vom Kanton Frickdaal, hüte vo der Gmeind Schupfart

Am Ändi vom 18. Johrhundert isch der Briisgau non e Deil vo der habsburgische Provinz Vorderöstriich gsi. Au s Frickdaal, wo südlich vom Rhii lit, het derzue ghört. 1799, ei Johr noch der Usrüefig vo der Helvetische Republik, si französischi Druppe au in s Frickdaal iimarschiert. D Brüeder Karl und Sebastian Fahrländer us Etteheim und e baar anderi hai gueti Beziehige zu füehrende französische und schwiizerische Politiker gha und hai d Gründig vom ene eigeständige Kanton Frickdaal chönne duresetze. Si hai sech drbii uf d Friidensverdräg vo Campo Formio (1797) und Lunéville (1801) berüeft, wo genau das vorgseh hai.

Im Dezämber 1801 isch im Pfarrhuus vo Eike e Verfassig gschriibe worde, und am 20. Februar 1802 isch schliesslig der neu Kanton usgrüeft worde. As Hauptstadt het mä Laufeburg bestimmt. Wil der Statthalter Sebastian Fahrländer sich z energisch benoh het, isch er stark kritisiert worde und siini Gegner hai im Septämber 1802 in ere Beiz z Frick d Gmeindiverdräter zsämmegrüeft und der Statthalter für abgsetzt erklärt. D Hauptstadt isch denn uf Rhiifälde verleit worde.

D Frickdaaler hai sich diplomatisch stark bemüeht, d Uflösig vo ihrem Kanton z verhindere, aber am 19. Februar 1803, also genau noch eme Johr, het er ufgört z existiere. Dr Napoleon het am 19. März in der Mediationsakte d Verschmelzig mit de Kantön Aargau und Bade verfüegt.

Liddratur

Dominik Sauerländer: Fricktal. In: Historisches Lexikon vo dr Schwiiz.
Patrick Bircher: Der Kanton Fricktal - Bauern, Bürger und Revolutionäre an der Wende vom 18. zum 19. Jahrhundert; Forum Fricktal, Laufenburg, 2002; ISBN 3-9522417-0-9

Weblingg

Jubiläumswebsite vom Kanton Fricktal

Dä Artikel basiert uff ere fräie Übersetzig vu dere Version vum Artikel „Kanton_Fricktal“ vu de dütsche Wikipedia. E Liste vu de Autore un Versione isch do z finde.