Lutz Fischer

De Lutz Fischer (* 1. Novämber 1967 z Karlsrueh, heimatberechtigt z Wettige) isch en reformierte Schwiizer Pfarrer, Politiker (EVP), Mundartautor und Fotograf, bsunders vo Drohneföteli. Er isch Mitglid vom Grosse Rot vom Kanton Aargau, Präsident vo de reformierte Synode und betriibd sit em September 2015 zämme mit em Fabian Schmid es Mundartnochrichteportal für Wettige.

De Lutz Fischer im Januar 2024

Biografii

Usbildig

De Lutz Fischer isch 1967 z Karlsrueh uf d Wält cho u z Schdudesee ufgwachse. Dert het er au d Schuel bsuecht un 1987 mit em Abitur am Thomas-Mann-Gymnasium abgschlosse. Sin Wehrdienscht het er z Philippsburg bim Raketeartelleriibatalion 122 abgleischtet. Theologii het er z Neuendettelsau, z Marburg un z Münche studiirt. I de Johr 1995 bis 1997 het er sis Vikariat z Sandhuuse i de Nöchi vo Heidelbärg absolviert. Im Aaschluss do dra het er im Ussedienscht gschaffet, wo er Versicherige verchauft het un gliichzitig en Usbildig zum Versicherigsfachmaa abgschlosse het. Dezue ane het er e betribswirtschaftlichi Usbildig (CAS für Nichtbetriebwirtschaftler vo de FHNW).

Pfarramt

Im Johr 1998 isch er mit sinere Familie i d Schwiiz cho, wo er sini erschti Pfarrstell z Rächthaute im Kanton Fryburg gha het. Er het dete im Senioreteam vom FC Rächthaute tschutet und isch Mitglied vom Vorstand gsi. D Fryburger Chile het ihn im Juli 2000 z Murte ordiniirt. Vom Kanton Fryburg isch er im Auguscht 2002 i de Aargau cho. Bis im März 2008 isch er z Birmischtorf Pfarrer gsi, wo zu de Chilegmeind Birmischtorf-Gäbischtorf-Turgi ghört. Sit em April 2008 isch er reformierte Pfarrer in de Chilegmeind Wettige-Noiehof. In dere Funktion het er im 2011 en Gottesdienscht gleitet, wo uf SRF 1 live übertrait worde isch.

Landeschile

Vo Mai 2007 bis Endi Juni 2013 isch de Lutz Fischer zämme mim Dominique Baumann und ab Oktober 2012 zämme mit em Ruedi Gebhard Co-Präsident vom Aargauische Pfarrkapitel gsi. Im Auguscht 2009 isch er Präsident vo de neugründete Synodefraktion vo de Fraktionslose worde und isch in de Amtsperiode 2015–2018 Vizepräsident vo de Fraktion gsi. Vom Novämber 2011 bis zum Dezember 2018 isch er Mitgliid vo de Gschäftsprüefigskommission (GPK) vo de Synode gsi, sit em Jänner 2015 zudem Vizepräsident vo de GPK. In de Amtsperiode 2019–22 isch er Vizepräsident vo de Synode gsi und in de Amtsperiode 2023-2026 isch er de Präsident vo de Synode

Politik und Mandat

In sinere Wohn- und Heimatgmeind Wettige isch de Lutz Fischer vom Januar 2014 bis Endi März 2016 in de Iibürgerigskommission gsi und isch sit em 17. März 2016 Mitgliid vom Iiwohnerrot. Dete isch er au vom Januar 2018 bis Januar 2020 Präsident vo de Gschäftsprüefigskommission gsi, 2020/21 Vizepräsident und 2022/23 het er s Amt vom Iiwohnerrotpräsident inne. Zudem isch er in zwei Wettiger Stiftigsröt und zwar in de Joseph und Franz Probst– und in de Familie Fluck–Bernhard Stiftig. Es dritts Mandat het er im Stiftigsrot vo de Pensionskasse vo de Reformierte Landeschille Aargau gha, wo er vom 2017 bis zum Mai 2020 Präsident isch gsi. Vom April 2014 bis zum November 2018 isch er im Verwaltigsrat vom Alterszentrum St. Bernhard gsi. Er isch Mitgliid vo de EVP und vo August 2016 bis Februar 2022 Präsident vo de Regionalpartei Wettige–Limmattal gsi. Über Wettige usse politisch wahrgnoh worde isch er durch e Petition, wo er lancierd hed un wo vom Bundesrot e Zuesicherig an de Edward Snowden gfordered het, dass er bin ere Ireis i d Schwiz Asyl däd übercho. Bi de Grossrotswahle am 23. Oktober 2016 isch er uf em zweite Lischteplatz vo de EVP im Bezirk Bade gstande und het en au verteidiged. Er isch nach em Rücktritt vo de Lilian Studer, wo am 20. Oktober 2019 in de Nationalrot gwählt worde isch, am 19. November 2019 in de Grossi Rot nochegrütscht. Bi de Nationalrotswahl am 20. Oktober 2019 und am 22.Oktober 2023 het er jewils uf em 10. Lischteplatz vo de Hauptlischte vo de EVP kandidierd. Bi de Aargauer Grossrotswahle vom 18. Oktober 2020 und vom 20. Oktober 2024 isch er widergwählt worde.

Familie

Vom Juni 1992 bis in Oktober 2023 isch de Lutz Fischer mit de Kristin Lamprecht ghüroote gsi und isch i dere Ziit under em Name Fischer-Lamprecht bikannt gsi. Mit ire zäme het er 5 Chind. De Axel Fischer isch sin ältere Brüeder.

Weblink

 Commons: Lutz Fischer – Sammlig vo Multimediadateie

• Website vom Lutz Fischer
• Portrait vom Lutz Fischer uf de Homepage vo de Aargauer Landeschile
• Lutz Fischer uf de Website vom Iiwohnerrot Wettige