Seychelle

D Seychelle, au Republik Seychelle, kreolisch Sesel; frz. Seychelles; ängl. Seychelles) isch e Inselstaat im Indische Ozean. Topografisch gheert dr Staat zue Afrika. D Hauptstadt isch Victoria.

Repiblik Sesel (Seselwa) Republic of Seychelles (ängl.) République des Seychelles (frz.) Republik vu dr Seychelle
{{{ARTIKEL-FLAGGE}}} {{{ARTIKEL-WAPPEN}}}
Wahlspruch: Finis Coronat Opus. Latein: „Dr Abschluss krönt s Wärk“
Amtsspraach	Seselwa, Änglisch, Franzesisch
Hauptstadt	Victoria
Staatsoberhaupt und Regierigschef	Wavel Ramkalawan
Flächi	455 km²
Iiwohnerzahl	93.186
Bevölkerigsdichti	198 Iiwohner pro km²
Bruttoinlandsprodukt Nominal Total (KKP) BIP/Yyw. (nominal) BIP/Yyw. (KKP)	2016 1,405 MRD USD (171.) 2,596 MRD USD (172.) 14.938 USD (52.) 27.602 USD (48.)
Human Development Index	0,782 (63.) (2016)
Währig	Seychelle-Rupie
Unabhängigkeit	29. Juni 1976 (vu Großbritannie)
Nationalhimne	„Koste Seselwa“
Zitzone	UTC +4
Kfz-Kennzeiche	SY
Internet-TLD	.sc
Vorwahl	+248

Geografy

Lag un Greßi

D Seychelle gheere topografisch zue Afrika. Si lige uf em nerdlige un weschtlige Dail vim Maskarenerugge, ere untermeerische Schwelle im weschtlige Dail vum Indische Ozean. Sidli vu dr Seychelle lige vor dr oschtafrikanische Kischte d Inselstaate Madagaskar, Mauritius un d Komore.

S Biet vu dr Seychelle gheert zue dr Zytzone UTC+4 (DTG: Delta). Des haißt, ass es im Winterhalbjohr e Zytverschiebig vu drei, in dr Summerzyt e Zytverschiebig vu zwoo Stunde gegeniber dr mitteleuropäische Zyt het.

D Republik Seychelle bstoht us rund 115 Insle, no dr Geology sin s 42 Granitinsle un 73 Koralleinsle. Mer dailt si no ihre Lag yy in di zwoo Hauptgruppe Inner Islands un Outer Islands.

Inner Islands

S Seebiet vu dr Inner Islands haißt mer Seychelles Bank, s nimmt e Flechi vu rund 31.000 km² yy.

D Inselgruppe Inner Islands zellt 32 Insle mit ere Landflechi vu insgsamt 266 km². Zue ihne gheere d Hauptinsle Mahé (154 km²), Praslin (38 km²) un La Digue (10 km²). S isch di am dichtescht bevelkert un dodermit wichtigscht Inselgruppe vum Land. Wichtigi Insle sin au Silhouette (20 km²), Île du Nord (2 km²), Frégate (2 km²), Île Aride (1 km²) un d Île Denis (1,4 km²). Fascht alli gnännte Insle bstehn us Granitgstai, nume di am nerdlige Rand vu dr Seychelles Bank glägene Insle Bird Island un Île Denis sin Koralleinsle.

Uf Mahé lyt dr hegscht Punkt vum Land, dr Morne Seychellois (905 m ü. MSL). Anderi wichtig Bärg sin dr Mont Dauban (740 m ü. MSL) (uf Silhouette) un dr Mont Praslin (367 m ü. MSL) uf dr glychnamige Insle.

Outer Islands

Usserhalb vu dr „Seychelles Bank“ lyt dr Archipel vu dr Outer Islands iber e Seebiet vu 400.000 km², doderzue gheere d Inselgruppe:

• Amirante mit der Hauptinsle Desroche
• Alphonse-Gruppe mir dr Atoll Alphonse un St. François
• Aldabra-Gruppe mit dr Atoll Aldabra un Cosmoledo
• Farquhar-Gruppe mit dr Atollen Farquhar un Providence
• Platte, e singuläri Insle rund 135 km sidli vu Mahé
• Coëtivy, e singuläri Insle 290 km sidli vu Mahé

Uf dr Hyfe Koralleinsle het s wäg dr nidere Hechi (hegschti Pinkt bi 9 m ü. MSL) un wel s kai Drinkwasser het, nume wenig chlaini Sidlige.

Flora un Fauna

Uf dr Seychelle git s e rychi endemischi Flora un Fauna, ellai drei Arte vu Riiseschildchrotte. Vor allem uf em Aldabra-Atoll findet mer di wältwyt grescht Kolony vu Riiselandschildchrotte, mit 150.000 Aldabra-Riiseschildchrotte. Au dr letscht fluguufähig Vogel, wu s im Indische Ozean no git, d Cuvierralle, het do ihri Haimet. S Vallée de Mai („Maidal“) uf Praslin isch e Wältnaturerb vu dr UNESCO un wird vu dr „Seychelles Island Foundation“ (SIF) verwaltet, wu 1979 zue däm Zwäck grindet wore isch. S Dal sich d Haimet vum Seychellebabegai (Coracopsis barklyi) un dr Seychellenuss, dr „Coco de Mer“ (Lodoicea maldivica). Uf dr Hauptinsle Mahé un uf Silhouette findet mer di do endemisch Familie vu dr Seychellefresche. Dernäbe cha mer au uf dr gschitzte Insle Aride, Cousin un Curieuse sälteni Dier un Bflanze sää. Ussergwehnli sin au d Vercharschtigserschynige in dr Granitfelse vu dr Insle (Silikatcharscht), vor allem an dr Kischte. Die Rinne, wu zmaischt vertikal verlaufe, entsteh dur Gschtaiuflesig unter tropische Bedingige.

Di yyhaimisch Vogelwält vu dr Seychelle gheert zue dr arterychschte im gsamte weschtlige Indische Ozean. Dur di isoliert Lag vum Archipel hän si do 15 Arte un 18 Unterarte entwicklet, wu s nume uf dr Seychelle git. Dur die Bsunderhait zelle d Granitinsle un au s Aldabra-Atoll zue dr 218 „Endemic Bird Areas“ (EBA), wu mer wältwyt idäntifiziert het.

Di urspringli Vegetation isch mit dr Bsidlig zruggdrängt wore. An ihri Stell sin Kulturbflanze drätte, wu fir dr Aaböu uf dr Seychelle uusgsuecht wore sin. S Mee vu dr tropische Frucht- un Nutzbflänze chenne uf dr Seychelle drieje: Aubergine, Banane, Avocado, Ananas, Papaya, Mango, Passionsfrucht, Stärnfrucht, Guave, Zitrone, Orasche, Zuckerrohr, Brotfrucht, Zitronegras un Zimed un au vyl Gwirz wie Vanille, Bfäffer un Muschget. Kokospalme sin in Plantasche gsetzt wore un lifere mit Kopra dr Hauptexportartikel vum Land. Banyanbaim un tropischi Nutzhelzer sin uf dr Insle aahsetzt wore, doderzue zelle d Drachebluetbaim un Albiziebaim.

Klima

S Klima vu dr Seychelle wird bstimmt vum Monsun: vu Dezämber bis Merz herrscht dr Nordwescht-Monsun vor, derno chunnt e windstille Ibergangszyt im April. Vu Mai bis Septämber chunnt di rägearm, aber stirmisch Zyt vum Sidoscht-Monsun, im Oktober-Novämber git s nomol e windstilli Ibergangszyt. Schwäri Stirm sin sälte. D Sunne schynt dur d Wulke im Mittel 5 bis 8 Stund am Dag. D Tämperature schwanke zwische 24 °C un 30 °C im Johresverlauf, d Meerwassertämperatur lyt s ganz Johr bi 26 °C.

D Niderschlagsmängi uf Mahe variiert zwische 2880 mm in dr Hauptstadt Victoria un 3550 mm in dr Bärgregione. D Luftfychti isch alliwyl iber 80 Brozänt. Di bescht Zyt zum uf d Sechelle raise isch Mai bis Oktober.

Seychelle
Klimadiagramm
J F M A M J J A S O N D     379   30 24     262   30 25     167   31 25     177   31 25     124   31 25     63   29 25     80   28 24     97   28 24     121   29 24     206   30 24     215   30 24     281   30 24 Temperatur in °C,  Niederschlag in mm Quelle: wetterkontor.de, mee Wätterdate

Monatlichi Durchschnittstemperature und -niderschläg für Seychelle Jan Feb Mär Apr Mai Jun Jul Aug Sep Okt Nov Dez Max. Temperatur (°C) 29,8 30,4 31,0 31,4 30,5 29,1 28,3 28,4 29,1 29,6 30,1 30,0 Ø 29,8 Min. Temperatur (°C) 24,1 24,6 24,8 25,0 25,4 24,6 23,9 23,9 24,2 24,3 24,0 23,9 Ø 24,4 Niderschlag (mm) 379 262 167 177 124 63 80 97 121 206 215 281 Σ 2.172 Sunnenstunde (h/d) 5,0 6,2 6,8 7,6 8,2 7,7 7,4 7,4 7,6 7,1 6,5 5,5 Ø 6,9 Regetäg (d) 17 11 11 14 11 10 10 10 11 12 14 18 Σ 149 Wassertemperatur (°C) 27 28 28 29 28 27 26 26 26 26 27 27 Ø 27,1 Luftfüchtigkeit (%) 82 80 79 80 79 79 80 79 78 79 80 82 Ø 79,8 T e m p e r a t u r 29,8 24,1 30,4 24,6 31,0 24,8 31,4 25,0 30,5 25,4 29,1 24,6 28,3 23,9 28,4 23,9 29,1 24,2 29,6 24,3 30,1 24,0 30,0 23,9 Jan Feb Mär Apr Mai Jun Jul Aug Sep Okt Nov Dez N i e d e r s c h l a g 379 262 167 177 124 63 80 97 121 206 215 281   Jan Feb Mär Apr Mai Jun Jul Aug Sep Okt Nov Dez Quelle: wetterkontor.de, mee Wätterdate

Bevelkerig

D Bevelkerig bstoot zue iber 90 % us Noofahre vu dr Sidler, wu us verschidene franzesische Kolonialbiet yygwanderet sin, un dr Noofahre vu ihre afrikanische Arbetsklave. Dernäbe git s e Minderhaite mit rain europäische Abstammig un chlaini chinesischi un indischi Minderhaite.

Sproche

As gmainsami Sproch het si di ne aigeni Variante vu dr Kreolsproche entwicklet, wu mer Seychellekreol oder Seselwa haißt un uf em Franzesisch basiert. Amtssproche sin no Artikel 4 vu dr Verfassig Seychellekreol, Änglisch un Franzesisch.

Religion

D Bevelkerig isch zue 82,3 % kafolisch (Bischtum Port Victoria), 7,7 % sin Broteschtante oder Anglikaner, 5,1 % gheeren em sunnitische Islam aa, 2,9 % sin Hindu, 1,5 % Anderschglaibig un 0,5 % gheere kainere Religion aa.

Gschicht

Vorgschicht

Mer nimmt aa, ass d Seychelle scho vor dr Aachumft vu dr eerschte Europäer als vu arabische Händler gsichtet un au bsuecht wore sin. E duurhafti Bsidlig het s aber nit gee,

Entdeckig un koloniali Friezyt

Anne 1502 isch mit em portugiesische Seefahrer Vasco da Gama dr eerscht Europäer uf d Insle chuu. Ab 1505 findet mer si uf europäische Seechaarte, ohni ass aini vu dr europäische Natione Intträssi an Stitzpinkt uf dr abglägene Inselgruppe ghaa hätt. Am 19. Jänner 1609 isch s britisch Schiff Ascension, wu zuen ere Expedition vu dr Britische Oschtindie-Kompany gheer ghaa het, uf dr Hauptinselgruppe vu dr Seychelle chuu. D Mannschaft het gmaint, si seie uf dr Amirante. Mer het si mit Proviant un Drinkwasser versorgt, het verschidei Insle bsuecht un Chaarte zaichnet. Am 1. Februar 1609 isch d Ascension wytergsääglet. S isch 133 Johr gange, bis d Seychelle wider in dr Fokus vu europäischi Seefahrer chuu sin. Anne 1742 het dr Gouverneur vu dr domalige franzesische Kolony Mauritius, dr Bertrand François Mahé de La Bourdonnais, en Expedition dert aane gschickt. D Hauptinsle Mahé het ihre Name ihm z Ehre iberchuu. E zwooti franzesischi Expedition 1756 het schließli d Inselgruppe formäll fir Frankrych in Bsitz gnuu un het ere ihre hitige Name gee zue Ehre vum domolige franzesische Finanzminischter Jean Moreau de Séchelles. Eerscht anne 1770 händ Franzose d Insle wirkli in Bsitz gnuu. Franzesischi Sidler, vylmol armi Wyssi us dr franzesische Kolonie Mauritius, Réunion oder us franzesische Bsitzige z Indie, hän uf dr Hauptinsle Mahé aafange buure un hän unter andere Gwiirz aaböue. Fir die Arbet hhän si schwarzi Sklave vum Feschtland gholt un hän in dr negschte 40 Johr au anderi Inlse vu dr Gruppe bsidlet.

Im Lauf vu dr Napoleonische Chrieg het d Gerrschaft iber d Seychelle sibe Mol zwisce dr Franzose un dr Brite gwächslet. Legendär wore isch dr franzesisch Gouverneur de Quinssey, wu dr franzesisch un au dr britisch Fahne un Uniforme ghaa het, un diejenige uusegholt het, je nodam was fir e Schiff grad uf dr Insle glandet sin. Anne 1811 hän d Brite d Insle eroberet un Victoria grindet, di hitig Hauptstadt un ainzig Stadt vu dr Seychelle. 1814 hän d Franzose im Verdrag vu Paris di britisch Herrschaft iber d Insle, wu vu dert ab vum britische Mauritius uus verwaltet wore sin, ändgiltig anerkännt.

Anne 1835 het di britisch Kolonialverwaltig d Sklaverei uf dr Insle abgschafft. Um die Zyt isch dBevelkerig us 680 wysse bzw. mestizische Landbsitzer un 6.600 Sklave bstande. Ass d Sklave frei wore sin, het zuen ere Umstellig vu dr landwirtschaftlige Produktion gfiert vu Nahrigsmittel uf weniger arbetsintänsivi Produkt wie Kopra un Zimed un zue dr Uuswanderig vu vyl Sidler. In dr negschte Johrzehnt sin e Hufe Afrikaner uf d Insle chuu, wu dur britischi Chriegsschiff vu Sklavehändlerschiff befreit wore sin. Derzue sin au Inder, Chinese un Malaie uf d Seychelle chuu. 1903 sin d Seychelle vu dr Verwaltig här vu Mauritius drännt un e aigeständigi Chronkolony wore.

Britischi Chronkolony (1903–1976)

Dail vu dr inneren Sälbschtverwaltig vu dr Chronkolony isch dr sognännt Legislativrot gsii. S Wahlrächt doderfir isch bis 1959 an dr Bsitz bunde gsii. Eerscht no 1959 het e greßere Dail vu dr Bevelkerig an däne Wahle chenne dailnee. Zue dr Wahle 1963 sin mit dr Seychelles Taxpayers and Producers Association un dr Seychelles Island United Party di erschte Barteie vu dr Seychellen aadrätte. Im nämlige Johr isch d United Party grindet wore, wu im Gegesatz zue dr erschtgnännte Barteie nit vu dr Großburger vu dr Insle dominiert gsii isch. Anne 1964 isch us äreBartei d Seychelles Democratic Party unter dr Fierig vum Rächtsaawalt un spetere erschte Bresidänt vum Land, James Mancham, entstande. Dr Mancham het e ängi Bindig an Großbritannie au noch ere meglige Unabhängigkait aagsträbt. Mit dr Seychelles People’s United Party unter em France-Albert René het s e radikalei Kunkerränz gee, wu fir e schnälli vollständigi Unabhängigkait yydrätten isch.

Bi dr erschte allgmaine Wahle 1967 sin allno d Helfti vu dr Sitz dur d Kolonialverwaltig bsetzt gsii. Em Mancham sy Seychelles Democratic Party het di wehlbare Sitz mit lychtem Vorsprung vor em France-Albert René syre SPUP gwune. Au d Wahle 1970 un 1974 het dr Mancham gwunne, mit eme greßere Vorsprung. Im Merz 1970 hän si z London Verdrätter vu dr Kolonialverwaltig mit eme Mancham un em René zämme droffe go ne Verfassig fir d Seychelle dischpetiere. Derwylscht si dr René fir d Unabhängigkait uusgsproche het, isch dr Mancham fir e ängeri Aabindig an Großbritannie yydrätte. Uf dr Grundlag vu dr neie Verfassig isch dr Mancham mit dr Wahle vu 1970 Regierigsschef vu dr als britische Seychelle wore. Anne 1974 hän si beedi Bolitiker un Barteiebleck fir d Unabhängigkait vu dr Insle uusgsproche. Dr Mancham un dr René sin bi dr Verhandlige mit dr Briten zäme ufdrätte un hän s Land zäme in d Unabhängigkait gfiert.

Dail vu dr unabhängige Republik sin dur Verhandlig au wider d Atoll Aldabra, Farquhar un Desroche wore, wu syter anne 1965 Dail vum British Indian Ocean Territory (BIOT) gsii sin.

Republik (syt 1976)

Am 29. Juni 1976 isch dr Mancham mit dr Unabhängigkait vum Land Bresidänt un dr René sy Premierminischter wore. D Zämearbet vu beede het am 5. Juni 1977 ufghert, wu dr Mancham, wu zue re Gipfelkumferänz vum Commonwealth uf London graist gsii isch, in eme Butsch dur 60 Aahänger vu dr People’s United Party (zmaischt Aagherigi vu dr Barteimiliz) mit Waffe abgsetzt woren isch un dr René sy Blatz yygnuu het. Dr René het dr Butsch grächtfertig mit dr Bhauptig, dr Mancham heb d Wahle welle verschiebe, wu 1979 hätte sotte stattfinde, wel er d Macht nit het welle verliere.

Di nei Regierig het si sozialistisch gnännt un isch unter em Yyflus vu dr Idee vum sozialistische Nochber Tansania gsii. Vu Tansania sin au Militeer zum persenlige Schutz vum neie Bresidänt chuu. Dr René het d Bindige an Großbritannie lucker gmacht, het si an Frankreich aaglähnt un d Kumkerränz vu dr Supermächt Sowjetunion un USA im Indische Ozean gnutzt. Anne 1978 het er e Ainhaitsbartei gschaffe, d Seychelles People’s Progressive Front, 1979 het er di bolitisch Macht mit ere neie Verfassig als furt kunzäntriert. Zwische 1978 un 1983 het er fimf Butschversuech iberstande. Bekannt wore isch vor allem dr Butschversuech vu 1981, wu ne Seldnerheer vu 50 Mann unter dr Fierig vum Mike Hoare versuecht het, d Macht z ibernee. E Untersuechig vu dr Verainte Natione het s sidafrikanisch Apartheidsregime, wu d Seldner au speter freigchauft het, fir dr Umsturzversuech verantworli gmacht. S Regime vum René het gwissi soziali Furtschritt brocht, aber au Mänscherächtsverletzige.

Im Zug vu dr allgmaine Demokratisierig vu dr afrikanische Staate het dr René ab 1991 dr Aibarteiestaat ufgee. Di erschte Meebarteiewahlen syt 1974 het s 1993 gee. Bi dr Bresidäntschaftswahle het er si mit 59,5 % gege Mancham duregsetzt, wu im Johr dervor us em Exil retuurchuu isch. D Barlemäntswahle het sy Bartei mit 27 vu dr 33 Sitz gunne. Im Septämber 1997 sin d Seychelle Mitglid vu dr Southern African Development Community (SADC) wore. Anne 1998 het dr René bi dr Wahlen 66,67 % vu dr Stimme vor em Wavel Ramkalawan vu dr Seychelles National Party] (SNP) mit 19,53 % un em Mancham mit 13,8 % iberchuu. D SPPF isch mit 30 vu 34 Sitz di grescht Bartei blibe. 2001 isch dr René zum letschte Mol zur Wahl aadrätte. Är het desmol mit 54,19 % gunne, derwylscht dr Wavel Ramkalawan 44,95 % iberchuu het. Sy Bartei het 23 vu dr 34 Sitz kriegt. Am 24. Februar 2004 het er sy Ruggdritt verchindet zuegunschte vu sym alte Kamrad un Vizebresidänt (syt 1996) James Alix Michel. Syt em 1. April 2004 isch dr James Alix Michel Bresidänt vu dr Seychelle. Im Juli 2004 sin d Seychelle us dr SADC uusdrätte, si aber im Augschte 2008 wider Mitglid wore.

Verwaltigsgliderig

D Seychelle sin in 25 Regierigsbezirk glideret. Dodervu lige 22 in dr Hauptsach oder uusschließlih uf dr Hauptinsle Mahé un zwee uf Praslin. La Digue bildet mit verschidene chlainere Insle ne aigen Dischtrikt. D Outer Islands, wu mit 211,3 km² vu drFlechi här 46,44 % vu dr Seychelle uusmache, sin kaim Regierigsbezirk zugornet.

Nr. 1)	Dischtrikt	Hauptort	Flechi km²	Bevelkerig Volkszellig 2002	Bevelkerig Volkszellig 2010	Region
01	Anse aux Pins	Anse Aux Pins	2,2	3.535	3.850	East/South
02	Anse Boileau	Anse Boileau	12,0	3.994	4.011	West
03	Anse Etoile	Anse Etoile	5,8	4.272	4.717	North
04	Au Cap (friejer Anse Louis)	La Plaine St. André?	8,7	2.997	4.233	East/South
05	Anse Royale	Anse Royale	6,6	3.688	4.168	East/South
06	Baie Lazare	Baie Lazare	12,1	2.957	3.608	West
07	Baie Sainte Anne	Anse Volbert	25,1	3.655	4.876	Inner Islands
08	Beau Vallon	Beau Vallon	4,3	3.797	4.120	North
09	Bel Air	Bel Air	4,7	2.900	2.857	Central
10	Bel Ombre (Belombre)	Belombre	9,2	3.538	3.708	North
11	Cascade	capital	10,4	3.439	4.267	East/South
12	Glacis	capital	7,0	3.576	3.833	North
13	Grand'Anse Mahé	Grand'Anse	15,4	2.587	3.106	West
14	Grand'Anse Praslin	Grand Anse	14,4	3.335	3.727	Inner Islands
15	La Digue and Inner Islands	La Passe	41,7	2.099	3.045	Inner Islands
16	English River	English River	1,7	3.624	4.196	Central
17	Mont Buxton	Mont Buxton	1,2	3.107	3.089	Central
18	Mont Fleuri	Mont Fleuri	6,1	3.611	3.419	Central
19	Plaisance	Plaisance	3,4	3.399	3.781	Central
20	Pointe La Rue	Pointe Larue	3,9	2.715	3.071	East/South
21	Port Glaud	Port Glaud	26,7	2.174	2.572	West
22	Saint Louis	Saint Louis	1,1	3.325	3.209	Central
23	Takamaka	Takamaka	14,4	2.589	2.825	East/South
24	Les Mamelles	Les Mamelles	1,8	2.352	2.667	Central
25	Roche Caïman	Roche Caiman	1,2	2.652	3.232	Central
26 2)	Outer Islands (Zil Elwannyen Sesel)	(Coëtivy)	211,3	1250	758	Outer Islands
	Seychelle	Victoria	455,0	81.177	90.945

¹⁾ D Nummere entspricht em ISO-Code fir d Dischtrikt 01 bis 23.
²⁾ ghert zue kaim Dischtrikt

Literatur

• Martin und Lore Guderjahn, Thomas J. Kinne: Seychellen. In: POLYGLOTT on tour. Polyglott-Verlag, München 2001, ISBN 978-3-493-55876-0, S. 108. 
• Thomas Haltner, Thomas J. Kinne: Seychellen: Trauminseln im Indischen Ozean. Verlagshaus Würzburg, Würzburg 2016, ISBN 978-3-8003-4467-3.
• William McAteer: Rivals in Eden. A History of the French Settlement and British Conquest of the Seychelles Islands, 1742–1818.. The Book Guild, Lewes, Sussex 1991. ISBN 0-86332-496-7.
• Joseph Ki-Zerbo: Die Geschichte Schwarzafrikas, Fischer Taschenbuch, Frankfurt am Main 1993, ISBN 3-596-26417-0.

Weblink

• Länder- un Rais-Informatione vum dytsche Uuswärtige Amt
• Websyte vu dr Republik Seychelle (englisch)

Fueßnote

Dä Artikel basiert uff ere fräie Übersetzig vu dere Version vum Artikel „Seychellen“ vu de dütsche Wikipedia. E Liste vu de Autore un Versione isch do z finde.

Dä Artikel basiert uff ere fräie Übersetzig vu dere Version vum Artikel „Geschichte_der_Seychellen“ vu de dütsche Wikipedia. E Liste vu de Autore un Versione isch do z finde.