Hauptmenü ufmache

Brot-Dessus

es Dorf im Kanton Nöieburg
Puurehööf vo Brot-Dessus

Brot-Dessus isch es chlyses Dorf i der Gmeind Brot-Plamboz vom Kanton Nöieburg.

Der Ort lyt im Jura am südleche Rand vom Tal Vallée des Ponts, oben a der Felswand, wo dört d Nordsyte vom Val de Travers pildet.

Der Ortsname Broch chunt s erschte Mol in ere Urkunde vo anne 998 vor. D Spoochforscher dänke, er chöm vom altfranzösische oder frankoprovenzalische Wort broc, wo uf Düütsch «Felssporn» bedüütet.

“Brot-Dessus” heisst uf Düütsch «Ober-Brot»; s Dorf het mit em Dorf Brot-Dessous – also «Under-Brot» – sid em Middelalter e Dorfkorporazioon pildet; die het zu der Herrschaft Boudry ghört, wo sid em 14. Johrhundert a Deil vo der Grafschaft Nöieburg gsi isch.

Zwüsche Brot-Dessous und Brot-Dessus stoot die höchi Kreete vom Bärg Solmont, wo me uf emene stotzige Fuesswääg het müesse drübergoo.

Anne 1888 sind d Hüüser vo Brot, wo im Vallée des Ponts obe gsi sind, us der alte Gmeind usträtte, und zäme mit em chlyne Dorf Plamboz wyter oben im Taal isch die nöi Gmeind Brot-Plamboz gmacht worde.

LiteraturBearbeite