Thomas Henry Ball

Dialäkt: Owerelsassisch

Dr Thomas Henry Ball (* 14. Janner 1859 z’ Huntsville, Texas; † 7. Mai 1944 z’ Houston) ìsch a àmerikànischer Rachtsànwàlt un Politiker gsìì. Vu 1896 bis 1903 hàt’r dr Bundesschtààt Texas vertratta ìm Representàntahüs vu da Verainigta Stààta.

Dr Thomas H. Ball.

si LawaBearbeite

Dr Thomas Henry Ball ìsch àm 14. Janner 1859 z’ Huntsville ìn Texas uf d’ Walt kumma. Si Vàter ìsch methodischter Pfàrrer gsìì, un àui Presidant vum Andrew College. Àls dr Ball säcks Johra àlt gsìì ìsch, sìn sina Ältra gschtorwa. Ar ìsch àlso bi sim Unkel ufgwàchsa; dr Unkel ìsch a konfedieriarta Kriagsveteràn gsìì. Ànna 1871 hàt dr Ball a Hochschüalàbschluss vum Austin College bikumma. Schpeeter hàt’r Racht gschtudiart àn dr University of Virginia z’ Charlottesville. Ànna 1888 hàt ma ìhn àls Rachtsànwàlt züagloo.[1] Àls Ànwàlt hàt’r z’äärscht z’ Huntsville gschàfft. Vu 1887 bis 1892 ìsch’r fìr dräi Àmtszitta dr Bìrgermaischter vu Huntsville gsìì. Ànna 1902 hàt’r uf Houston gwàndelt, wo-n-’r zamma mìt em Frank Andrew a Ànwàltsbüro grìnda hàt. Da Büro ìsch zitter 1913 Andrews Kurth bnännt. Da Büro hàt unterànderem gschàfft fìr d’ Reconstruction Finance Corporation, d’ Federal National Mortgage Association un mehrera Isabàhngsällschàfta un Regiarungsorganisationa vum New Deal.

Dr Ball ìsch Mìtglìed vu dr Demokràtischa Pàrtäi gsìì. Ar hàt fìr d' Demokràtischa Pàrtäi vum Texas àn mehrera Schtälla gschàfft. Vu 1896 bis 1903 ìsch’r US-Represantànt gsìì: z’äärscht fìr dr 1. Wàhlkreis vun Texas vum 4. März 1897 bis àm 3. März 1903, un dernoh fìr dr 8. Wàhlkreis vun Texas vum 4. März 1903 bis sim Rücktrìtt àm 16. Novamber 1903. Àls Mìtglìed vum Üssschuss fìr d' Flüssa un d' Hàfa hàt’r unterànderem d’ ärschta Färdergalder vum US-Bundesregiarung fìr dr Houston Ship Channel iigfiahrt. Noh sinera Zitt ìm Kongress hàt’r nochamol àls Ànwàlt gschàfft, fìr Andrews Kurth z’ Houston.

Dr Ball hàt àb 1887 d' texanischa Prohibition unterschtìtzt. Ànna 1914 hàt’r àn dr demokràtischa Urwàhl-Versàmmlung fìr dr Wàhl vum Gouverneur vu Texas vu 1912 mìtgmàcht. Ar ìsch àwer nìtt nominiart worra: obwohl ar àls Prohibitionischt vum US-Presidant Woodrow Wilson un vum William Jennings Bryan unterschtìtzt worra ìsch, ìsch’r vum Anti-Prohibitionischt James E. Ferguson gschlààga worra. Dernoh ìsch dr Ferguson nochamol àls Gouverneur gwählt worra. Noh sinera Àmtszitt ìm Kongress hàt dr Thomas Ball noch bim US-Kongress un bim texanischa Parlament Verbässerunga fìr dr Hàfa vu Houston befìrwortet. Noh dr Äntwicklung vum Fluss Buffalo Bayou ìsch dr Ball Generàlràt vum Houston Port Commission worra. Üsserdam ìsch’r Biigordneter gsìì àn da Democratic National Conventions vu 1892, 1924 un 1928.[1]

Dr Thomas Ball ìsch àm 7. Mai 1944 z Houston gschtorwa un ìsch àui doo beardigt worra.

Mìt sinera Fràui Minnie F. Thomason hàt ar säcks Kìnder ghàà, drunter dräi Kìnder, wo sa adoptiart han.

Noh sim LawaBearbeite

Zitter 1907 ìsch d’ Schtàdt Tomball (nordwäschtlich vu Houston) noh-n-ìhm bnännt.[2]

LiteràtürBearbeite

ReferanzaBearbeite

  1. 1,0 1,1 Ben R. Guttery: Representing Texas : a comprehensive history of U.S. and Confederate senators and representatives from Texas. 2008, ISBN 978-1-4196-7884-4, S. 18–19 (englisch, google.com [abgerufen am 19. Dezember 2012]).
  2. Ken Hudnall, Sharon Hudnall: Spirits of the Border V: The History And Mystery of the Lone Star State. Band 5. Omega Press, 15. August 2005, S. 454 (englisch, google.com [abgerufen am 19. Dezember 2012]).

Externa LinksBearbeite

  Commons: Thomas Henry Ball – Sammlig vo Multimediadateie