Kanton Waldstätten

Dr Kanton Waldstätte isch e Kanton vo dr Helvetische Republik gsi, wos zwüsche 1798 und 1802/03 ggää het.

Wo d Kantonsgränze in dr Helvetische Republik 1798 neu feschtgleit worde si, het me d Kantön und Republike vo dr Innerschwiiz, wo dr neu Einheitsstaat abglehnt hai, zum Kanton Waldstätte verschmulze. Das sind d Gebiet im Süde und im Oschte vom Vierwaldstettersee gsi. Dodrdur isch dr politisch Iifluss vo dr Innerschwiiz dütlig chliiner worde, wo noch em erste Entwurf für e Kantonsiideilig im Verheltnis zur Bevölkerigszahl überproportional usgfalle wer, wil im helvetische Senat jede Kanton vier Abgeordneti het döfe stelle. Anstatt vo de 16 Sitz für d Kantön Zug (mit Freiamt und Bade), Schwyz (ohni March mit Gersau), Underwalde (Ob- und Nidwalde, Ängelbärg) und Uri (ohni d Leventina, mit Ursere), wie s ursprünglig vorgeseh gsi isch, isch d Innerschwiiz vo numme vier Senatore representiert gsi.

D Bezeichnig «Waldstätt» het uf die gmeinsami Bezeichnig vo de Urkantön Uri, Schwyz und Underwalde zrugggriffe, wo sit em Middelalter gläufig gsi isch.

Dr Kanton Waldstätt het us dene Territorie, Republike und Kantön vo dr Alten Eidgenosseschaft bestande:

Kanton Zug
Kanton Schwyz (ohni d March und d Hööf)
Kanton Uri (ohni d Leventina, mit em Ursere)
Kanton Nidwalde
Kanton Obwalde
Fürstabtei Ängelbärg (früehner e Zuegwandte Ort vo dr Eidgenosseschaft)
Republik Gersau (früehner e Zuegwandte Ort vo dr Eidgenosseschaft)

Hauptort vom Kanton Waldstätt isch zerscht dr Fläcke Schwyz gsi, ab Mai 1799 d Stadt Zug.

Dr Kanton Waldstätt isch scho in de spötere Verfassigsentwürf vo Malmaison und mit dr Zweite Helvetische Verfassig vo 1802 wider ufdeilt worde. Ändgültig isch dr Kanton aber erst dur d Mediationsakte vo 1803 ufghobe worde.

Literatur

Beat Glaus: Der Kanton Waldstätten der Helvetik 1798–1801 (1803). In: Der Geschichtsfreund 170, 2017, S. 112–151.
Renato Morosoli: Waldstätte. In: Historisches Lexikon vo dr Schwiiz.
Renato Morosoli: Waldstätten. In: Historisches Lexikon vo dr Schwiiz.

Dä Artikel basiert uff ere fräie Übersetzig vu dere Version vum Artikel „Kanton_Waldstätte“ vu de dütsche Wikipedia. E Liste vu de Autore un Versione isch do z finde.